Rusiya Kiyevdə əsas körpülərdən birini vurub

Kiyevdə Dnepr çayı üzərində yerləşən əsas körpülərdən biri Rusiyanın hava hücumu nəticəsində vurulub. Şəhər meri Vitali Kliçko bildirib ki, paytaxtın infrastrukturuna zərbələr davam edir.

Kliçkonun sözlərinə görə, Şimal körpüsünün yol örtüyü və trolleybus xətləri zədələndiyi üçün Dneprin şərq sahilindən qərb sahilinə nəqliyyatın hərəkəti dayandırılıb. Xəsarət alanlar barədə məlumat verilməyib.

Ukraynanın “The Kyiv Post” qəzeti körpünün reaktiv mühərrikli zərbə dronu ilə vurulduğunu bildirib.

Rusiya üst-üstə üç gündür Kiyevin strateji körpülərini vurur. Son iki gündə dəfələrlə zərbə alan Cənub körpüsündə və daha iki körpüdə hərəkət müvəqqəti məhdudlaşdırılıb. Gecə boyunca Kiyev ətrafına edilən hücumlar nəticəsində dörd nəfər yaralanıb. Onların arasında bir uşaq da var. 

Avropa komissarı Haca Lahbib isə Rusiyanı Ukraynanın cənubundakı işğal altında olan Oleşki şəhərində mülki əhaliyə humanitar yardım göstərməyə çağırıb. O, şəhərdəki vəziyyətin dəhşətli olduğunu bildirib.

“Mülki əhali Rusiya qüvvələrinin mühasirəsində qalıb. Onların ərzaq, dərman, təmiz su və əsas tibbi xidmətlərə çıxışı yoxdur. Bu, qəbuledilməzdir”, – Lahbib bildirib.  

Ukraynanın Xerson vilayətinin rəhbəri Oleksandr Prokudin bildirib ki, humanitar vəziyyətin pisləşməsi fonunda Ukrayna hərbçiləri şəhərə dronlarla ərzaq və dərman çatdırırlar.

Rusiya və Ukrayna qüvvələrini ayıran Dnepr çayı sahilində yerləşən cəbhəyanı Oleşki şəhəri 2022-ci ildən Rusiyanın nəzarətindədir.

ABŞ-Ukrayna fondu mineral resurslar üzrə saziş imzalayıb

ABŞ-nin yüksəkvəzifəli rəsmisinin bildirdiyinə görə, ABŞ və Ukraynanın birgə yenidənqurma fondu kritik minerallar sahəsində ilk sazişini bağlayıb və daha dörd layihə açıqlayıb.

ABŞ Beynəlxalq İnkişaf Maliyyə Korporasiyasının nümayəndəsi Konor Koulman bildirib ki, layihələrin ümumi dəyəri təxminən 70 milyon dollardır. Bunun təxminən 30 milyon dolları Ukraynanın özəl investisiya şirkəti “BGV Group” ilə birgə platformaya yatırılacaq. Platforma nadir torpaq elementləri, uran, berillium və sirkoniumun ilkin mərhələdə hasilatına yönələcək.

Daha iki layihə elektrik və istilik şəbəkələrinin gücləndirilməsinə yönəlib. Bura ABŞ hökumətinin “DTEK” energetika şirkətinə ayırdığı 100 milyon dollara yaxın borc vəsaiti hesabına qurulan batareya sistemi də daxildir. Yeni sistem 600 minə yaxın mənzili iki saatadək ehtiyat elektrik enerjisi ilə təmin edə biləcək.

• Rusiya NATO-ya Kalininqradla bağlı nüvə xəbərdarlığı edib

Teqlər

Rusiya Ukrayna Rusiya-Ukrayna müharibəsi Kiyev hava zərbələri körpü Vitali Kliçko Dnepr çayı