Məhkəmə Minnesotada süni intellektlə yaradılmış çılpaq görüntülərlə bağlı qadağanı dayandırıb

ABŞ Federal Apellyasiya Məhkəməsi Minnesota ştatında süni intellektlə çılpaq görüntülərin yaradılmasını qadağan edən qanunun tətbiqini müvəqqəti dayandırıb. 

Qərar İlon Maskın xAI şirkətinin qanunun Konstitusiyaya zidd olduğunu əsas gətirərək məhkəməyə müraciət etməsindən sonra qəbul olunub.

Sent-Luisdə yerləşən ABŞ-nin 8-ci Dairə Apellyasiya Məhkəməsi oktyabrın 2-də xAI-nin qanunun tətbiqinin müvəqqəti dayandırılması ilə bağlı tələbini təmin edib. Beləliklə, şirkətin iddiasına baxıldığı müddətdə qanun tətbiq edilməyəcək.

Bundan əvvəl aşağı instansiya məhkəməsi xAI-nin eyni tələblə etdiyi müraciəti rədd etmişdi.

Minnesotada avqustun 1-də qüvvəyə minən qanun internet saytlarının operatorlarına, proqram təminatı hazırlayan şirkətlərə və digər şəxslərə istifadəçilərin şəxsiyyəti müəyyən edilə bilən şəxsin orijinal fotosunda görünməyən intim bədən nahiyələrini realistik formada əks etdirən görüntülər yaratmasına imkan verməyi qadağan edir.

xAI bildirir ki, qanun ABŞ Konstitusiyası ilə qorunan söz azadlığı hüququnu pozur.

Şirkət apellyasiya şikayətində aşağı instansiya məhkəməsinin təcili hüquqi müdafiə üçün çox gec müraciət etdiyi barədə qənaətinə də etiraz edib. xAI bildirib ki, “Grok Imagine” alətində real insanların seksual xarakterli və ya saxta çılpaq görüntülərinin yaradılmasının qarşısını almaq üçün qoruyucu mexanizmlər var.

Minnesota ştatı qanunun tətbiqini müdafiə edir

Minnesota ştatının rəhbərliyi apellyasiya məhkəməsini qanunun tətbiqini dayandırmamağa çağırıb. Ştat rəsmilərinin bildirdiyinə görə, qanun insanların razılığı olmadan yaradılan seksual xarakterli görüntülərin və süni intellektlə hazırlanan digər zərərli materialların yayılmasının qarşısını almaq məqsədi daşıyır.

Ştat rəsmiləri, xüsusilə “Grok Imagine” kimi süni intellekt məhsulları vasitəsilə uşaqlara qarşı cinsi zorakılıq materiallarının yaradıldığına dair iddialarla bağlı narahatlıqları qeyd ediblər.

Apellyasiya məhkəməsinin bu qərarı xAI-nin qanunun Konstitusiyaya uyğunluğu ilə bağlı iddiasını həll etmir. Qanunun tətbiqi hüquqi mübahisə davam etdiyi müddətdə dayandırılıb.

• Hesabat: “OpenAI” agentləri kiberfəaliyyətin izlərini silməyə çalışıblar

• Texnologiya nəhəngləri süni intellekt qaydaları ilə bağlı Trampa mövqelərini çatdırıblar

Teqlər

süni intellekt məhkəmə saxta çılpaq görüntülər ABŞ Minnesota ştatı Federal Apellyasiya Məhkəməsi xAI İlon Mask