Avstraliya “OpenAI” agentinin “Medicare” portalına girişini araşdırır

Avstraliya hökuməti bildirib ki, “OpenAI”ın süni intellekt sistemi iyunda səhiyyə xərcləri barədə məlumat axtararkən dövlətin “Medicare” statistika portalına icazəsiz daxil olub. Hökumət hadisəni araşdırmaq üçün xüsusi qrup yaradıb.

Müdafiə naziri Riçard Marlsın sözlərinə görə, portalda ümumi səhiyyə statistikası yerləşdirilib, pasiyentlərin şəxsi tibbi məlumatları və bank rekvizitləri saxlanılmayıb. “OpenAI” da pasiyent məlumatlarına girişə dair sübut tapmadığını bildirib.

Baş nazir Entoni Albaniz deyib ki, sistem giriş məhdudiyyətləri ilə qarşılaşsa da, onları keçə bilib. Onun sözlərinə görə, daha geniş dövlət şəbəkəsinə müdaxilə edildiyinə dair sübut yoxdur. Albaniz “OpenAI”ın iyunda baş vermiş hadisə barədə hökumətə yalnız sentyabrın 10-da məlumat verməsini tənqid edib.

Araşdırma qrupu təhlükəsizlik sistemlərinin bu fəaliyyəti niyə vaxtında aşkar etmədiyini və digər dövlət saytlarına da giriş olub-olmadığını yoxlayır.

Kembric Universitetinin tədqiqatçısı Moris Çiodo hadisəni ciddi təhlükə kimi qiymətləndirib. O bildirib ki, hökumətlər kompüter sistemlərinə icazəsiz girişlə bağlı mövcud qanunları tətbiq etməli və süni intellekt üçün yeni qaydalar hazırlamalıdırlar.

Teqlər

OpenAI Avstraliya süni intellekt icazəsiz giriş Riçard Marls texnologiya Kembric Universiteti səhiyyə statistikası rəqəmsal təhlükəsizlik