Yeni Zelandiyalı aktyor Sem Nil 78 yaşında Sidneydə vəfat edib

“Yura dövrü parkı” filmindəki rolu ilə dünyada tanınan Yeni Zelandiyalı aktyor Sem 78 yaşında qəfil vəfat edib. Ailəsinin bildirdiyinə görə, aktyor qan xərçəngindən müalicə olunduqdan sonra onda xəstəlik əlamətləri müşahidə olunmayıb.

“Bu itki qəfil və gözlənilməz oldu. Yeganə təsəllimiz Semdə xərçəng əlamətlərinin qalmaması idi”, — deyə aktyorun “Instagram” səhifəsində yayımlanan açıqlamada bildirilib.

Sem Nil Sidneydə vəfat edib. Ailəsi aktyora göstərilən qayğıya görə özəl xəstəxananın əməkdaşlarına təşəkkür edib. Aktyor aprel ayında üçüncü mərhələ qan xərçəngi ilə bağlı müalicədən sonra orqanizmində xəstəlik əlamətlərinin qalmadığını açıqlamışdı.

Avstraliyanın Baş naziri Entoni Albanizi aktyorun xatirəsini yad edərək bildirib ki, Sem Nil xəstəliklə ekran obrazlarına xas olan “ləyaqət, yumor və qətiyyətlə” mübarizə aparıb.

“Özünəməxsus incə yumoru, düşüncəli və təmkinli xarakteri ilə seçilən Sem xəstəliklə də hər bir roluna güc qatan eyni ləyaqət, yumor və qətiyyətlə mübarizə apardı. Onun yoxluğu dərindən hiss ediləcək və xatirəsi uzun müddət yaşayacaq. Ruhu şad olsun”, — Albanizi sosial şəbəkədə yazıb.

 

Yeni Zelandiyanın Baş naziri Kristofer Lakson Sem Nili “ən görkəmli sənətkarlardan biri” adlandırıb. O bildirib ki, aktyor 50 ildən artıq müddətdə Yeni Zelandiya hekayələrinin dünyaya çatdırılmasına töhfə verib.

“Sem Nil ən görkəmli sənətkarlardan biri idi. O, bu ölkədə kino sənayesinin demək olar ki, mövcud olmadığı bir dövrdə fəaliyyətə başlayıb. Əlli ildən artıq müddətdə Yeni Zelandiya hekayələrini dünyaya çatdırıb. Onun istedadı kino sənayemizin bugünkü səviyyəyə yüksəlməsinə və ölkəmizin ən mühüm mədəni ixrac sahələrindən birinə çevrilməsinə kömək edib”, — Lakson sosial şəbəkədə yazıb.

 

Yeni Zelandiyanın sabiq Baş naziri Helen Klark bildirib: "Ruhun şad olsun, Sem Nil – ekranda canlandırdığı bir çox baş rollar və əldə etdiyi ümumdünya sevgisi ilə ölkəmizə böyük qürur bəxş edən əfsanəvi Yeni Zelandiya aktyoru".

Avstraliyalı aktrisa Maqda Şubanski isə qeyd edib: "Mən çox sarsılmışam, əziz Sem. Deməyə söz tapmıram, tamamilə şokdayam. Sonuncu dəfə danışanda onun vəziyyəti çox yaxşı idi. Qəlbim onun ailəsi və onu sevən hər kəslədir - belə insanların sayı isə çoxdur. Əlvida, mənim əziz dostum".

Teqlər

Sem Nil vəfat Yeni Zelandiya Sidney Yura dövrü parkı Avstraliya aktyor