ABŞ Senatı İranla müharibənin dayandırılmasına dair qətnaməni rədd edib

ABŞ Senatı Prezident Donald Trampdan İranla müharibəni dayandırmağı və ya bunun üçün Konqresdən icazə almağı tələb edən qətnaməni cüzi səs fərqi ilə rədd edib. 

Demokratlar noyabrda keçiriləcək aralıq seçkilər ərəfəsində ictimai dəstəyin getdikcə azaldığı müharibə ilə bağlı respublikaçıların mövqeyini ortaya qoymağa çalışıblar. Qətnamə səs çoxluğu ilə rədd edilib. Səsvermədə senatorlar əsasən partiyalarının mövqeyinə uyğun səs veriblər. Dörd respublikaçı senator — Men ştatından Syuzan Kollins, Kentukki ştatından Rend Pol, Şimali Karolina ştatından Tom Tillis və Alyaska ştatından Liza Murkovski qətnamənin lehinə səs verib.

Pensilvaniya ştatından demokrat senator Con Fetterman isə iyulda Nümayəndələr Palatasında 50/49 səslə qəbul edilmiş qətnamənin əleyhinə səs verib.

Səsvermə əsasən simvolik xarakter daşıyıb

Tramp administrasiyası müharibə səlahiyyətləri ilə bağlı əvvəlki səsvermələrdən sonra siyasətini dəyişmədiyi üçün bu səsvermə də əsasən simvolik xarakter daşıyıb.

Səsvermə Trampın BMT Baş Assambleyasındakı çıxışında İranla razılaşma əldə olunmayacağı təqdirdə İranı məhv edə biləcəyi barədə hədəsindən iki gün sonra keçirilib.

ABŞ Konstitusiyasına görə, müharibə elan etmək səlahiyyəti prezidentə deyil, Konqresə məxsusdur. Demokratlar Trampın aydın strategiya təqdim etmədən ABŞ-ni uzunmüddətli münaqişəyə cəlb edə biləcəyini bildirirlər.

Respublikaçılar isə Trampın addımlarının ali baş komandan kimi səlahiyyətləri çərçivəsində olduğunu deyirlər.

Müharibə noyabrın 3-də keçiriləcək aralıq seçkilər ərəfəsində siyasi müzakirələrin əsas mövzularından birinə çevrilib. Münaqişə yanacaq və ərzaq qiymətlərinin artmasına təsir göstərib.

Bu həftə keçirilən Reuters/Ipsos sorğusuna əsasən, respondentlərin 34 faizi ABŞ-nin İrana zərbələrini dəstəkləyib.

Bəzi respublikaçılar Trampdan fərqli mövqe tutublar

Az sayda respublikaçı müharibə məsələsində Trampdan fərqli mövqe nümayiş etdirib.

ABŞ Konqresinin aşağı palatası olan Nümayəndələr Palatasında ötən həftə yeddi respublikaçı demokratlara qoşularaq müharibə səlahiyyətləri ilə bağlı qətnamənin lehinə səs verib. Onlardan üçü — Ayova ştatından Zak Nann və Mariannet Miller-Miks, həmçinin Cənubi Karolina ştatından Nensi Meys bu məsələdə ilk dəfə partiya rəhbərliyindən fərqli mövqe tutaraq səs veriblər.

Nann və Miller-Miks noyabrda gərgin rəqabətin gözlənildiyi seçki dairələrində yenidən seçilmək uğrunda mübarizə aparırlar. Həmin seçkilərdə Nümayəndələr Palatasındakı 435 yerin hamısı və Senatdakı 100 yerdən 35-i uğrunda səsvermə keçiriləcək. Meys isə Cənubi Karolina qubernatoru seçkilərində uğursuz kampaniyadan sonra Konqresə yenidən namizədliyini irəli sürmür.

Senata respublikaçı namizədlər Mayk Rocers və Eşli Hinson da bazar ertəsi müharibənin tezliklə dayandırılmasına çağırıblar. Hər ikisi daha əvvəl Trampın İrana zərbələr endirmək səlahiyyətini dəstəkləmişdi.

Müharibə səlahiyyətləri ilə bağlı səsvermələr

ABŞ və İsrail qüvvələrinin fevralın 28-də İrana zərbələr endirməyə başlamasından bəri Senatda İranla bağlı müharibə səlahiyyətlərinə dair 14 səsvermə keçirilib. Onlardan yalnız ikisində müharibənin dayandırılması ilə bağlı qətnamələr dəstəklənib. Nümayəndələr Palatasında isə altı belə səsvermə keçirilib və üçündə münaqişənin dayandırılması dəstəklənib.

Yalnız bir qətnamə Konqresin hər iki palatasında qəbul edilib, lakin Ağ Ev bununla bağlı addım atmayıb.

Nümayəndələr Palatasında demokratların lideri Hakim Ceffris bildirib ki, gərgin rəqabətin olduğu seçki dairələrində mübarizə aparan respublikaçılar müharibəyə dəstəkdən getdikcə uzaqlaşırlar. 

“Maraqlıdır ki, gərgin seçki mübarizəsi aparan və məğlubiyyət riski ilə üzləşənlərdən bir neçəsi, o cümlədən Ayova, Miçiqan və Viskonsin kimi ştatlarda olanlar indi müharibənin dayandırılmalı olduğunu deməyə başlayıblar”, — Ceffris jurnalistlərə bildirib.

• İranla ABŞ arasında müharibə və Hörmüz boğazına dair fikir ayrılıqları fonunda neft ucuzlaşır

• İran Nyu-Yorkda ABŞ ilə dolayı danışıqlar apardığını təsdiqləyib

• Pezeşkian Trampın hədələrini rədd edib, danışıqlara açıq olduğunu bildirib

Teqlər

İran Donald Tramp Konqres Demokratlar ABŞ Senatı qətnamə ABŞ-İran münaqişəsi