Pakistan əfqanıstanlı tibb tələbələrinin ölkədən çıxarılmasını müvəqqəti dayandırıb

Pakistan məhkəmələri əfqanıstanlı tibb tələbələrinin ölkədən çıxarılmasını müvəqqəti dayandıraraq onların təhsillərini davam etdirməsinə icazə verib. Qərar İslamabadla Kabil arasında gərginlik fonunda qəbul edilib.

Sentyabrın 14-də Sind Ali Məhkəməsi Pakistan Tibb və Stomatologiya Şurasının (PMDC) əfqanıstanlı tibb və stomatologiya tələbələrinin ölkələrinə qayıtmasını tələb edən göstərişlərini dayandırıb. Məhkəmə Kəraçidə təhsil alan 34 tələbə ilə bağlı müvəqqəti qərar çıxararaq sentyabrın 29-dək onlara qarşı hər hansı tədbir görülməsini qadağan edib.

PMDC sentyabrın 1-də təhsil müəssisələrinə əfqanıstanlı tələbələrin Əfqanıstana qayıtmasını təmin etməyi tapşırmış, həmçinin cari tədris ili ərzində Əfqanıstan vətəndaşı olan yeni tələbələrin qəbulunu və başqa təhsil müəssisələrinə köçürülməsini qadağan etmişdi.

Qərardan şikayət edənlər arasında sonuncu kurs tələbələri də var. Onlar məzun olmadan geri qayıdacaqları təqdirdə təhsillərinin yarımçıq qalacağını bildiriblər. İki qadın tələbə isə Əfqanıstanda qadınların təhsilinə qoyulan məhdudiyyətləri əsas gətirib.

Sentyabrın 11-də Lahor Ali Məhkəməsi də 13 əfqanıstanlı tibb tələbəsinin ölkədən çıxarılmalarına etirazından sonra oxşar qərar verib. Tələbələrə məhkəmə prosesi davam etdiyi müddətdə təhsillərini davam etdirməyə, imtahan verməyə və universitet yataqxanalarına qayıtmağa icazə verilib.

Pakistan Xarici İşlər Nazirliyi sentyabrın 10-da bütün əfqanıstanlı tələbələrin geri göndərilməsi barədə hökumət qərarının olmadığını açıqlayıb. Etibarlı vizası olan və ali təhsil proqramlarına qəbul edilmiş tələbələrin Pakistanda qalaraq təhsillərini başa vura biləcəyi bildirilib.

Məsələ Pakistanın əfqanları ölkələrinə qaytarmaq üzrə genişmiqyaslı kampaniyası fonunda gündəmə gəlib. Beynəlxalq Miqrasiya Təşkilatının məlumatına görə, 2023-cü ilin sentyabrından 2026-cı il iyulun 31-dək 2,6 milyondan çox əfqan Pakistandan ölkəsinə qayıdıb.

İslamabad bu siyasəti miqrasiya qaydalarının icrası və milli təhlükəsizliklə əsaslandırır. Pakistan hakimiyyəti “Təhriki-Taliban Pakistan” (TTP) qruplaşmasını Əfqanıstan ərazisindən fəaliyyət göstərməkdə ittiham edir. Əfqanıstandakı Taliban hakimiyyəti isə ittihamı rədd edir.

BMT qurumları və insan hüquqları təşkilatları Əfqanıstandakı humanitar və iqtisadi vəziyyəti nəzərə alaraq əfqanların ölkələrinə qaytarılmasının miqyası və sürətindən narahatlıq bildiriblər.

Kopyalandı