Bakı 10-cu dəfə Formula 1 yarışına hazırlaşır

Bakı 10-cu dəfə Formula 1 yarışına hazırlaşır. Şəhərin küçələri yenidən ən çətin yarış traslarından birinə çevriləcək.

Yarış yolunun ən çətin hissələrindən biri İçərişəhərin qala divarları boyunca uzanan 8-ci döngədir. Eni cəmi 7,6 metr olan bu hissə Formula 1 təqviminə daxil olan traslar arasında ən dar keçiddir. Yüksək sürətdə burada ən kiçik səhv belə ciddi nəticələrə səbəb ola bilər.

Müvəqqəti yarış trasının qurulması geniş logistik hazırlıq tələb edir. Yarış infrastrukturunun quraşdırılması və sökülməsinə 1 400-dən çox yerli mühəndis, texnik və logistika işçisi cəlb olunub.

Bakı Şəhər Halqası Əməliyyat Şirkətinin məkanın hazırlanması departamentinin meneceri Sübhan Manafzadənin sözlərinə görə, yerli komandalar hazırlıq müddətini xeyli qısaldıblar. Tribunaların quraşdırılması 12 həftə, yarış trasının hazırlanması isə təxminən beş həftə çəkir.

Yarışın miqyası da genişlənib. Son üç ildə dörd yeni tribuna quraşdırılıb və tamaşaçı yerlərinin sayı 6 mindən çox artırılıb. Bu il yeni tribunanın əlavə edilməsi ilə tamaşaçı yerlərinin ümumi sayı 21 mini ötüb.

Yarış trası boyunca yerləşən kafe və digər müəssisələr də xarici qonaqların gəlişinə hazırlaşır. Burada Formula 1 mövzusunda tədbirlərin keçirilməsi və yarışların canlı yayımlanması planlaşdırılır. Qonaqlara Azərbaycan mədəniyyəti, milli sənətkarlıq nümunələri və yerli brendlər də təqdim olunacaq.

Prezident İlham Əliyevin imzaladığı sərəncama əsasən, nəzərdə tutulan sənədlərdən birini təqdim edən əcnəbilər və vətəndaşlığı olmayan şəxslər avqustun 25-dən sentyabrın 30-dək Azərbaycanın beynəlxalq hava limanlarında viza ala bilərlər.

Bakıda Formula 1 yarışlarının ilk dəfə keçirilməsindən 10 il ötür. Bu müddətdə yerli mütəxəssislərin təcrübəsi artıb, yarışın turizmə və yerli biznesə təsiri güclənib.

2026-cı il Formula 1 Azərbaycan Qran-prisi sentyabrın 24–26-da Bakı Şəhər Halqasında keçiriləcək.

Teqlər

formula 1 Azərbaycan Qran-prisi Bakı Bakı Şəhər Halqası Azərbaycan İçərişəhər Sübhan Manafzadə turizm