“Outlander” serialının kostyum və rekvizitləri hərraca çıxarılır

Məşhur “Outlander” serialının pərəstişkarları ekran əsərinə aid kostyum, rekvizit və dekorasiya nümunələrini əldə etmək imkanı qazanıblar. Bu əşyalar Londonda keçiriləcək hərracda satışa çıxarılacaq.

“Bonhams” hərrac evi iyulun 17-də “Outlander: The Auction” adlı hərracın əsas eksponatlarını təqdim edib. Kolleksiyaya serialın 12 illik çəkilişləri zamanı istifadə olunan əşyalar daxildir.

Final bölümü may ayında yayımlanan səkkiz mövsümlük serialın kolleksiyasında kostyumlar, rekvizitlər və çəkiliş meydançasına aid dekorasiyalar yer alır.

Əsas səhnələrdə istifadə olunan kostyumlar hərraca çıxarılır

“Outlander” zamanda səyahət edərək Şotlandiyadan Parisə və digər məkanlara yollanan Kler və Ceymi Freyzerin hekayəsindən bəhs edir. Baş rolları Katriona Balf və Sem Hyuen canlandırıb.

Hərraca çıxarılan əşyalar arasında Klerin ikinci mövsümdə geyindiyi məşhur qırmızı ziyafət libası da var. Kostyumun 7-12 min manata satılacağı gözlənilir.

Ceyminin Kalloden döyüşü səhnəsində geyindiyi kostyum isə 3,5–4,5 min manat məbləğində qiymətləndirilib.

“Bonhams”ın satış şöbəsinin rəhbəri Madlen Keyter bildirib ki, hərracda geniş çeşiddə əşyalar təqdim olunur. Bunların arasında Şotlandiyanın dağlıq bölgələrində çəkilən və ilk bölümlərdə istifadə olunan tartan geyimlər də var. Paris səhnələrində görünən dəbdəbəli libaslar da kolleksiyaya daxildir. Hərracda, həmçinin Amerika dövrünü əks etdirən kostyumlar da satışa çıxarılacaq.

Keyter Klerin qırmızı libasının pərəstişkarlar arasında xüsusi maraq doğura biləcəyini deyib. O, hərrac evinin bu əşyaya göstəriləcək tələbatı izləmək istədiyini bildirib.

Pərəstişkarlar “Outlander” tarixinin bir hissəsinə sahib ola biləcəklər

Keyter bildirib ki, hərracın serialın dünya üzrə pərəstişkarları arasında böyük maraq doğuracağı gözlənilir. Bir çox izləyici çəkilişlərdə istifadə olunan əşyalardan birini əldə etmək istəyir.

“Outlander” serialının kostyumu “Starzplay” platformasının altıncı mövsüm premyerasında nümayiş etdirilib. London, Böyük Britaniya, 24 fevral 2022-ci il.

Reuters

 

“İnsanlar seriala aid bir əşyanı əldə etmək imkanına çox sevinirlər”, – o deyib.

Canlı hərrac avqustun 5-də “Bonhams”ın Londondakı hərrac evində keçiriləcək. Onlayn hərrac isə avqustun 6-dək davam edəcək.

Kostyumlar, rekvizitlər və dekorasiyalar iyulun 20-dən avqustun 4-dək pərəstişkarlar və potensial alıcılar üçün sərgilənəcək.

Kopyalandı