Almaniya xarici kəşfiyyatının keçmiş rəhbəri casusluq şübhəsi ilə saxlanılıb, İsraillə əlaqələri yenidən gündəmdədir

Almaniya xarici kəşfiyyatının keçmiş rəhbəri casusluq şübhəsi ilə saxlanılıb, İsraillə əlaqələri yenidən gündəmdədir
Göy sayrışan işıqları yanan polis avtomobili Federal Kəşfiyyat Xidmətinin (BND) baş qərargahının qarşısından keçir. Berlin, Almaniya, 6 oktyabr 2026-cı il.
Reuters

Almaniyanın Federal Kəşfiyyat Xidmətinin (BND) keçmiş rəhbəri Avqust Hanninq oktyabrın 6-da casusluq və dövlətə xəyanətə cəhd şübhəsi ilə saxlanılıb. Federal Prokurorluğun məlumatına görə, saxlanılma məhkəmənin həbs orderi əsasında həyata keçirilib.

Federal Prokurorluq Hanninqi dövlət sirrini təşkil edən məlumatları əldə etməkdə, dövlətə xəyanətə cəhddə və xarici kəşfiyyatın xeyrinə agentlik fəaliyyətində şübhəli bilir. Casusluq işi ilə bağlı bütün təfərrüatlar hələ açıqlanmayıb.

Casusluq araşdırması Kristina Blok işi üzrə 2025-ci ilin sentyabrında Hanninqin evində aparılan axtarış zamanı aşkarlanan materiallar əsasında başlanıb. İş 2026-cı ilin mayının əvvəlində Federal Prokurorluğa təqdim edilib.

Qəyyumluq işi yenidən gündəmdədir

Almaniyalı iş qadını Kristina Blok və keçmiş əri Stefan Hensel uzun müddətdir uşaqlarının qəyyumluğu ilə bağlı mübahisə aparırlar. Onların iki azyaşlı övladı 2023-cü il dekabrın 31-dən 2024-cü il yanvarın 1-nə keçən gecə Danimarkadan Almaniyaya aparılıb.

Hanninqin adı bu işlə bağlı daha əvvəl də hallanıb. Almaniya prokurorluğunun araşdırmasına görə, o, 2022-ci ildə uşaqların Danimarkadan aparılması üçün planlaşdırılan, lakin baş tutmayan əvvəlki cəhdlə əlaqəli ola bilər. Hanninq bu ittihamları rədd edib.

İş üzrə irəli sürülən digər iddialarda isə İsrail təhlükəsizlik və kəşfiyyat dairələri ilə əlaqəli şəxslərin adı çəkilir.

Uşaqların aparılması işində İsrailin keçmiş kəşfiyyat rəhbərlərinin də adı çəkilir

Mediada yayılan məlumatlarda İsrailin xarici kəşfiyyat xidməti “Mossad”ın keçmiş direktoru Denni Yatomun da adı çəkilib.

Henselin ifadəsinə əsaslanan xəbərlərə görə, Hanninq uşaqların aparılması məsələsi ilə bağlı Yatomla əlaqə saxlayıb. Yatom Hanninqi tanıdığını təsdiqləsə də, bu işlə hər hansı əlaqəsinin olmadığını bildirib. 

İsrailin daxili təhlükəsizlik xidməti “Şin Bet”in keçmiş rəhbəri Yaakov Perinin də adı iş üzrə iddialarda hallanıb.

Məhkəmə materiallarında yer alan iddialara görə, Hanninq uşaqların aparılması üçün qrup yaradılmasına kömək məqsədilə Peri ilə əlaqə saxlayıb. 

Hanninqin evində axtarışdan sonra yeni araşdırma başlanıb

Hanninqə qarşı casusluqla bağlı araşdırmanın başlanmasına onun evində başqa cinayət işi çərçivəsində aparılan axtarış zamanı aşkarlanan materialların səbəb olduğu bildirilir.

Almaniya hüquq-mühafizə orqanları 2025-ci ilin sentyabrında Kristina Blok işi ilə bağlı araşdırma çərçivəsində Hanninqin evində və onunla əlaqəli obyektlərdə axtarış aparıb.

Almaniya mediasının məlumatına görə, axtarış zamanı BND-yə aid məxfi sənədlər aşkarlanıb. Materiallar daha sonra casusluq və dövlət təhlükəsizliyi ilə bağlı cinayətləri araşdıran Federal Prokurorluğa təqdim edilib.

Federal Prokurorluq 2026-cı ilin mayında Hanninq və ona məxfi sənədlər ötürməkdə şübhəli bilinən keçmiş BND əməkdaşı ilə bağlı araşdırmaya başlayıb.

BND-yə yeddi il rəhbərlik edib

Avqust Hanninq 1998–2005-ci illərdə Almaniyanın xarici kəşfiyyat xidməti BND-yə rəhbərlik edib. Daha sonra Almaniya Daxili İşlər Nazirliyində dövlət katibi vəzifəsində çalışıb.

Dövlət xidmətindən ayrıldıqdan sonra Hanninq özəl sektorda fəaliyyət göstərib və təhlükəsizlik üzrə məsləhətçi kimi çalışıb.

Mediada onun İsrailin təhlükəsizlik və kəşfiyyat dairələrinin keçmiş nümayəndələri ilə uzunmüddətli əlaqələrinin olduğu da bildirilir.

Araşdırmalar davam edir

Hanninqə qarşı casusluq araşdırması Kristina Blok və digər şəxslərlə bağlı Hamburqda davam edən məhkəmə prosesi fonunda aparılır.

Almaniya hüquq-mühafizə orqanları Hanninqin BND-dən əldə etdiyi iddia olunan məxfi məlumatlardan necə istifadə etdiyini və bu məlumatların xarici tərəflərə ötürülüb-ötürülmədiyini araşdırır.

Hanninq daha əvvəl qəyyumluq işi ilə bağlı ona qarşı irəli sürülən ittihamları rədd edib. Casusluq işi üzrə araşdırma isə davam edir.

Teqlər