Cənubi Afrikada iki silahlı hücumda 27 nəfər ölüb, polis şübhəliləri axtarır

Cənubi Afrika polisi bir neçə saat ərzində baş verən iki ayrı silahlı hücumda 27 nəfərin öldürülməsi, 26 nəfərin yaralanmasından sonra şübhəli şəxsləri axtarır. Hadisələr ölkədə silahlı zorakılıqla bağlı narahatlığın davam etdiyi bir vaxta təsadüf edir.

Yohannesburqdan təxminən 80 kilometr məsafədə yerləşən Vedela qəsəbəsində sentyabrın 26-da saat 21:30 radələrində silahlı şəxslər əvvəlcə əyləncə məkanının qarşısındakı insanlara, daha sonra içəri daxil olaraq oradakı şəxslərə atəş açıblar. Hücum nəticəsində 17 nəfər ölüb, 15 nəfər yaralanıb.

Sentyabrın 27-də səhər saatlarında Keyptaunun kənarındakı Lvandle qəsəbəsində daha bir silahlı hücum baş verib. Silahlı şəxslər saat 01:46 radələrində qızardılmış ət satılan məkana atəş açıblar. Nəticədə 10 nəfər ölüb, 11 nəfər yaralanıb.

Hər iki hadisə ilə bağlı hələlik heç kim saxlanılmayıb. Polisin məlumatına görə, hücumları törədən şəxslərin kimliyinin müəyyənləşdirilməsi və tutulması istiqamətində araşdırma aparılır.

Yohannesburq yaxınlığındakı hadisə yerinə hərbçilər və məhkəmə-tibb mütəxəssisləri cəlb olunub. Əyləncə məkanının yaxınlığında iki yanmış avtomobil aşkarlanıb. Bəzi sakinlər təhlükəsizliklərindən ehtiyat etdikləri üçün hücumla bağlı açıq danışmaqdan çəkiniblər.

Polis Vedeladakı hücumla əlaqədar səkkiz silahlı şəxsi axtarır. İlkin məlumata görə, şübhəlilər bəzi şəxslərin mobil telefonlarını götürdükdən sonra iki avtomobillə hadisə yerindən qaçıblar. Hücumun motivi hələ müəyyən edilməyib.

İnsanlar silahlı hücumun baş verdiyi əraziyə toplaşıblar. Vedela qəsəbəsi, Yohannesburq, Cənubi Afrika, 27 sentyabr 2026-cı il.

Reuters

Son hadisələr Cənubi Afrikada noyabrda keçiriləcək bələdiyyə seçkiləri ərəfəsində cinayətkarlıq və ictimai təhlükəsizliklə bağlı narahatlığın artdığı dövrə təsadüf edir. Prezident Siril Ramafosa daha əvvəl mütəşəkkil cinayətkarlığı ölkə üçün ciddi təhlükə adlandırıb və bəzi ərazilərdə polisə dəstək vermək üçün hərbçilərin yerləşdirilməsinə göstəriş verib.

Bu hadisələrdən bir neçə gün əvvəl Durban yaxınlığında evdə təşkil olunan məclisə silahlı hücum zamanı 11 nəfər öldürülüb. İyuldan etibarən Yohannesburq yaxınlığında qadın meyitlərinin aşkarlanması isə qadınların qətlə yetirilməsi və zorakı cinayətlərlə bağlı narahatlığı artırıb.

Kopyalandı