Hitlerin “Qartal yuvası”nda yanğın: Bir nəfər saxlanılıb

Hitlerin “Qartal yuvası”nda yanğın: Bir nəfər saxlanılıb
“Qartal yuvası” kimi tanınan Kelştaynhauz binasından yanğın zamanı alov və tüstü yüksəlir. Almaniya, 24 oktyabr 2026-cı il.
Reuters

Almaniyada nasist dövrünə aid tarixi Kelştaynhauz (Kehlsteinhaus) binasında güclü yanğın baş verib. Polis hadisə ilə əlaqədar bir nəfəri şübhəli şəxs qismində saxlayıb.

“Qartal yuvası” kimi tanınan dağ iqamətgahından vaxtilə Adolf Hitler də daxil olmaqla, nasist rejiminin yüksəkvəzifəli rəsmiləri istifadə ediblər.

Yanğın oktyabrın 23-də Bavariyanın Berxtesqaden şəhəri yaxınlığında yerləşən binada baş verib. Hadisə yerinə 200-ə yaxın yanğınsöndürən və digər fövqəladə xidmətlərin əməkdaşları cəlb olunub.

Hadisə yerindən yayılan görüntülərdə binadan alov və qatı tüstünün yüksəldiyi, yanğınsöndürənlərin isə alovu nəzarət altına almağa çalışdığı görünür.

Polisin məlumatına görə, hadisə yerinin yaxınlığında bir nəfər saxlanılıb. Müstəntiqlər həmin şəxsin yanğınla mümkün əlaqəsini araşdırırlar.

Yanğının səbəbi barədə hələlik məlumat verilməyib.

Nasist dövrünə aid tarixi məkan

Kelştaynhauz 1938-ci ildə nasist rejiminin yüksəkvəzifəli rəsmiləri və onların qonaqları üçün tikilib.

Bavariya Alplarında yerləşən Kelştaynhauz Hitlerin yaxınlıqdakı keçmiş yay iqamətgahı Berqhofla (Berghof) eyni bina deyil.

İkinci Dünya müharibəsindən sonra Kelştaynhauz nasist dövrünə aid tarixi abidə kimi qorunub saxlanılıb.

Hazırda Bavariya əyalətinə məxsus olan bina tanınmış turizm məkanlarından biridir.

Teqlər