Özbəkistan beynəlxalq kino layihələrini cəlb etmək üçün güzəşt proqramını genişləndirir

Özbəkistan beynəlxalq kino istehsalçılarını ölkəyə cəlb etmək və kino vasitəsilə turizmin inkişafına təkan vermək məqsədilə xarici layihələr üçün 4 milyard soma qədər (təxminən 315 min ABŞ dollar) xərc kompensasiyası nəzərdə tutan yeni proqramı təsdiqləyib.

Nazirlər Kabineti xarici film və televiziya layihələri üçün mərhələli kompensasiya sistemini tətbiq edən yeni qaydalar qəbul edib. Proqrama əsasən, prodüserlər qoyduqları sərmayənin həcmindən asılı olaraq, ölkə daxilində çəkilişlərə sərf olunan uyğun xərclərin 10-25 faizini geri ala biləcəklər. Hər bir layihə üzrə kompensasiyanın yuxarı həddi 4 milyard som təşkil edəcək.

Müraciətlər noyabrın 1-dək istifadəyə verilməsi planlaşdırılan yeni “Film in Uzbekistan” platforması vasitəsilə təqdim ediləcək. Xarici studiyalardan akkreditasiyadan keçmiş yerli prodüser şirkəti ilə əməkdaşlıq etmək və kompensasiyaya uyğun bütün xərcləri təsdiqləyən sənədləri təqdim etmək tələb olunacaq. Yalnız Özbəkistanın vergi rezidentlərindən alınan mal və xidmətlər üzrə xərclər geri ödənişə uyğun hesab ediləcək.

Təşəbbüs Özbəkistanın kino turizmini inkişaf etdirmək və yaradıcı sənayelərə beynəlxalq sərmayə cəlb etmək üzrə daha geniş strategiyasının tərkib hissəsidir. Kompensasiya proqramı ilə yanaşı, xarici studiyaların ölkədə çəkiliş aparmasını asanlaşdırmaq məqsədilə çəkiliş məkanları, tarixi abidələr və istehsal infrastrukturu barədə ümummilli kataloqun dərc edilməsi də planlaşdırılır.

Qlobal təcrübəyə əsaslanan model

Film istehsalı xərclərinin qismən geri qaytarılması proqramları iri beynəlxalq layihələri cəlb etmək üçün ölkələrin istifadə etdiyi əsas rəqabət vasitələrindən birinə çevrilib.

Məsələn, Yeni Zelandiya çəkiliş xərclərinin 20 faizini nağd şəkildə geri qaytarır. Daha geniş iqtisadi fayda yaradan layihələr üçün isə əlavə 5 faizlik güzəşt nəzərdə tutulur. Bu proqram “Üzüklərin hökmdarı”, “Hobbit” və “Avatar” filminin davam hissələri də daxil olmaqla, bir sıra iri layihələrin çəkilişi nəticəsində ölkənin qlobal kino məkanlarından birinə çevrilməsinə kömək edib. Həmin layihələr turizm və film istehsalı sahələrinə milyardlarla dollar həcmində gəlir gətirib.

Böyük Britaniya tələblərə cavab verən film və yüksək büdcəli televiziya layihələri üçün 25 faizlik vergi güzəşti təqdim edir. Bu mexanizm “Disney”, “Warner Bros.” və “Marvel” kimi studiyaların iri layihələrinin ölkəyə cəlb olunmasına şərait yaradıb. Avstraliya çəkiliş xərclərinin 40 faizədək hissəsini geri qaytarır. Hindistanda isə tələblərə uyğun beynəlxalq layihələr üçün kompensasiya 40 faizədək təşkil edir. Bu göstəricilər film sənayesinə sərmayə cəlb etmək uğrunda qlobal rəqabətin getdikcə gücləndiyini göstərir.

 Əvvəlki islahatların davamı

Özbəkistan xarici kino layihələri üçün çəkiliş xərclərinin 20 faizinin geri qaytarılmasını nəzərdə tutan mexanizmi ilk dəfə 2020-ci ildə tətbiq edib. Yeni qaydalar maksimum kompensasiya dərəcəsini 25 faizə, hər layihə üzrə ödəniş həddini isə 4 milyard soma çatdırmaqla proqramı əhəmiyyətli dərəcədə genişləndirir. Bununla da ölkənin qlobal film istehsalı bazarında rəqabət qabiliyyətinin artırılması hədəflənir.

Rəsmilər hesab edirlər ki, təşəbbüs beynəlxalq kino istehsalçılarını Özbəkistana cəlb etməklə yanaşı, yerli prodüser şirkətləri üçün yeni iş imkanları yaradacaq, kino sənayesində peşəkar bacarıqların inkişafına təkan verəcək, həmçinin ölkənin tarixi məkanları və təbiət mənzərələrinin dünya auditoriyasına tanıdılmasına xidmət edəcək.

Teqlər

Özbəkistan film film sənayesi kino 4 milyard som Film in Uzbekistan