Rusiyanın zərbələri nəticəsində Kiyev və Odessada 13 nəfər yaralanıb, binalara ziyan dəyib

Putin rusiyalıları 18–20 sentyabr seçkilərində səs verməyə çağırıb

Rusiya Prezidenti Vladimir Putin vətəndaşları 18–20 sentyabrda keçiriləcək seçkilərdə səs verməyə çağırıb. O bildirib ki, seçkilərdə iştirak ölkənin güclənməsinə töhfə verəcək.

Putin televiziya müraciətində bildirib ki, seçicilər Dövlət Dumasının deputatlarını, bir sıra regionlarda qanunverici orqanların deputatlarını və rəhbərləri, eləcə də yerli özünüidarəetmə orqanlarının nümayəndələrini seçəcəklər.

Donald Tramp: “Polşada ABŞ hərbi bazasının yaradılması istiqamətində irəliləyiş var”

ABŞ Prezidenti Donald Tramp Polşada ABŞ Quru Qoşunlarının bazasının yaradılması istiqamətində irəliləyiş olduğunu bildirib. O, bu irəliləyişdə Polşa Prezidenti Karol Navrotskinin liderliyinin rolunu vurğulayıb.

Tramp bildirib ki, plan həyata keçirilərsə, bazanın yerləşəcəyi məkan yaxın vaxtlarda açıqlanacaq. O, bunu ABŞ-Polşa müttəfiqliyi üçün tarixi addım adlandırıb.

Polşa Rusiyanın 2022-ci ildə Ukraynaya genişmiqyaslı müdaxiləsindən sonra NATO-nun şərq cinahında müttəfiq qüvvələrin mövcudluğunun artırılmasına çalışır.

Donald Tramp seçki mitinqində. Qastoniya, ABŞ, 16 sentyabr 2026-cı il.

Reuters

Robert Fitso: “Avropa genişmiqyaslı müharibəyə heç vaxt olmadığı qədər yaxındır”

Slovakiyanın Baş naziri Robert Fitso bildirib ki, Ukraynadakı müharibə fonunda Avropa genişmiqyaslı müharibəyə heç vaxt olmadığı qədər yaxındır. O, xəbərdarlıq edib ki, pilotsuz uçuş aparatının NATO ölkəsinin hava məkanını pozması alyansın kollektiv müdafiə mexanizminin işə düşməsinə səbəb ola bilər.

Fitso deyib ki, siyasətçilər sülhün qorunması üçün çalışmalıdırlar. O, Slovakiyanın silahlı münaqişəyə cəlb olunmasının qarşısını almaq istədiyini bildirib.

Baş nazir həmçinin bir neçə Avropa liderinin iştirakı ilə keçiriləcək görüş üçün Ukraynaya səfər etməyi planlaşdırdığını qeyd edib.

Slovakiyanın Baş naziri Robert Fitso və Çexiyanın Baş naziri Andrey Babiş mətbuat konfransında. Bratislava, Slovakiya, 10 sentyabr 2026-cı il.

Reuters

Ukrayna inflyasiya riskləri fonunda əsas faiz dərəcəsini 16 faizə qaldırıb

Ukrayna Mərkəzi Bankı inflyasiya təzyiqlərinin artması fonunda əsas faiz dərəcəsini 0,5 faiz bəndi artıraraq 16 faizə çatdırıb. Avqustda illik istehlak inflyasiyası iyuldakı 7,7 faizdən 8,1 faizə yüksəlib.

Mərkəzi Bankın sədri Andriy Pışnıy bildirib ki, Rusiyanın sənaye və infrastruktur obyektlərinə hücumlarının intensivləşməsi ortamüddətli inflyasiya risklərini artırır. Bank Yaxın Şərqdəki münaqişəni və qlobal enerji təchizatının məhdudlaşmasını da qiymətlərə təzyiqi artıran amillər sırasında göstərib.

