Rusiya Ukraynada yük gəmilərinə və polad zavodlarına zərbələr endirdiyini açıqlayıb

Kreml: ABŞ ilə iqtisadi əməkdaşlığa maraq var, mexanizm yoxdur

Kremlin sözçüsü Dmitri Peskov “İzvestiya” qəzetinə açıqlamasında bildirib ki, ABŞ ilə ticarət və iqtisadi əməkdaşlığın bərpasının hər iki ölkə üçün “əhəmiyyətli fayda” verəcəyi ilə bağlı anlayış var.

“Ən azı korporativ səviyyədə böyük maraq görürük. Lakin praktik baxımdan hazırda əməkdaşlıq mexanizmləri mövcud deyil və heç bir birgə layihə həyata keçirilməyib”, - Peskov deyib.

Rusiyanın Ukraynaya zərbələri 3 nəfərin ölümünə səbəb olub

Ukrayna Prezidenti Volodimir Zelenski bildirib ki, Rusiyanın ölkənin 10 regionuna endirdiyi hava zərbələri nəticəsində 3 nəfər ölüb, onlarla insan yaralanıb. Hücumlar yaşayış binalarına və infrastruktura da ziyan vurub.

Zelenskinin “Telegram”da yazdığına görə, Ukraynanın cənub-şərqində yerləşən Zaporojye şəhərində 2 nəfər, onun doğulduğu Krivoy Roq şəhərində isə 1 nəfər həlak olub. Odessa vilayətində, Krivoy Roqda və Kiyevdə də yaralananlar var.

Rusiya Bab əl-Məndəb boğazındakı vəziyyətdən narahatdır

Kremlin sözçüsü Dmitri Peskov bildirib ki, Bab əl-Məndəb boğazında vəziyyət nəzarətsiz şəkildə inkişaf edir və bu, Moskvada narahatlıq doğurur. Bu barədə şənbə günü “İnterfaks” məlumat yayıb.

“Reuters”in Yəmən hökumətindəki dörd mənbəyə istinadən verdiyi məlumata görə, İranın dəstəklədiyi husilər sentyabrın 11-də Bab əl-Məndəb boğazındakı strateji Perim adasına çatıblar. Bununla da onlar Yaxın Şərqdə genişlənən müharibə fonunda mühüm qlobal dəniz nəqliyyatı marşrutu üzərində nəzarətlərini gücləndirməyə çalışırlar.

Rusiya Buşehr AES-də mütəxəssislərinin sayını artıracaq

Rusiyanın dövlət nüvə korporasiyası “Rosatom” yaxın vaxtlarda İrandakı Buşehr Atom Elektrik Stansiyasında çalışan mütəxəssislərinin sayını 150-yə çatdırmağı planlaşdırır. Bu barədə “İnterfaks” məlumat yayıb.

Buşehr AES-də iki yeni enerji bloku inşa edən “Rosatom” ABŞ və İsrailin fevralın 28-də İrana qarşı müharibəyə başlamasından sonra yüzlərlə əməkdaşını təxliyə etmişdi.

Rusiyanın Odessaya gecə hücumunda 30-dan çox insan yaralanıb

Yerli hakimiyyət orqanlarının məlumatına görə, Rusiyanın gecə saatlarında Ukraynanın cənubundakı Odessa şəhərinə endirdiyi zərbələr nəticəsində 30-dan çox insan yaralanıb. Hücum zamanı yaşayış binasına ciddi ziyan dəyib, yaxınlıqdakı bir neçə bina və qaz infrastrukturu da zədələnib.

Ukrayna Hərbi Hava Qüvvələri hücum zamanı onlarla Rusiya dronu və raketinin vurulduğunu bildirib.

Rusiya isə zərbələrin Çornomorskda hərbi təchizat əməliyyatları üçün istifadə edilən liman obyektlərini hədəfə aldığını açıqlayıb.

Tərəflər bir-birini strateji infrastrukturu hədəfə almaqda ittiham edir, mülki şəxslərə hücum etdiklərini isə inkar edirlər.

Odessada Rusiyanın dron zərbəsi nəticəsində zədələnmiş yaşayış binası. 12 sentyabr 2026-cı il.

Reuters

Ukrayna dronları Rusiyanın Samara vilayətində sənaye obyektlərini hədəfə alıb

Ukrayna dronları Rusiyanın Samara vilayətində sənaye obyektlərinə hücum edib. Bu barədə “İnterfaks” vilayətin qubernatoru Vyaçeslav Fedorişşevə istinadən məlumat yayıb.

Rusiya Müdafiə Nazirliyi gecə ərzində ölkənin ondan çox regionu, həmçinin Krım, Azov dənizi və Qara dəniz üzərində 230 Ukrayna dronunun vurulduğunu bildirib.

Fedorişşev hansı obyektlərin hədəfə alındığını və onlara dəyən zərəri açıqlamayıb.

Samara vilayətinin Tolyatti şəhərinin meri İlya Suxix bir neçə yaşayış binasına ziyan dəydiyini, bir nəfərin isə yaralandığını bildirib.

Ayrı bir hücum zamanı Rostov vilayətinin Taqanroq şəhərində dörd kommersiya obyektində yanğın baş verib. TASS-ın məlumatına görə, bunu şəhər meri Svetlana Kambulova bildirib.

Rusiya Ukraynanın sənaye obyektlərinə zərbələr endirib

Rusiya Müdafiə Nazirliyi qüvvələrinin Zaporojye şəhərindəki “Zaporizhstal” polad zavodunu, Dneprdəki “Interpipe Steel” kompleksini, həmçinin Krivoy Roqda yerləşən bir neçə müəssisəni, o cümlədən Şimal Dağ-Mədən Zənginləşdirmə Kombinatını vurduğunu bildirib.