canlı Aİ Ukraynaya raket və dronlar üçün 3,8 milyard dollar ayıracaq

Rusiya raketləri Kiyevi hədəf alıb, Odessaya iki dəfə zərbə endirilib

Rusiya sentyabrın 18-də Ukraynanın paytaxtı Kiyevə raket zərbələri endirib. Şəhərdə hava hücumundan müdafiə sistemləri işə salınıb. Paytaxtda partlayış səsləri eşidilib. İlkin məlumatlara görə, ölən və yaralanan olmayıb, dağıntı qeydə alınmayıb. Təxminən 40 dəqiqə sonra hava həyəcanı siqnalı ləğv edilib.

Ukraynanın cənubundakı liman şəhəri Odessada regional rəsmilər Rusiya qüvvələrinin şəhər mərkəzinə iki dəfə zərbə endirdiyini bildiriblər. İkinci zərbə fövqəladə hallar xidmətinin əməkdaşları ilk hücumun nəticələrini aradan qaldırarkən endirilib.

Odessa vilayətinin rəhbəri Oleq Kiper bildirib ki, azı 10 nəfər yaralanıb. Hücum nəticəsində inzibati binaya və bir neçə avtomobilə ziyan dəyib.

Hadisə yerində baş verən yanğının söndürülməsi üçün fövqəladə hallar xidmətinin əməkdaşları əraziyə cəlb olunublar.

Polşa Ukrayna ilə birlikdə ballistik raketlərə qarşı koalisiyaya qoşulub

Polşanın Baş naziri Donald Tusk ölkəsinin Ukrayna və digər Avropa tərəfdaşları ilə birlikdə regional ballistik raketlərə qarşı müdafiə koalisiyasına qoşulduğunu açıqlayıb.

Ukraynanın qərbində Karpat ölkələrinin sammitindən sonra çıxış edən Tusk bildirib ki, Polşanın təşəbbüsdə iştirak çərçivəsi razılaşdırılıb. Təşəbbüs hava və raket hücumundan müdafiə imkanlarının gücləndirilməsinə yönəlib.

Koalisiya ABŞ-nin “Patriot” sisteminə daha ucuz alternativ kimi birgə ballistik raketlərə qarşı müdafiə sisteminin yaradılması istiqamətində daha geniş səylərin bir hissəsi olaraq bu ilin əvvəlində yaradılıb.

Tusk, həmçinin Polşanın Ukrayna üçün yeni yardım paketi hazırladığını açıqlayıb. O, paketi “əhəmiyyətli” adlandırsa da, əlavə məlumat verməyib.

Ukrayna Prezidenti Volodimir Zelenski bu qərarı alqışlayaraq davamlı dəstəyə görə Varşavaya təşəkkür edib və Polşanı Rusiyanın təcavüzünə qarşı mübarizədə əsas tərəfdaş adlandırıb.

Rusiya Ukraynanın hərbi təchizatında istifadə olunan üç gəmini vurduğunu bildirib

Rusiya Müdafiə Nazirliyi qüvvələrinin sentyabrın 18-də Ukrayna limanlarında və Qara dənizdə iki yük gəmisini və bir tankeri vurduğunu bildirib.

Nazirliyin məlumatına görə, yük gəmilərindən biri Pivdennyi limanında, digəri Qara dənizdə, tanker isə Odessa limanında vurulub.

Rusiya gəmilərin Ukraynanın hərbi təchizatını dəstəkləmək üçün istifadə edildiyini iddia edib.

Bu iddialar müstəqil şəkildə təsdiqlənməyib. Ukrayna rəsmiləri məsələ ilə bağlı dərhal açıqlama verməyiblər.

BMT: Ukraynada qeydə alınan müharibə zorakılıqlarının 89 faizi Rusiya ilə əlaqələndirilir

BMT-nin insan hüquqları üzrə hesabatında Ukraynada 2022-ci ilin fevralından 2026-cı ilin iyulunadək münaqişə ilə əlaqəli 1 004 cinsi zorakılıq halının təsdiqləndiyi bildirilib.