Rusiyanın davam edən zərbələri Ukraynada iqtisadi fəaliyyətə, logistika və biznes əməliyyatlarına mənfi təsir göstərir. Mərkəzi Bank 2026-cı il üçün ÜDM artımı proqnozunu əvvəlki 1,8 faizdən 1,1–1,2 faizə endirə bilər.

Faiz artımı gözlənilən idi. Bəzi rəsmilər isə bunun şirkətlərin maliyyəyə çıxışını çətinləşdirə biləcəyini bildiriblər.

Hökumət isə Ukrayna şirkətlərinə dəstək üçün müharibə risklərinin sığortalanması proqramını genişləndirib və kompensasiya prosedurlarını sadələşdirib.

Moskva “Euroclear” mübahisəsini Aİ məhkəməsinə daşıyıb

Rusiya Mərkəzi Bankı bildirib ki, iyulda qəbul olunan Aİ qaydasına qarşı Avropa İttifaqının Ümumi Məhkəməsində iddia qaldırıb.

Bankın sözlərinə görə, həmin qayda Avropada dondurulmuş Rusiya aktivləri ilə bağlı “Euroclear”lə davam edən hüquqi mübahisəyə müdaxilə edir.

Rusiyanın dron hücumu Polşa sərhədi yaxınlığında partlayışlara səbəb olub

Rusiyanın gündüz saatlarında həyata keçirdiyi dron hücumu zamanı Ukraynanın NATO üzvü Polşa ilə sərhədinin bir neçə kilometrliyində partlayış səsləri eşidilib. Bu barədə Ukrayna rəsmisi “Reuters”ə bildirib.

Ukrayna Dövlət Sərhəd Xidməti hücum nəticəsində sərhəd-keçid məntəqələrinə ziyan dəymədiyini açıqlayıb.

Sentyabrın 13-də isə Rusiya dronu Ukrayna-Polşa sərhədindən cəmi iki kilometr aralıda sərnişin qatarına zərbə endirmişdi.

Rusiya və Ukrayna həlak olan hərbçilərin cəsədlərini mübadilə ediblər

Rusiya və Ukrayna müharibədə həlak olan hərbçilərin cəsədlərini mübadilə ediblər.

Belarusun dövlət xəbər agentliyi BELTA-nın məlumatına görə, Belarus-Ukrayna sərhədində keçirilən mübadilə zamanı Moskva 252 cəsədi Ukrayna tərəfinə təhvil verib, əvəzində isə 23 cəsəd alıb.

Ukrayna müharibəsi NATO-nun zəif tərəflərini üzə çıxarır

Ukraynadakı müharibə döyüş texnologiyalarının sürətlə dəyişdiyi bir vaxtda NATO-nun bu yeniliklərə nə qədər tez uyğunlaşa biləcəyi ilə bağlı suallar yaradıb.

Ukrayna və Qərb rəsmiləri “Reuters”ə bildiriblər ki, Ukrayna silahlarını və döyüş taktikasını bir neçə həftə ərzində dəyişə bildiyi halda, NATO-da yeni silahların hazırlanması və alınması proqramları illər, bəzən isə onilliklər çəkə bilər.

Ucuz dronlar döyüş meydanında vəziyyəti ciddi şəkildə dəyişib. Tanklar, iri qoşun qruplaşmaları və hərbi avtomobil kolonları daha asan hədəfə çevrilib. Ukrayna rəsmilərinin fikrincə, müharibə NATO-nun bəzi təlim metodları və döyüşlə bağlı yanaşmalarındakı zəif cəhətləri də üzə çıxarıb. Bunlardan biri genişmiqyaslı əməliyyatlar zamanı NATO-nun hava üstünlüyünü təmin edə biləcəyi fərziyyəsidir.

Hava və raketdən müdafiə də əsas problemlərdən biri olaraq qalır. Avropa mürəkkəb hava və raket təhdidlərinin qarşısını almaq üçün hələ də əsasən ABŞ istehsalı “Patriot” sistemlərindən asılıdır. Ukraynanın “Patriot” sistemləri üçün raket çatışmazlığı ilə üzləşməsi bahalı və məhdud ehtiyatlara malik raketlərdən asılılığın risklərini göstərib.

