İsveçdə keçirilən seçkilər ifrat sağçıların hökumətə daxil olmasına yol aça bilər

İsveçlilər sentyabrın 13-də keçirilən parlament seçkilərində səs verirlər. Sağçı partiyaların parlamentdə çoxluq qazanacağı təqdirdə, ifrat sağçılar İsveçdə ilk dəfə hökumətdə təmsil oluna bilər.

İctimai rəy sorğularına görə, sol mərkəzçi müxalifət alyansı öndədir. Sosial Demokratların lideri Maqdalena Andersson Baş nazir vəzifəsinə əsas namizəd sayılır. Lakin seçki kampaniyasının son günlərində onun blokunun üstünlüyü xeyli azalıb.

Son seçkiqabağı sorğulardan birinə görə, iki blok arasındakı fərq bir həftə əvvəlki 8,2 faiz bəndindən 5,6 faiz bəndinə düşüb. Sosial Demokratlara dəstək isə 27,6 faizə enib. Bu, partiyanın 2022-ci il seçkilərində əldə etdiyi nəticədən aşağıdır.

İsveçdə ifrat sağçılar hökumətə daxil ola bilər

Mərkəz-sağçı Baş nazir Ulf Kristerson isə sağçı blok yenidən hakimiyyətə gələcəyi təqdirdə ifrat sağçı İsveç Demokratlarına nazir vəzifələri verəcəyini vəd edib.

Jimmie Åkessonun rəhbərlik etdiyi İsveç Demokratları 2022-ci ildə əldə olunan razılaşma çərçivəsində Kristerson hökumətini kənardan dəstəkləyib. Bu razılaşma partiyaya xüsusilə cinayətkarlıq və immiqrasiya məsələlərində hökumətin siyasətinə təsir göstərmək imkanı verib.

Sağçı blokun tərəfdarları bildirirlər ki, hökumətin siyasəti cinayətkar qruplaşmaların zorakılığını azaltmağa, həmçinin immiqrasiyanı kəskin məhdudlaşdırmağa kömək edib. Onların fikrincə, seçkidə qələbə bu siyasətə ictimai dəstəyin göstəricisi olacaq və qarşıdakı illərdə eyni kursun davam etdirilməsinə şərait yaradacaq.

“Biz partiyaları, seçiciləri və məsələləri ortaq fəaliyyət ətrafında birləşdirə bilirik. Buna görə də nəticə əldə edirik”, – sağçı blokun qalib gələcəyi təqdirdə İsveç Demokratlarını hökumətə daxil etməyi vəd edən Kristerson ölkə parlamentində jurnalistlərə deyib.

Tənqidçilər isə bu siyasətin vətəndaş azadlıqlarını zəiflətdiyini, immiqrantları İsveçin mədəni normalarına daha çox uyğunlaşmağa və ya ölkəni tərk etməyə sövq etdiyini bildirirlər. Onların fikrincə, bunun üçün həm təşviq, həm də təzyiq vasitələrindən istifadə olunur.

“Biz daha sərt, daha susqun, eyni zamanda daha yoxsul cəmiyyətə çevrilmişik. Çünki iqtisadi artım potensialımızdan xeyli aşağı olub”, – Magdalena Andersson deyib.

Sol blokda fikir ayrılıqları qalır

Sosial Demokratlar, Yaşıllar, Sol Partiya və Mərkəz Partiyası sosial təminat və dövlət xərclərinin artırılması məsələsində ümumən həmfikirdirlər. Lakin bir sıra mövzularda, o cümlədən immiqrasiya siyasətində fikir ayrılıqları qalır. Magdalena Anderssonun partiyası bu məsələdə bəzi potensial koalisiya tərəfdaşlarından daha sərt mövqe tutur.

Rəqib sağçı blok isə seçicilər üçün vacib sayılan bir sıra məsələlərdə ortaq mövqeyə gəlib. Bunlara Ukraynaya dəstək, hərbi potensialın gücləndirilməsi və artan yaşayış xərclərindən əziyyət çəkən ailələrə yardım daxildir.

Seçkidə iştirakın yüksək olacağı gözlənilir. Sentyabrın 12-si səhərədək 3,37 milyondan çox insan əvvəlcədən səs verib. Ölkədə ümumilikdə 8 046 725 nəfər səsvermə hüququna malikdir.

Teqlər

İsveç ifrat sağçılar Seçkilər Sosial Demokratlar hökumət Ulf Kristersson