Hesabata görə, sənədləşdirilmiş halların 89 faizi Rusiya qüvvələri və hakimiyyət orqanları, 11 faizi isə Ukrayna tərəfinin şəxsi heyəti ilə əlaqələndirilib.

BMT bildirib ki, bu cür halların kifayət qədər bildirilməməsi, işğal olunmuş ərazilərə və saxlanılan şəxslərə çıxışın məhdud olması səbəbindən faktiki sayın daha yüksək olduğu ehtimal edilir.

BMT-nin İnsan Hüquqları üzrə Ali Komissarı Volker Türk hesabatın nəticələrindən dərin narahatlıq keçirdiyini bildirib və bu cür pozuntuların hələ də davam edə biləcəyi barədə xəbərdarlıq edib.

İsveçrə hökuməti Rusiyada “Nestlé”yə nəzarətin ələ keçirilməsindən narahatdır

İsveçrə hökuməti sentyabrın 18-də bildirib ki, Kremlin siyasi səbəblərlə Rusiyada “Nestlé” şirkətinin fəaliyyətinə nəzarəti ələ keçirməsi ilə bağlı qərarından narahatdır. Hökumət qərarın ləğvi üçün çalışdığını qeyd edib.

İsveçrənin İqtisadi Məsələlər üzrə Dövlət Katibliyi (SECO) açıqlamasında bildirib ki, 17 sentyabr tarixli fərmanla “Nestlé”nin Rusiyadakı fəaliyyətinin məcburi idarəetməyə verilməsindən narahatdır.

SECO və İsveçrə Xarici İşlər Nazirliyi bir neçə həftədir məsələ ilə bağlı “Nestlé” ilə sıx əməkdaşlıq edir və şirkətə diplomatik kanallar vasitəsilə dəstək göstərir.

“İsveçrənin dəstəyinin məqsədi “Nestlé”nin öz mövqeyini Rusiya hakimiyyətinə çatdırmasına və məcburi idarəetmə qərarının ləğvinə nail olmaq üçün çalışmasına imkan yaratmaqdır”, — SECO bildirib.

BQXK: İki ildir ukraynalı hərbi əsirlərə çıxış yoxdur

Beynəlxalq Qızıl Xaç Komitəsi (BQXK) sentyabrın 18-də bildirib ki, iki ildir Rusiyada saxlanılan ukraynalı hərbi əsirlərlə görüşə icazə verilmir.

Minlərlə ukraynalı hərbi əsirin Rusiyadakı saxlanma mərkəzlərində olduğu güman edilir. BMT müstəntiqləri həmin müəssisələrdə sistemli işgəncələrə dair sübutlar toplayıblar.

Müharibənin ağır nəticələrini məhdudlaşdırmaq məqsədi daşıyan 1949-cu il Cenevrə Konvensiyalarına əsasən, İsveçrədə yerləşən BQXK hərbi əsirlərin saxlanma şəraitini, onlarla rəftarı, qida təminatını və tibbi xidmətə çıxışını yoxlamaq üçün onlara baş çəkə bilər.

Rusiya hərbi əsirlərə işgəncə verilməsi və ya onlarla başqa formada pis rəftar edilməsi ilə bağlı iddiaları rədd edir. Rusiyanın Cenevrədəki diplomatik nümayəndəliyi müvafiq sorğuya cavab verməyib.

“2024-cü ildən bəri Rusiyadakı hərbi əsirlərə çıxışımızın olmadığını təsdiqləyə bilərik”, — BQXK-nın sözçüsü bildirib. O əlavə edib ki, təşkilatın prezidenti Miryana Spolyariç ötən ay Rusiyaya səfəri zamanı bu məsələni qaldırıb.

