Rusiyanın Xarkova zərbəsi nəticəsində 22 nəfər yaralanıb

Rusiya 2027-ci ildə müdafiə xərclərini rekord həddə çatdırmağı planlaşdırır

Məlumatlı mənbənin bildirdiyinə görə, ABŞ Prezidenti Donald Trampın administrasiyası İran və İraq arasında şiə zəvvarlarını daşıyan reyslərə icazə vermək üçün İrana qarşı sanksiyalara məhdud istisna tətbiq etməyə hazırlaşır.

Təklifə əsasən, ABŞ Maliyyə Nazirliyi “Iraqi Airways” aviaşirkətinə İranla İraqın şiələr üçün müqəddəs şəhəri Nəcəf arasında bir ay müddətində qarşılıqlı reyslər həyata keçirməyə imkan verən müvəqqəti icazə verəcək.

Məlumata görə, rəsmilər ilkin müddət başa çatdıqdan sonra daha uzunmüddətli mexanizmin tətbiqini də nəzərdən keçirirlər.

Müzakirələr Vaşinqtonun İrana qarşı geniş sanksiyaları qüvvədə saxladığı, eyni zamanda dini səfərlər və humanitar məsələləri nəzərə aldığı bir vaxtda aparılır.

Rusiyanın Kiyevdə Elmlər Akademiyasının binasına zərbəsi nəticəsində bir nəfər ölüb

Kiyev meri Vitali Kliçko bildirib ki, Rusiyanın Ukrayna paytaxtının mərkəzində yerləşən Elmlər Akademiyasının binasına endirdiyi zərbə nəticəsində bir nəfər ölüb, üç nəfər yaralanıb.

Kallas: “Lavrov–Vadeful danışıqları Rusiyanın sülhdə maraqlı olmadığını göstərir”

Aİ-nin xarici siyasət üzrə ali nümayəndəsi Kaya Kallas bildirib ki, Rusiyanın xarici işlər naziri Sergey Lavrovun ötən həftə BMT-də almaniyalı həmkarı Yohann Vadefulla keçirdiyi görüşdən sonra verdiyi açıqlamalar Rusiyanın sülhdə ümumiyyətlə maraqlı olmadığını göstərir.

Lavrov və Vadeful sentyabrın 26-da görüşüblər. Lavrov daha sonra keçirdiyi mətbuat konfransında görüş barədə laqeyd danışıb. O bildirib ki, görüşdən heç nə öyrənməyib və Vadeful onunla görüşmək əvəzinə sadəcə zəng edə bilərdi.

Aİ ukraynalı uşaqların Rusiyaya deportasiyasına görə sanksiyalar tətbiq edib

Aİ ölkələri ukraynalı uşaqların qanunsuz olaraq Rusiyaya deportasiya edilməsində iştiraklarına görə 10 fiziki şəxs və 17 quruma qarşı sanksiyalar tətbiq edib.

Siyahıya Moskva Şəhər Turizm Komitəsi, Rusiyadakı uşaq və idman düşərgələri, eləcə də Şimali Koreyadakı Sondovon Beynəlxalq Uşaq Düşərgəsi daxildir. Avropa Şurasının məlumatına görə, ukraynalı uşaqlar burada Rusiyayönlü narrativlərin təbliği məqsədilə saxlanılır.

Cənubi Koreya Şimali Koreyalı əsirlərlə bağlı Ukrayna diplomatını XİN-ə çağırıb

Cənubi Koreyanın Xarici İşlər Nazirliyi Şimali Koreyalı əsirlərin Cənubi Koreyaya köçürülməsi ilə bağlı məlumatın açıqlanmasına etiraz olaraq Ukraynanın müvəqqəti işlər vəkilini nazirliyə çağırıb. Bu barədə “Yonhap” xəbər agentliyi məlumat yayıb.

“Yonhap”ın məlumatına görə, Cənubi Koreya əsirlərin bu ölkəyə getmək istədiklərinin Ukrayna tərəfindən açıqlanmasına etiraz edib.

