Rusiyanın Sumıya hücumunda bir qadın həlak olub

Papanın xüsusi nümayəndəsi kardinal Zuppi Rusiyaya səfər edəcək

Roma Papasının xüsusi nümayəndəsi kardinal Matteo Zuppinin sentyabrın sonunda Rusiyaya səfər edəcəyi gözlənilir. Bu barədə Rusiyanın RİA xəbər agentliyi sentyabrın 21-də Zuppiyə istinadən məlumat yayıb.

Səfər zamanı Ukrayna müharibəsi ilə bağlı humanitar məsələlərin müzakirə olunacağı gözlənilir.

Rusiya Prezidentinin xarici siyasət üzrə köməkçisi Yuri Uşakov daha əvvəl bildirib ki, Zuppi ilə Ukrayna ilə bağlı humanitar məsələləri müzakirə edəcək.

İtaliya Yepiskoplar Konfransının sədri olan Zuppi sonuncu dəfə 2024-cü ilin oktyabrında Moskvaya səfər edib. Həmin vaxt ailələrin birləşdirilməsi, hərbi əsirlərin mübadiləsi və Ukrayna müharibəsinin başa çatdırılması üçün dialoq imkanları müzakirə olunub.

Fransa Rusiyada parlament seçkilərinin azad və ədalətli olmadığını bildirib

Fransa Rusiyada keçirilən parlament seçkilərini tənqid edərək səsvermənin azad və ədalətli seçki standartlarına cavab vermədiyini bildirib.

Fransa Xarici İşlər Nazirliyi sentyabrın 21-də yaydığı açıqlamada vətəndaş cəmiyyətinə və müxalifət qruplarına təzyiqlərin, ifadə azadlığına qoyulan məhdudiyyətlərin və bəzi siyasi partiyaların seçkilərdən kənarlaşdırılmasının seçicilərin sərbəst siyasi seçim etmək imkanlarını məhdudlaşdırdığını bildirib.

Paris həmçinin Rusiyanın işğalı altında olan Ukrayna ərazilərində səsvermənin təşkilini pisləyib və bunu beynəlxalq hüququn növbəti pozuntusu adlandırıb.

Rusiya Qara dənizdə gəmiçiliyin təhlükəsizliyi ilə bağlı Türkiyə ilə koordinasiya apardığını bildirir

Rusiya Xarici İşlər Nazirliyinin sözçüsü Mariya Zaxarova bildirib ki, Moskva Qara dənizdə gəmiçiliyin təhlükəsizliyi ilə bağlı Türkiyə ilə sıx təmasdadır.

Zaxarova sentyabrın 21-də bildirib ki, Moskva bu məsələ ilə bağlı Ankara ilə təmasları davam etdirir. Bundan əvvəl Türkiyənin xarici işlər naziri Hakan Fidan Ankaranın Qara dənizdə hücumların dayandırılmasına yönəlmiş təklifini Rusiya və Ukraynaya təqdim etdiyini və tərəflərdən cavab gözlədiyini açıqlayıb.

BMT eksperti: “Rusiya 2022-ci ildən sonra xaricdə tənqidçilərə təzyiqi artırıb”

BMT-nin insan hüquqları üzrə eksperti Rusiyanı 2022-ci ildə Ukraynaya qarşı genişmiqyaslı müharibənin başlamasından sonra xaricdəki tənqidçiləri izləmək, qorxutmaq və onlara təzyiq göstərmək cəhdlərini xeyli artırmaqda ittiham edib.

BMT İnsan Hüquqları Şurasına hesabat təqdim edən Rusiyada insan hüquqlarının vəziyyəti üzrə xüsusi məruzəçi Mariana Katsarova bildirib ki, onun “transmilli repressiya” adlandırdığı halların sayı son illərdə kəskin artıb.

Hesabatda bildirilir ki, Rusiya hakimiyyəti xaricdəki tənqidçilərə qarşı izləmə, hədə-qorxu, hüquqi təzyiq və maliyyə məhdudiyyətləri də daxil olmaqla müxtəlif vasitələrdən istifadə edib. Bəzi hallarda hücum cəhdlərinin də qeydə alındığı qeyd olunur.

Hesabata görə, müharibə əleyhinə fəallar, jurnalistlər və vətəndaş cəmiyyətinin nümayəndələri təzyiqə məruz qalanlar arasında olub. Belə halların Avropa, Cənubi Qafqaz və Mərkəzi Asiyada qeydə alındığı bildirilir.

Hesabatda həmçinin Rusiya hakimiyyətinin maliyyə nəzarəti, beynəlxalq həbs tələbləri, eləcə də digər inzibati və rəqəmsal təzyiq vasitələrindən getdikcə daha çox istifadə etdiyi bildirilir.

Tramp: “Rusiya dizel sənayesinə nəzarəti itirib”

ABŞ Prezidenti Donald Tramp Rusiyanın dizel sənayesinə nəzarəti itirdiyini bildirib. O, Rusiya neft emalı zavodlarına edilən hücumların ölkədə yanacaq istehsalına ciddi təsir göstərdiyini deyib.