Kreml: “Nestlé” və “Auchan”ın aktivlərinə “dost olmayan” ölkələrdən olduqları üçün əl qoyulub

Kreml bildirib ki, Rusiya qida nəhəngi “Nestlé” və supermarketlər şəbəkəsi “Auchan”ın aktivlərinə bu şirkətlərin “dost olmayan” ölkələrdən olması səbəbindən əl qoyub.

Kremlin sözçüsü Dmitri Peskov bildirib ki, bu tədbir müvəqqəti xarakter daşıyır və aktivlərlə bağlı başqa qərar qəbul edilməyib.

“Nestlé” İsveçrə, “Auchan” isə Fransa şirkətidir.

Rusiya Qara dənizdə Ukraynanın dörd yük gəmisini vurduğunu bildirib

Rusiyanın Müdafiə Nazirliyi Qara dənizdə Ukraynanın dörd quru yük gəmisini dronlarla vurduğunu bildirib. Nazirliyin açıqlamasına görə, məqsəd “Ukrayna Silahlı Qüvvələrinin logistika imkanlarını məhdudlaşdırmaq olub. Bu barədə Rusiyanın dövlət xəbər agentliyi RİA məlumat yayıb.

Son iki ayda Rusiya və Ukrayna dörd il yarımdır davam edən müharibə fonunda bir-birinin ticarət gəmilərinə hücumları artırıb.

Makron: “Fransa son həftələr Rusiyanın hibrid hücumları ilə təhdid olunub”

Fransa Prezidenti Emmanuel Makron bildirib ki, son həftələr ölkəsi Rusiyanın hibrid hücumları ilə təhdid olunub.

“Son həftələr avropalıların və Fransanın üzləşdiyi təhdidlər, xüsusilə Rusiyanın hibrid təhdidi güclənib”, — Makron Parisdə siyasi partiyaların liderləri ilə beynəlxalq vəziyyətdəki son hadisələri müzakirə etdikdən sonra jurnalistlərə bildirib.

Fransa Prezidenti Emmanuel Makron Fransanın cənubundakı Oranj şəhərində yerləşən Fransa ordusunun 115-ci aviabazasına səfər edir. 15 sentyabr 2026-cı il.

Reuters

Rusiya Odessa yaxınlığındakı limanda yük gəmisini vurduğunu bildirib

Rusiyanın Müdafiə Nazirliyi Ukraynanın Qara dəniz sahilində, Odessa yaxınlığındakı Pivdennyi dəniz limanında quru yük gəmisini vurduğunu bildirib. Bu barədə Rusiyanın “Interfax” agentliyi məlumat yayıb.

Nazirlik gəminin hərbi yük daşıdığını iddia edib. Reuters Rusiyanın bu iddiasını və gəminin hansı yükü daşıdığını müstəqil şəkildə təsdiqləyə bilmədiyini bildirib.

“Nestle” Rusiyadakı biznesi ilə bağlı bütün variantları nəzərdən keçirir

“Nestle” şirkəti Rusiyadakı biznesinin müvəqqəti idarəetməyə verilməsindən sonra hüquqlarını qorumaq üçün bütün variantları nəzərdən keçirdiyini bildirib. Qərar Rusiya Prezidenti Vladimir Putinin imzaladığı fərmanda əksini tapıb.

“Nescafe” qəhvəsi və “KitKat” şokoladlarının istehsalçısı vəziyyəti qiymətləndirdiyini açıqlayıb.

Şirkət hüquqlarını qorumaq və fəaliyyətinin davamlılığını təmin etmək üçün bütün zəruri addımları atacağını, xüsusilə əməkdaşlarının maraqlarını nəzərə alacağını bildirib.

Sürixdə səhər ticarətində şirkətin səhmləri 1,5 faiz ucuzlaşıb.

Fərman Fransanın “Auchan” supermarketlər şəbəkəsi də daxil olmaqla, bir neçə beynəlxalq şirkətin Rusiyadakı aktivlərinə şamil edilib.