Ukrayna və Avropa tərəfdaşları alternativ sistemlər üzərində işləyirlər. Bunlardan biri Ukraynanın “Fire Point” müdafiə şirkətinin rəhbərlik etdiyi “Freyja” ballistik raketlərə qarşı müdafiə layihəsidir. Layihənin məqsədi daha sürətli və daha aşağı xərclə istehsal edilə bilən, Avropanın nəzarətində olacaq sistem yaratmaqdır.

NATO ölkələri Ukrayna müharibəsindən çıxarılan dərsləri gələcək münaqişələrə hazırlıq planlarına daxil etməyə çalışırlar.

Polşa Rusiyanın Ukraynaya zərbələri fonunda hərbi təyyarələri havaya qaldırıb

Polşa Rusiyanın Ukraynaya dron hücumları ilə əlaqədar hərbi təyyarələri havaya qaldırıb. Bu barədə Polşa ordusu məlumat yayıb.

Polşa Silahlı Qüvvələrinin Əməliyyat Komandanlığı bildirib ki, tədbirlər qabaqlayıcı xarakter daşıyır və ölkənin hava məkanının, xüsusilə təhlükə altında olan Ukrayna bölgələrinə yaxın ərazilərin qorunmasına yönəlib.

Makron Yaxın Şərq və Ukraynadakı böhranları partiya liderləri ilə müzakirə edəcək

Fransa Prezidenti Emmanuel Makron parlamentdə təmsil olunan partiyaların liderləri ilə görüşəcək.

Görüşdə Yaxın Şərq və Ukraynadakı böhranlar, eləcə də onların enerji bazarlarına təsiri müzakirə olunacaq.

Toplantı zamanı hərbi və kəşfiyyat rəsmilərinin iştirakçılara vəziyyətlə bağlı məlumat verməsi gözlənilir.

Fransa Prezidenti Emmanuel Makron Parisdə “Grand Palais”də keçirilən Beynəlxalq Kosmos Sammitində çıxış edir. Paris, Fransa, 10 sentyabr 2026-cı il.

Reuters

Rusiyanın dron hücumunda Tanzaniya bayraqlı gəminin kapitanı ölüb

Ukraynanın limanlarından birinə gedən Tanzaniya bayraqlı gəmi Rusiyanın dron hücumuna məruz qalıb. Ukraynanın İnfrastruktur Nazirliyi bildirib ki, hücum nəticəsində gəminin kapitanı ölüb, üç ekipaj üzvü yaralanıb.

Nazirliyin “Telegram”da yaydığı açıqlamaya görə, gəminin vəziyyəti ilə bağlı məlumatlar dəqiqləşdirilir.

Zelenski: “Ukrayna Rusiyanın neft emalı zavodunu vurub”

Ukrayna Prezidenti Volodimir Zelenski bildirib ki, Ukrayna qüvvələri gecə saatlarında Rusiyanın Yaroslavl şəhərindəki neft emalı zavoduna zərbə endirib.

Zərərin miqyası barədə ətraflı məlumat verilməyib.

Anton Kovalski Ukraynanın baş prokuroru vəzifəsini müvəqqəti icra edəcək

Ukrayna Prezidenti Volodimir Zelenski Anton Kovalskini ölkənin baş prokuror vəzifəsini müvəqqəti icra edən şəxs təyin edib.

Bu barədə prezident sərəncamında bildirilib.

Rusiya Ukraynada enerji obyektlərinə zərbələr endirib

Rusiya gecə saatlarında raket və dronlarla Ukraynanın Sumı və Odessa vilayətlərində enerji infrastrukturuna zərbələr endirib. Bunu Ukrayna Prezidenti Volodimir Zelenski bildirib.

“Yenə də mülki infrastruktur hədəfə alınıb. Səkkiz vilayətdə dağıntılar qeydə alınıb”, — Zelenski “X” platformasında yazıb.

