Amazon Mayamidəki qəzadan sonra yükdaşıma şirkəti ilə əməkdaşlığı dayandırıb

“Amazon” ötən həftəsonu Mayami Beynəlxalq Hava Limanında baş verən və beş nəfərin ölümü ilə nəticələnən qəzadan sonra “21 Air” yükdaşıma şirkəti ilə əməkdaşlığı müvəqqəti dayandırıb.

Mayamidə yerləşən “21 Air” şirkəti qəzaya uğrayan “Amazon Air”in 7598 saylı reysini yerinə yetirib.

“Amazon”un “21 Air” ilə əməliyyatları müvəqqəti dayandırmaq qərarı sentyabrın 6-da baş verən qəzanın səbəblərinin araşdırıldığı bir vaxtda qəbul edilib.

“Amazon”un sözçüsü Kelli Nantel bildirib ki, şirkət son bir həftə ərzində qəza ilə bağlı vəziyyəti nəzərdən keçirib.

“Ötən həftəsonu baş verən faciəli hadisədən sonra araşdırmaya dəstək göstərdik və qəza ilə bağlı bəzi məqamları araşdırdıq. Nəticədə 7598 saylı reysi həyata keçirən “21 Air” şirkəti ilə əməliyyatları müvəqqəti dayandırmaq qərarına gəldik”, – Nantel “Reuters”ə bildirib.

Rəsmilərin məlumatına görə, təyyarə eniş zamanı uçuş-enmə zolağından çıxaraq yerdəki bir neçə nəqliyyat vasitəsinə çırpılıb.

Qəzanı araşdıran ABŞ Milli Nəqliyyat Təhlükəsizliyi Şurası (NTSB) bildirib ki, təyyarə yerə endikdən sonra pilotlar yenidən havaya qalxmaq imkanını nəzərdən keçiriblər.

Qurumun məlumatına görə, pilotlardan biri enişə bir dəqiqədən bir qədər çox qalmış təyyarənin “həddindən artıq sürətlə” uçduğunu bildirib. Bu məlumat uçuş parametrlərini qeydə alan cihazdan əldə edilib.

Qəzaya uğrayan “Boeing 767-300” yük təyyarəsinin 32 yaşı olub. Hadisə təyyarə həmin gün üçüncü reysini yerinə yetirərkən baş verib.

“21 Air” qəzanın araşdırılması ilə bağlı müvafiq qurumlarla əməkdaşlığı davam etdirdiyini və hadisədən zərər çəkənlərə dəstək göstərdiyini bildirib.

“Biz təhlükəsizlik siyasətimizə, prosedurlarımıza və təlimlərimizə inanırıq”, – şirkətin açıqlamasında qeyd olunub.

• “Amazon”a yük daşıyan təyyarə Mayami Hava Limanında qəzaya uğrayıb

Teqlər

Amazon Amazon Air 21 Air Mayami ABŞ Florida təyyarə qəzası yük təyyarəsi