Rusiya “Nestle” və “Auchan”ın aktivlərini müsadirə edib

“Bloomberg”in məlumatına görə, Rusiya ölkədə fəaliyyət göstərən bir sıra xarici şirkətlərin, o cümlədən “Nestle” və “Auchan”ın aktivlərini müvəqqəti idarəetməyə verib.

Hər iki şirkət 2022-ci ilin fevralında Ukraynada genişmiqyaslı müharibə başlayandan sonra Rusiya bazarında fəaliyyətini davam etdirib.

Rusiya Prezidenti Vladimir Putin  şirkətlərin Rusiyadakı aktivlərinin müvəqqəti idarəetməyə verilməsi ilə bağlı fərman imzalayıb.

“Nescafe” qəhvəsi supermarketdə satışda. Nyu-York, ABŞ, 3 sentyabr 2026-cı il.

Reuters

Rusiya Odessa yaxınlığındakı logistika mərkəzinə zərbə endirdiyini bildirib

Rusiya Müdafiə Nazirliyinin məlumatına görə, Rusiya dronları Odessa yaxınlığındakı “Nova Poşta” logistika mərkəzini, həmçinin yaxınlıqdakı Çornomorsk limanında yük gəmisini vurub.

Nazirlik bu barədə “Telegram”da məlumat yayıb.

Rusiyanın Kiyevə dron hücumu nəticəsində beş nəfər yaralanıb

Kiyev vilayətinin rəhbəri Timur Tkaçenko bildirib ki, Rusiyanın səhər saatlarında bölgəyə endirdiyi dron zərbəsi nəticəsində üçü uşaq olmaqla beş nəfər yaralanıb.

O, bu barədə “Telegram”da məlumat verib.

Tramp Polşada ABŞ ordusunun daimi bazasının yaradılması istiqamətində irəliləyiş olduğunu bildirib

ABŞ Prezidenti Donald Tramp Polşada ABŞ Ordusunun daimi bazasının yaradılması istiqamətində irəliləyiş olduğunu bildirib. O, bunu Polşa Prezidenti Karol Navrotskinin “qətiyyətli liderliyi” ilə əlaqələndirib.

“Bu baş tutarsa, bazanın yeri tezliklə açıqlanacaq. Bu, ABŞ–Polşa ittifaqı üçün tarixi addım olacaq”, — Tramp “Truth Social” platformasında yazıb.

Navrotski daha sonra “X” platformasında Trampa təşəkkür edib və Polşanın ABŞ ilə müdafiə sahəsində əməkdaşlığı gücləndirməyə hazır olduğunu bildirib.

“Polşa hökumətinin ABŞ hərbi bazası üçün ən uyğun yeri seçmək məqsədilə əlindən gələni edəcəyinə əmin ola bilərsiniz”, — Navrotski qeyd edib.

Aİ Ukraynaya əlavə 3,3 milyard avro ayıracaq

Avropa Komissiyasının Prezidenti Ursula fon der Lyayen Aİ-nin Ukraynaya əlavə 3,3 milyard avro (3,8 milyard dollar) ayıracağını bildirib. O, bunu Ukrayna Prezidenti Volodimir Zelenski ilə telefon danışığından sonra açıqlayıb.

Fon der Lyayenin sözlərinə görə, vəsait Rusiyanın Kiyevə hücumlarını davam etdirdiyi bir vaxtda ayrılır.

“Rusiya Kiyevə davamlı hücum edir və sakinlərin gündəlik həyatını mümkünsüz etməyə çalışır. Biz onların və bütün ukraynalıların yanındayıq”, — o deyib.

Bu məbləğ Aİ-nin Ukraynaya Dəstək Krediti çərçivəsində ölkənin müdafiəsi üçün bu il ayırdığı 28,3 milyard avronun (32,5 milyard dollar) bir hissəsidir.

• Ursula fon der Lyayen illik çıxışında Aİ-nin prioritetlərini açıqlayacaq