Kiyev vilayətinə dron hücumunda üç uşaq və bir qadın həlak olub

Zelenski: “Xersonda monastıra dron hücumunda bir ruhani ölüb”

Ukrayna Prezidenti Volodimir Zelenski “X” platformasındakı paylaşımında bildirib ki, Rusiyanın Xerson vilayətində kişi monastırına dron hücumu nəticəsində bir ruhani həlak olub, daha dörd nəfər yaralanıb. Hücum sentyabrın 19-da baş verib. “Anadolu” həmin şəxsin rahib olduğunu yazır.

Zelenski həmçinin bildirib ki, Rusiya bu həftə Ukraynaya qarşı 2 mindən çox zərbə dronu, 1 700 idarəolunan aviabomba və 19 raketdən istifadə edib. O, Ukraynanın tərəfdaşlarını Rusiyaya qarşı yeni sanksiyalar tətbiq etməyə çağırıb.

Ukrayna Moskva vilayətində neft emalı zavodunu vurduğunu bildirib

Ukrayna Prezidenti Volodimir Zelenski bildirib ki, ölkə ordusu gecə saatlarında Rusiyanın Moskva vilayətində yerləşən neft emalı zavoduna zərbə endirib.

Zelenskinin sözlərinə görə, hücum zamanı “Rusiyanın neft sənayesinin əsas obyektlərindən biri”, eləcə də logistika obyekti vurulub. O bildirib ki, bu obyektlər Rusiyanın müharibəni maliyyələşdirməsinə gəlir gətirir.

Xerson vilayətində mülki avtobus dronla vurulub

Rusiyanın Mərkəzi Seçki Komissiyasının sədri Ella Pamfilova bildirib ki, Xerson vilayətinin Rusiyanın nəzarətində olan hissəsində mülki avtobusa dron hücumu nəticəsində iki nəfər, o cümlədən seçki komissiyasının əməkdaşı həlak olub.

Hadisə Rusiyada üç gün davam edən parlament seçkilərinin sonuncu günü qeydə alınıb. Səsvermə sentyabrın 18-dən 20-dək keçirilir.

Rusiya dronu Kiyev vilayətində bir ailənin üç üzvünü öldürüb

Ukraynanın Fövqəladə Hallar Xidmətinin məlumatına görə, Rusiyanın gecə saatlarında Kiyev vilayətinə dron hücumu nəticəsində bir qadın və onun iki azyaşlı uşağı həlak olub. Zərbə fərdi yaşayış evinə dəyib.

Kiyev vilayətinin rəhbəri Tymur Tkaçenko bildirib ki, başqa rayonda baş verən ayrıca dron hücumu nəticəsində yaralanan bir qız da xəstəxanada vəfat edib.

Tkaçenkonun sözlərinə görə, vilayət bir sutkadan çox davam edən hücumlara məruz qalıb. Beş rayonda ümumilikdə 31 obyektə ziyan dəyib.

Ən çox ziyan vilayətin cənub-qərbində yerləşən Fastiv rayonunda qeydə alınıb. Burada yaşayış evləri, sənaye və kommunal təsərrüfat obyektləri, kənd təsərrüfatı müəssisəsinin ərazisi və avtomobillər də daxil olmaqla 24 obyekt zədələnib.

Son həftələr Rusiya Kiyev şəhərinə və Kiyev vilayətinə dronlarla mütəmadi hücumlar edir.

Rəsmilərin Ukrayna dron hücumu adlandırdığı zərbədən sonra neft emalı zavodundan tüstü qalxır. Moskva, Rusiya, 20 sentyabr 2026-cı il.

Reuters

Moskva vilayətində PUA hücumlarında iki nəfər ölüb

Moskva vilayətinə Ukrayna PUA-larının hücumları nəticəsində iki nəfər ölüb. Rəsmilər bildiriblər ki, bir neçə PUA Rusiya paytaxtındakı neft emalı zavodunun ərazisinə çatıb.

Moskva meri Sergey Sobyanin bildirib ki, Rusiya sentyabrın 19-dan bəri 1 600-dən çox Ukrayna PUA-sını vurub. Onlardan 450-si Moskvaya doğru hərəkət edib.

Moskva vilayətinin Ramenskoye şəhərində 21 mərtəbəli yaşayış binasından, 70-i uşaq olmaqla, 400 nəfər təxliyə edilib. Ərazidə bir neçə evə də ziyan dəyib.

Sobyanin hücumun Rusiyada sentyabrın 20-də başa çatan parlament seçkilərini pozmaq məqsədi daşıdığını bildirib.

Moskvadakı neft emalı zavodunun obyekti PUA hücumunda zədələnib

Rusiyanın TASS dövlət agentliyi Moskva meri Sergey Sobyaninə istinadən bildirib ki, paytaxta PUA hücumu nəticəsində Moskva Neft Emalı Zavodunun obyektlərindən biri zədələnib.

Hadisə nəticəsində ölən və yaralanan olmayıb.

Fitso: “Qərbdə bəziləri Rusiya ilə NATO arasında münaqişə istəyir”

Slovakiyanın Baş naziri Robert Fitso sentyabrın 19-da bildirib ki, Qərbdə bəzi siyasətçilər Rusiyanı Şərqi Avropadakı müharibədə məğlub etmək strategiyasının uğursuzluğundan sonra NATO ilə Rusiya arasında münaqişə yaratmağa çalışırlar.

Rusiya ilə yaxın münasibətləri qoruyan və Ukraynaya hərbi yardım göstərilməsinin əleyhinə olan Fitso bu həftə Avropanın Rusiya–Ukrayna müharibəsinin genişmiqyaslı münaqişəyə çevrilməsi təhlükəsinə əvvəlkindən daha yaxın olduğunu bildirib.

Eyni zamanda, Fransa və Polşa da daxil olmaqla, bəzi Avropa ölkələrinin liderləri Rusiyanın hibrid hücumları ilə bağlı xəbərdarlıq ediblər.

O, videomüraciətində Ukraynaya göstərilən dəstəyin nəticə vermədiyini iddia edərək, Qərbin bununla alovu daha da körüklədiyini bildirib.

“Biz ölümcül təhlükə ilə üz-üzəyik”, — Baş nazir deyib.

Fitso Rusiya–Ukrayna müharibəsinin nə Slovakiyanın, nə də NATO-nun müharibəsi olduğunu deyib.

“NATO daxilində bəzi müharibə tərəfdarları nəyin bahasına olursa-olsun, bu müharibəni Rusiya ilə NATO arasında münaqişəyə çevirməyə çalışırlar”, — o bildirib.