Torontoda keçirilən küçə festivalında atışma olub, ölən və yaralananlar var

Toronto polisinin məlumatına görə, ötən gün şəhərdə keçirilən “Salsa on St. Clair” festivalında baş verən atışma nəticəsində iki kişi həlak olub, daha altı nəfər yaralanıb.

Hadisə yerli vaxtla saat 20:00-dan sonra St. Clair prospektinin qərb hissəsi ilə Arlington prospektinin kəsişməsi yaxınlığında baş verib. İllik festivala minlərlə insan toplaşmışdı.

Polis bildirib ki, insident bir-birini hədəfə aldığı ehtimal edilən şəxslər arasında atışma zamanı baş verib. Kişilərdən biri hadisə yerində, digəri isə daha sonra xəstəxanada ölüb. Onların kimliyi açıqlanmayıb.

Əvvəlcə dörd nəfər ağır xəsarətlə xəstəxanaya yerləşdirilib. Polis sonradan daha iki yaralının müəyyən edildiyini bildirib. Bununla da yaralananların ümumi sayı altıya çatıb.

Toronto polis rəisinin müavini Frenk Barredo atışmanı pisləyərək zorakılığı “açıq-aşkar” və “iyrənc” adlandırıb. O, əhali üçün yaranan təhlükənin qəbuledilməz olduğunu bildirib.

Polis əməkdaşları iki odlu silah aşkar ediblər və hadisə yerində araşdırma aparırlar. Hələlik saxlanılan yoxdur.

Polis əvvəlcə silahlı şəxsin ərazidə aktiv ola biləcəyi barədə xəbərdarlıq etsə də, daha sonra bunun aktiv silahlı hücum halı olmadığını açıqlayıb.

Liderlər hücumu qınayıblar

Sosial şəbəkələrdə yayılan görüntülərdə təcili yardım əməkdaşları yaralılara yardım göstərərkən festival iştirakçılarının hadisə yerindən qaçdığı görünür.

Toronto meri Olivia Çou atışmanı “düşünülməmiş və məsuliyyətsiz zorakılıq aktı” adlandıraraq pisləyib. Baş nazir Mark Karni isə hücumdan dəhşətə gəldiyini bildirib və hadisəyə ilk müdaxilə edən xidmət əməkdaşlarına təşəkkür edib.

Kanadanın ən böyük Latın Amerikası mədəniyyət festivallarından biri hesab olunan  “Salsa on St. Clair” hər il iki gün ərzində keçirilir.

Kopyalandı