Almaniya: Rusiya Ukraynada müharibənin başa çatması üçün danışıqlara hazır deyil

Rəsmi Berlin sentyabrın 28-də bildirib ki, Rusiyanın Ukraynaya genişmiqyaslı müdaxiləsindən sonra Moskva ilə keçirilən ilk birbaşa danışıqlar tərəflərin mövqeləri arasında hələ də ciddi fikir ayrılıqlarının olduğunu göstərib. Almaniya tərəfinin fikrincə, Rusiya müharibənin başa çatması üçün ciddi danışıqlara hazır deyil.

“Mövqelərimiz, əlbəttə ki, bir-birindən çox uzaq idi və bu, bir daha aydın oldu”, – Almaniya Xarici İşlər Nazirliyinin sözçüsü bildirib.

Açıqlama Almaniyanın xarici işlər naziri Yohann Vadeful ilə Rusiyanın xarici işlər naziri Sergey Lavrovun BMT Baş Assambleyası çərçivəsində keçirdiyi görüşdən iki gün sonra verilib.

XİN sözçüsü əlavə edib ki, görüş Berlinin Moskvanın nə atəşkəs, nə də müharibənin başa çatması ilə bağlı ciddi danışıqlara hazır olmadığı qənaətini gücləndirib.

Rusiyanın Dneprdə biznes mərkəzinə hücumu nəticəsində üç nəfər ölüb

Rusiyanın Ukraynanın cənub-şərqində yerləşən Dnepr şəhərində biznes mərkəzinə PUA ilə hücumu nəticəsində üç nəfər ölüb, azı 12 nəfər yaralanıb. Bu barədə vilayətin qubernatoru məlumat verib.

Yanğınsöndürən Rusiyanın reaktiv mühərrikli PUA hücumu nəticəsində zədələnmiş biznes mərkəzində işləyir. Dnepr, Ukrayna, 28 sentyabr 2026-cı il.

Reuters

Kiyevin mərkəzində güclü partlayış səsi eşidilib

Sentyabrın 28-də Ukraynanın paytaxtı Kiyevin mərkəzində güclü partlayış səsi eşidilib. Bu barədə “Reuters”in hadisə yerində olan əməkdaşları məlumat veriblər.

Şəhər administrasiyası partlayışın Rusiya PUA-sının hücumu nəticəsində baş verdiyini bildirib

Peskov: “Moskva və Vaşinqton arasında silahlara nəzarət danışıqları bərpa olunmalıdır”

Kremlin sözçüsü Dmitri Peskov bildirib ki, Rusiya ilə ABŞ arasında silahlara nəzarətlə bağlı danışıqların bərpası çoxdan gecikib. O deyib ki, proses yenidən başlayarsa, uzunmüddətli və diqqətli müzakirələr tələb olunacaq.

“Bu, o qədər mürəkkəb məsələdir ki, ekspertlər səviyyəsində çox uzun və ciddi danışıqlar tələb edir”, – Peskov bildirib.

Rusiya ABŞ ilə xeyli pisləşmiş münasibətləri bərpa etmək istədiyini dəfələrlə bildirib. Lakin Rusiya–Ukrayna müharibəsi ilə bağlı fikir ayrılıqları indiyədək münasibətlərdə ciddi irəliləyişə imkan verməyib.

ABŞ Prezidenti Donald Trampın ABŞ, Rusiya və Çin arasında silahlara nəzarətlə bağlı üçtərəfli danışıqlar keçirilməsi çağırışına münasibət bildirən Peskov deyib ki, Çin belə danışıqlarda iştirak etməyəcəyini dəfələrlə açıqlayıb. Onun sözlərinə görə, Moskvanın bildiyi qədər, Pekinin mövqeyi dəyişməyib.

Pekin bildirir ki, Çinin nüvə arsenalı Rusiya və ABŞ-nin nüvə arsenallarından xeyli kiçikdir və buna görə də belə danışıqlarda iştirak etməsinə ehtiyac yoxdur.

