ABŞ mediası: Oman “flydubai”ın ikinci pilotuna daha əvvəl uçuş qadağası qoyub

İsrailə uçan təyyarədə kapitanı bıçaqlamaqda və terror aktına cəhddə ittiham olunan “flydubai” şirkətinin ikinci pilotu Hammam əl-Hammamiyə Omanda hadisədən daha əvvəl uçuş qadağası qoyulub. 

Qadağanın onun radikal baxışları ilə bağlı narahatlıqlarla əlaqəli olduğu bildirilir. ABŞ mediası məsələdən məlumatlı şəxslərə istinadən bu barədə xəbər yayıb.

Araşdırmaya rəhbərlik edən Birləşmiş Ərəb Əmirlikləri pilotun Omandakı fəaliyyəti ilə bağlı şərh verməkdən imtina edib.

BƏƏ-nin Baş Prokuroru isə  bildirib ki, ikinci pilot uçuş zamanı balta ilə kapitana hücum edərək təyyarəni ələ keçirmək və terror aktı törətmək istəyib.

AnewZ-a açıqlama verən “flydubai”ın sözçüsü bildirib ki, hadisənin təfərrüatları araşdırıldığı üçün şirkət hazırda əlavə şərh verə bilmir.

“Davam edən araşdırmaya tam dəstək veririk, müvafiq dövlət qurumları və tənzimləyici orqanlarla sıx əməkdaşlıq edirik”, – sözçü əlavə edib.

AnewZ məsələ ilə bağlı şərh almaq üçün Oman hökumətinə müraciət edib.

“Fox News” bildirib ki, Omanın milli aviadaşıyıcısı “Oman Air” 2024-cü ildə pilotun radikal islamçı saytları ziyarət etdiyini müəyyən etdikdən sonra onun uçuşlarını dayandırıb.

“ABC News” isə yüksəkvəzifəli kəşfiyyat və hüquq-mühafizə rəsmilərinə istinadən bildirib ki, əl-Hammami 2024-cü ildə “Oman Air”də təcrübəçi ikinci pilot işləyərkən təhlükəsizlik riski kimi qiymətləndirilib.

AnewZ ABŞ mediasında yayılan məlumatlarla bağlı şərh almaq üçün “Oman Air”ə müraciət edib.

Hadisə uçuşdan iki saat sonra baş verib

İddialara görə, Oman vətəndaşı əl-Hammami Dubaydan Təl-Əvivə uçan “flydubai” təyyarəsində uçuşdan iki saat sonra hindistanlı kapitan Smit Maççarı bıçaqlayıb.

Təyyarə Səudiyyə Ərəbistanının şimal-qərbində yerləşən Tabuk şəhərinə yönləndirilib və təhlükəsiz eniş edib. Göyərtədə olan təxminən 180 nəfərin demək olar ki, hamısı İsrail vətəndaşı olub.

İsrailin Baş naziri Benyamin Netanyahu  bildirib ki, hücum edən şəxs islamçı radikal ideologiyanın təsiri altına düşüb. O əlavə edib ki, həmin şəxsin təyyarəni qəzaya uğratmaq niyyətində olduğu ehtimal edilir.

• Sərnişinlər “flydubai” reysindəki insidentdən sonra İsrailə qayıdıblar

• Netanyahu: “İsrail “flydubai” təyyarəsindəki insidentin araşdırılmasında iştirak edə bilər”

• “Flydubai” insidenti: İstintaq hansı suallara cavab axtarır?

Teqlər

ABŞ Oman flydubai pilot uçuş qadağası AnewZ BƏƏ İsrail