Afinada partlayış nəticəsində bina dağılıb, 6 nəfər ölüb

Yunanıstanın yanğınsöndürmə xidməti bildirib ki, Afinanın mərkəzində, turistlərin sıx olduğu ərazidə baş verən partlayış nəticəsində ikimərtəbəli yaşayış binası dağılıb, 6 nəfər ölüb.

Partlayış sentyabrın 25-də Afinanın Plaka rayonunda, Akropol və Zevs məbədi kimi məşhur turistik məkanların yaxınlığında baş verib. Hadisə nəticəsində üç nəfər yaralanıb, ətrafdakı evlərə, mağazalara və avtomobillərə ziyan dəyib.

Xilasetmə qrupları xüsusi təlim keçmiş axtarış itlərinin köməyi ilə mənzillərdən birində yaşayan yaşlı cütlüyü, digər mənzildə qalan dörd turisti axtarıblar.

Yanğınsöndürmə xidmətinin rəsmisinin sözlərinə görə, sentyabrın 26-da səhər saatlarında dağıntılar təmizlənərkən gənc qadının meyiti aşkarlanıb.

ABŞ rəsmiləri partlayış nəticəsində həlak olanlardan dördünün ABŞ vətəndaşı olduğunu bildiriblər. Polis mənbəsinin məlumatına görə, iki amerikalı cütlük sentyabrın 25-də saat 15:00-da Afina hava limanından uçmalı olsa da, reysə gəlməyib.

ABŞ-nin Yunanıstandakı səfiri Kimberli Qilfoyl “X” platformasında yazıb: “Afinanın mərkəzində dünən baş verən partlayışda dörd ABŞ vətəndaşının həlak olması məni dərindən kədərləndirib”.

Partlayışın səbəbi araşdırılır

Otellərin və qısamüddətli kirayə mənzillərin çox olduğu ərazidə baş verən partlayışın dəqiq səbəbi hələ müəyyən edilməyib.

Afina meri Haris Dukas partlayışın qaz sızmasından qaynaqlandığını ehtimal edir. O, ciddi texniki nasazlığın baş verdiyini ehtimal edib.

• Afinada partlayış nəticəsində bir nəfər ölüb, beş nəfər itkin düşüb

Teqlər

Afina Yunanıstan partlayış Akropol qaz infrastrukturu Haris Dukas Kimberli Qilfoyl