Rusiyada neft emalı zavodunda yanğın söndürülüb

Ukraynanın dron hücumu Rusiyanın Yaroslavl şəhərindəki neft emalı zavoduna ziyan vurub və yanğına səbəb olub. Yaroslavl vilayətinin qubernatoru Mixail Yevrayev bildirib ki, yanğın sonradan söndürülüb.

Rusiya hakimiyyətinin neft emalı zavoduna zərbə endirildiyini təsdiqləməsi ABŞ Prezidenti Donald Trampın sentyabrın 14-də Rusiya və Ukrayna arasında enerji obyektlərinə hücumların dayandırılması ilə bağlı razılaşma əldə olunduğunu açıqlamasından sonra baş verib. Lakin nə Moskva, nə də Kiyev belə bir razılaşmanın əldə olunduğunu təsdiqləyib.

Rusiya rəsmisi: Ukraynanın PUA hücumu Yaroslavldakı neft emalı zavoduna ziyan vurub

Yaroslavl vilayətinin qubernatoru Mixail Yevrayev sentyabrın 17-də “Telegram”da bildirib ki, Ukraynanın pilotsuz uçuş aparatı (PUA) ilə hücumu Rusiyanın Yaroslavl şəhərindəki neft emalı zavoduna ziyan vurub.

Onun sözlərinə görə, zavodda baş verən yanğının söndürülməsi davam edir.

Fotolar: Ukraynaya dron hücumunun fəsadları

Sakinlər və yerli medianın məlumatına görə, gecə saatlarında Ukraynanın dron hücumu nəticəsində dağılan evin qalıqları təmizlənir. Ukraynanın Rusiya nəzarətində olan Donetsk vilayətinin Zolotarivka (Zolotaryovka) yaşayış məntəqəsi, 16 sentyabr 2026-cı il.

Reuters

Kişi sakinlər və yerli medianın məlumatına görə, gecə saatlarında Ukraynanın dron hücumu nəticəsində zədələnmiş evin qarşısından əl arabası ilə keçir. Ukraynanın Rusiya nəzarətində olan Donetsk vilayətinin Zolotarivka (Zolotaryovka) yaşayış məntəqəsi, 16 sentyabr 2026-cı il.

Reuters

Yanğınsöndürənlər Rusiyanın dron zərbəsinin endirildiyi ərazidə işləyirlər. Kiyev, Ukrayna, 16 sentyabr 2026-cı il.

Reuters

ABŞ Nümayəndələr Palatası Rusiya və İrana qarşı sanksiyalar haqqında qanun layihəsini qəbul edib

ABŞ Konqresinin Nümayəndələr Palatası Rusiya və İrana qarşı sanksiyalar haqqında qanun layihəsini 262 lehinə, 159 əleyhinə səslə qəbul edib. Sənəd imzalanmaq üçün ABŞ Prezidenti Donald Trampa göndərilib.

Qanun layihəsi ötən ay Senatda hər iki partiyanın geniş dəstəyi ilə 86 lehinə, 11 əleyhinə səslə qəbul olunub.

Sənəd birbaşa və ikinci dərəcəli sanksiyaların tətbiqini nəzərdə tutur. Məhdudiyyətlər Rusiya rəsmilərini, oliqarxları, onların ailə üzvlərini, xarici şəxsləri, eləcə də Rusiya banklarını və maliyyə qurumlarını əhatə edir.

Rusiya Kiyev və Odessaya zərbələr endirib

Sentyabrın 17-də səhər saatlarında Ukraynanın paytaxtı Kiyevdə partlayış səsləri eşidilib. Bu barədə Reuters-in hadisə yerində olan əməkdaşı məlumat verib.

Ukrayna rəsmilərinin məlumatına görə, Rusiyanın hava hücumları nəticəsində Kiyevdə 10, Odessada isə üç nəfər yaralanıb. Odessada 19 mərtəbəli yaşayış binasına zərbə dəyib. Kiyevdə isə qəlpələr binalara ziyan vurub və yanacaqdoldurma məntəqəsinin yaxınlığına düşüb.