Ukrayna Krasnodar diyarında Rusiyanın neft obyektlərini vurub

Ukrayna ordusu Rusiyanın Krasnodar diyarındakı neft obyektlərinə zərbələr endirib. Bu barədə Ukrayna Prezidenti Volodimir Zelenski bildirib.

Zelenski həmçinin gecə saatlarında Rusiyanın Tula və Voronej vilayətlərində yerləşən iki müdafiə sənayesi müəssisəsinin vurulduğunu deyib.

Ukrayna Donetsk vilayətinin şimalında yeni əraziləri azad etdiyini bildirir

Ukrayna qüvvələri Donetsk vilayətinin şimalında daha 51 kvadrat kilometr ərazini Rusiya qoşunlarından geri alıb. Briqada generalı Andrii Biletski bildirib ki, irəliləyiş Ukraynanın davam edən “Vivaldi” əməliyyatı çərçivəsində əldə olunub.

Onun sözlərinə görə, əməliyyat nəticəsində indiyədək ümumilikdə 176 kvadrat kilometr ərazi geri alınıb, daha üç kənd azad edilib və iki kənd üzərində Ukraynanın nəzarəti bərpa olunub. Müharibənin Tədqiqi İnstitutu (ISW) bildirib ki, əməliyyat Rusiyanın bölgədə Ukraynanın nəzarətində olan strateji əhəmiyyətli şəhərlər qrupunu mühasirəyə almaq cəhdlərinə mane olub.

Bu il cəbhə xəttində irəliləyişin ümumilikdə yavaşlamasına baxmayaraq, Rusiya qüvvələri Kostiantınivka da daxil olmaqla, Ukraynanın şərqdəki əsas mövqeləri istiqamətində hücumlarını davam etdirir. Hazırda Ukrayna Donetsk vilayətinin təxminən 20 faizinə nəzarət edir, rəsmi Moskva isə bütün vilayətə nəzarət etmək tələbində israr edir.

Son məlumatlar Kiyevin bundan əvvəl ölkənin cənub-şərqində keçirdiyi əks-hücumla bağlı əvvəlki açıqlamalardan sonra yayılıb. Ukrayna rəsmiləri həmin əməliyyat zamanı 700 kvadrat kilometrdən çox ərazinin geri alındığını bildirmişdilər.

Ukrayna PUA-ları Rusiyanın sərhəd bölgəsində dəmir yolu infrastrukturunu hədəf alıb

Ukrayna PUA-ları Rusiyanın sərhəddə yerləşən Bryansk vilayətində dəmir yolu infrastrukturuna üç ayrı hücum həyata keçirib. Bryansk qubernatorunun səlahiyyətlərini icra edən Yeqor Kovalçuk bildirib ki, hücumlar nəticəsində dəmir yolu körpüsü zədələnib, 30-a yaxın vaqon relsdən çıxıb.

Onun sözlərinə görə, hücumlardan biri körpünün bir hissəsinin uçmasına, digəri isə dəmir yolu xətlərinin zədələnməsinə səbəb olub.

“Reuters” bu məlumatları müstəqil şəkildə təsdiqləyə bilməyib. Ukrayna isə hələlik açıqlama verməyib.

Rusiya Odessa vilayətində Palau bayrağı altında üzən gəmini vurub

Ukrayna Prezidenti Volodimir Zelenski bildirib ki, Rusiya Ukraynanın Qara dəniz sahilində yerləşən Odessa vilayətində Palau bayrağı altında üzən gəmini vurub.

Kallas: “Rusiya Avropada yeni təxribat aktları planlaşdırır”

Aİ-nin xarici siyasət üzrə ali nümayəndəsi Kaya Kallas bildirib ki, kəşfiyyat məlumatları Rusiyanın Avropada daha çox təxribat aktı planlaşdırdığını göstərir.