Tramp sentyabrın 21-də sosial şəbəkədə yazıb ki, Ukrayna ilə müharibə fonunda Rusiyada dizel istehsal edən çoxsaylı neft emalı zavodları zədələnib və ən azı müvəqqəti olaraq fəaliyyətini dayandırıb. Ağ Ev rəhbəri müharibənin dayandırılmasına yenidən çağırıb və münaqişənin mənasız olduğunu bildirib. 

Tramp bu açıqlamanı Ukrayna Prezidenti Volodimir Zelenski ilə BMT Baş Assambleyası çərçivəsində planlaşdırılan görüşdən bir gün əvvəl verib.

Tramp Zelenskidən Rusiya neft emalı zavodlarına zərbələri dayandırmağı istəyib

ABŞ Prezidenti Donald Tramp ukraynalı həmkarı Volodimir Zelenskidən Rusiyanın neft emalı zavodlarına zərbələri dayandırmağı istəyib.

“Financial Times” sentyabrın 21-də telefon danışığının məzmunu ilə tanış mənbələrə istinadən yazıb ki, Tramp bu hücumların qlobal dizel qıtlığını dərinləşdirməsindən və yanacağın qiymətini artırmasından narahatdır.

Kreml: ABŞ-nin Rusiyaya qarşı yeni sanksiyaları müharibənin başa çatmasına kömək etməyəcək

Kremlin sözçüsü Dmitri Peskov bildirib ki, ABŞ Prezidenti Donald Trampın Rusiyaya qarşı genişmiqyaslı sanksiyalar nəzərdə tutan qanunu imzalaması ABŞ–Rusiya münasibətlərinin bərpasına və Ukraynada müharibəyə son qoyulması üçün sülh nizamlanması istiqamətində irəliləyişə kömək etməyəcək.

Kreml: Ukraynanın cənubundakı şəhərdə ərzaq və dərman təchizatında problemlər var

Kremlin sözçüsü Dmitri Peskov bildirib ki, Ukraynanın Rusiyanın nəzarətində olan Oleşki şəhərində  ərzaq və dərman təchizatında problemlər yaşanır.

Xerson vilayətinin Oleşki şəhəri müharibənin ilk günlərindən Rusiyanın işğalı altındadır.

Müharibədən əvvəl şəhərdə təxminən 24 min nəfər yaşayırdı.

Ukraynanın ixrac itkiləri ilin sonunadək 4,8 milyard dollara çata bilər

Ukraynanın limanlarına və digər kritik infrastruktur obyektlərinə Rusiyanın hücumları nəticəsində yaranan ixrac itkiləri ilin sonunadək 4,8 milyard dollara çata bilər. Bu barədə Ukraynanın Maliyyə Nazirliyi məlumat yayıb.

Nazirlik əlavə edib ki, yalnız iyul ayında bu itkilərin təxminən 800 milyon dollar olduğu qiymətləndirilir.

Rusiya dronu Ukraynanın Poltava vilayətində kritik infrastruktur obyektini vurub

Ukraynanın mərkəzində yerləşən Poltava vilayətinin qubernatoru Vitali Dyakivniç sentyabrın 21-də bildirib ki, Rusiya dronu vilayətdə infrastruktur obyektinə zərbə endirib.

Onun “Telegram” paylaşımına görə, hücum nəticəsində yanğın baş verib. Xəsarət alanlar barədə məlumat yoxdur.

Rusiyanın qərbində Ukraynanın dron hücumu nəticəsində bir nəfər ölüb

Rusiyanın Ukrayna ilə həmsərhəd Bryansk vilayətinə Ukraynanın dron hücumu nəticəsində bir kişi ölüb, üç nəfər yaralanıb. Bu barədə vilayətin qubernatoru vəzifəsini icra edən Yeqor Kovalçuk sentyabrın 21-də Rusiyanın “MAX” tətbiqində paylaşdığı açıqlamada bildirib.

Rusiya Ukraynada yük gəmisinə, logistika mərkəzlərinə və anbarlara zərbələr endirib

Rusiyanın “Interfax” xəbər agentliyinin məlumatına görə, Rusiya qüvvələri gecə saatlarında Ukraynanın Qara dəniz sahilindəki Odessa liman şəhərində yük gəmisinə zərbə endiriblər.

Rusiyanın TASS xəbər agentliyi isə Ukraynanın müxtəlif ərazilərində logistika mərkəzləri və anbarların da vurulduğunu bildirib.

Rusiyanın Sumıya hücumunda bir qadın həlak olub

Yanğınsöndürən Sumıya endirilən zərbədən sonra baş verən yanğını söndürür. Ukrayna, 21 sentyabr 2026-cı il.

Ukraine's State Emergency Service

Ukraynanın Dövlət Fövqəladə Hallar Xidmətinin məlumatına görə, Rusiyanın Sumı şəhərinə endirdiyi zərbələr nəticəsində bir qadın həlak olub, bir kişi yaralanıb. Bölgədə təhsil müəssisəsinin binasına da ziyan dəyib.