22:11
Qlobal turizm yenidən formalaşır: Bu, Azərbaycan üçün nə deməkdir?
Turizm ənənəvi olaraq iqtisadiyyatın qeyri-sabitliyə ən həssas sahələrindən biridir.
BCM keçmiş “Seleka” komandirini insanlıq əleyhinə cinayətlərdə təqsirli bilib
Keçmiş “Seleka” komandiri olduğu iddia edilən Mahamat Səid Əbdül Kani BCM-də işi üzrə hökmün elan olunmasında iştirak edir. Haaqa, Niderland, 23 sentyabr 2026-cı il.
Reuters
23 sentyabr 2026, 20:29
Beynəlxalq Cinayət Məhkəməsi (BCM) Mərkəzi Afrika Respublikasındakı “Seleka” silahlı qruplaşmasının keçmiş liderlərindən Mahamat Said Abdel Kanini insanlıq əleyhinə cinayətlərdə təqsirli bilib.
Məhkəmə onun Mərkəzi Afrika Respublikasının keçmiş Prezidenti Fransua Bozizenin tərəfdarı olmaqda şübhəli bilinən şəxslərə işgəncə verdiyini və onları təqib etdiyini müəyyənləşdirib.
Keçmiş “Seleka” komandiri olduğu iddia edilən Mahamat Səid Əbdül Kani Beynəlxalq Cinayət Məhkəməsində işi üzrə hökmün elan edilməsində iştirak edir. Haaqa, Niderland, 23 sentyabr 2026-cı il.
Reuters
Məhkəmə Mahamat Səid Əbdül Kanini təqib və işgəncə də daxil olmaqla dörd ittiham üzrə təqsirli bilib. Prokurorların məlumatına görə, o, paytaxt Bangidə o vaxtkı prezident Fransua Bozizenin tərəfdarı hesab edilən şəxslərin saxlanıldığı, döyüldüyü və işgəncəyə məruz qaldığı mərkəzə nəzarət edib.
Məhkəmə kollegiyasına sədrlik edən hakim Miatta Mariya Samba bildirib ki, Said və digərləri Bozize tərəfdarı hesab edilən şəxsləri hədəf almaq planı çərçivəsində məhbusların döyülməsinə və işgəncəyə məruz qalmasına nəzarət ediblər.
Bütün ittihamları rədd edən Səid hökm oxunarkən ciddi reaksiya verməyib. Onun cəzası ayrıca keçiriləcək məhkəmə iclasında müəyyən ediləcək.
BCM-in təqsirli bildiyi ilk “Seleka” üzvü
Əsasən müsəlmanlardan ibarət üsyançı koalisiya olan “Seleka” 2013-cü ildə hakimiyyəti ələ keçirərək Mərkəzi Afrika Respublikasının prezidenti Fransua Bozizeni vəzifədən uzaqlaşdırıb.
Bundan sonra əsasən xristianlardan ibarət “anti-Balaka” silahlı qruplaşmaları meydana çıxıb və ölkədə zorakılıq daha da artıb.
Keçmiş “Seleka” döyüşçüsü azadlığa buraxılacaq keçmiş uşaq əsgərlərin yanında dayanır. Bambari, Mərkəzi Afrika Respublikası, 14 may 2015-ci il.
Reuters
Beynəlxalq Cinayət Məhkəməsi 2014-cü ildən Mərkəzi Afrika Respublikasında törədilən cinayətləri araşdırır. Məhkəmə daha əvvəl “anti-Balaka” qruplaşmasının iki liderini təqsirli bilib. Səid isə BCM-in təqsirli bildiyi ilk keçmiş “Seleka” üzvüdür.
Hakimlər Səidə qarşı irəli sürülən bir sıra müharibə cinayətləri ittihamlarını rədd ediblər. Məhkəmə həmin cinayətlərin törədildiyi iddia olunan vaxt silahlı münaqişənin artıq başa çatdığı qənaətinə gəlib.
Bu mövzu haqqında fikriniz nədir?
İlk şərhi siz yazın