“Ayıq-sayıq olmalıyıq, çünki kəşfiyyat məlumatlarında Rusiyanın daha çox təxribat aktı və demokratiyamıza qarşı hücumlar planlaşdırdığını görürük. Məqsəd cəmiyyətlərimizi parçalamaq, onları qorxutmaq və Ukraynaya yardım göstərməkdən çəkindirməkdir”, – Kallas Brüsseldə Aİ müdafiə nazirlərinin görüşündən əvvəl deyib.

Aİ-nin xarici siyasət üzrə ali nümayəndəsi və Avropa Komissiyasının vitse-prezidenti Kaya Kallas Pasay şəhərində çıxış edir. 24 iyul 2026-cı il.

Reuters

Rusiya Ukraynanın enerji və logistika obyektlərini hədəfə alıb

Rusiya Müdafiə Nazirliyi bildirib ki, ölkə qüvvələri gecə saatlarında həyata keçirilən hücum zamanı Odessa limanına hərbi təyinatlı yük daşıyan gəmini vurub. Nazirliyin məlumatına görə, hücum nəticəsində Ukraynanın enerji infrastrukturu, məlumat və logistika mərkəzləri, eləcə də hərbi aerodrom da hədəfə alınıb.

Cənubi Koreya Ukraynadan Şimali Koreya əsgərləri ilə bağlı izahat tələb edir

Cənubi Koreya Ukraynadan rəsmi izahat və üzr tələb edib. Seul Kiyevi əsir götürülmüş iki Şimali Koreya əsgərinin Cənubi Koreyaya təhvil verilməsini, bu addımın məxfi saxlanılması barədə razılaşmaya baxmayaraq, açıqlamaqda ittiham edib.

Seul bildirib ki, Ukrayna təhlükəsizlik, diplomatik və humanitar səbəblərlə, o cümlədən əsirlərin və onların ailələrinin təhlükəsizliyi ilə əlaqədar məlumatın məxfi saxlanılmasını dəfələrlə istəyib. Cənubi Koreyanın məlumatına görə, Kiyev sonradan Prezident Volodimir Zelenskinin BMT Baş Assambleyasındakı çıxışı zamanı əsgərlərin təhvil verildiyini açıqlayıb, daha sonra isə məxfilik barədə razılaşmanın mövcudluğunu inkar edib.

Rusiya Qara dənizdə yük gəmisini vurduğunu bildirib

Rusiya Müdafiə Nazirliyi Qara dənizdə yük gəmisinə zərbə endirildiyini bildirib. Bu barədə “Interfax” agentliyi məlumat yayıb.

Gəminin adı, zərbənin hansı şəraitdə endirildiyi və mümkün itkilər barədə məlumat verilməyib.

Xarkova zərbə nəticəsində yaralananların sayı 22-yə çatıb

Xarkov meri İqor Terexov bildirib ki, Rusiyanın yaşayış binasına idarəolunan aviasiya bombası ilə endirdiyi zərbə nəticəsində yaralananların sayı 15-dən 22-yə çatıb. Yaralılar arasında uşaqlar da var.

Kiyev şəhər hakimiyyətinin məlumatına görə, Rusiya dronu paytaxtda yanacaqdoldurma məntəqəsini də vurub.

Xarkova bomba zərbəsi: 15 yaralı

Rusiya ordusunun atdığı idarəolunan aviasiya bombası bazar ertəsi səhər Xarkovda yaşayış binasına düşüb. Şəhərin meri İqor Terexov bildirib ki, nəticədə uşaqlar da daxil olmaqla 15 nəfər yaralanıb.

Hücumdan bir gün əvvəl Rusiyanın Ukraynanın müxtəlif bölgələrinə endirdiyi zərbələr nəticəsində Kiyev yaxınlığındakı bazarda iki, Sumı və Xarkovda isə ümumilikdə üç nəfər həlak olub.

Ukrayna rəsmilərinin sözlərinə görə, Rusiya qüvvələri gün ərzində demək olar ki, fasiləsiz hücumlar edərək yaşayış binalarını, infrastrukturu və digər obyektləri vurub.