İŞİD-ə üzv olmaqda şübhəli bilinən fransalılar İraqda edam cəzası ilə üzləşə bilərlər

Fransanın İŞİD üzvü olmaqda şübhəli bilinən altı vətəndaşının İraqda məhkəməsi başlayıb. Onlar edam cəzasına məhkum edilə bilərlər.

İraqın Ali Məhkəmə Şurasının üzvü bu barədə sentyabrın 20-də Bağdadda keçirilən məhkəmə iclasında məlumat verib.

Altı kişi İraqa və ölkə əhalisinə qarşı cinayətlər törətməkdə ittiham olunur. Onlar İraqın terrorla mübarizə qanunu əsasında mühakimə edilirlər.

Məhkəmə mənbələrinin məlumatına görə, təqsirləndirilən şəxslər ötən il Suriyanın şimal-şərqindəki həbsxanalardan İraqa köçürülən 47 fransalı arasında olublar. Köçürülmə prosesinə İraq hakimiyyəti və ABŞ qüvvələri nəzarət edib.

İraq təhlükəsizlik qüvvələrinin avtomobilləri Fransanın altı vətəndaşının mühakimə olunduğu məhkəmə binasının qarşısında dayanıb. Bağdad, İraq, 20 sentyabr 2026-cı il.

Reuters

Hakim müdafiə tərəfinə iş materiallarını araşdırmaq üçün əlavə vaxt verib. Məhkəmə iclası oktyabrın 5-dək təxirə salınıb.

Təqsirləndirilən şəxslərdən birini təmsil edən, məhkəmənin təyin etdiyi vəkil Abbas əl-Maliki bildirib ki, müvəkkilinə yalnız İŞİD-ə üzv olmaq ittihamı irəli sürülüb.

Fransa səfirliyinin nümayəndələri məhkəmə iclasında iştirak ediblər. Səfirlik məsələ ilə bağlı sorğuya dərhal cavab verməyib.

İŞİD-ə üzv olmaqda şübhəli bilinən xaricilərin məhkəmələri

İraq məhkəmələri bundan əvvəl də İŞİD üzvü olmaqda şübhəli bilinən çoxsaylı xarici vətəndaşların işlərinə baxıb.

Kürd qüvvələrinin saxladığı şəxsləri İraqa təhvil verməyə başlamasından sonra Bağdad məhkəmələri yüzlərlə xarici vətəndaşı mühakimə edib. Onlara uzunmüddətli həbsdən edam cəzasınadək müxtəlif hökmlər verilib.

İraqın xarici işlər naziri Fuad Hüseyn fevralda bildirib ki, Bağdad saxlanılan xarici vətəndaşların öz ölkələrinə qaytarılması ilə bağlı danışıqlar aparır. İraq saxlanılan xarici vətəndaşların sayının artması ilə əlaqədar beynəlxalq maliyyə yardımı da istəyib

İŞİD 2014-cü ildən İraq və Suriyanın böyük ərazilərinə nəzarət edib. ABŞ-nin rəhbərlik etdiyi koalisiya beş il sonra qruplaşmanı həmin ərazilərdən çıxarıb. İŞİD ərazi nəzarətini itirsə də, qruplaşmanın qalıqları hər iki ölkədə fəaliyyətini davam etdirir.

• İraq qərbdəki məhdud hava məkanını mülki aviasiyaya açıb
• İraq və Türkiyə neft ixracına dair birillik saziş imzalayıb

Kopyalandı