canlı ABŞ İrana ardıcıl 10-cu gecə zərbələr endirib, İran Bəhreyn və Küveytə hücum edib

Səudiyyə nefti daşıyan tankerlər husilərin təhdidindən sonra istiqamət dəyişib

Səudiyyə Ərəbistanı nefti daşıyan və Çinlə Hindistana gedən iki tanker iyulun 21-də Qırmızı dənizdə geri dönərək Süveyş kanalına doğru istiqamət götürüb. Bu barədə LSEG-in dəniz nəqliyyatı məlumatlarında qeyd olunur.

Bu addım Yəmənin İranla müttəfiq husi qruplaşmasının Səudiyyə Ərəbistanına qarşı dəniz blokadası tətbiq edəcəyi barədə xəbərdarlıq etməsindən sonra atılıb.

Husilərin ABŞ-İran münaqişəsinin təsirlərini Körfəz regionundan kənara yaymaqla bağlı təhdidləri yeni narahatlıqlar yaradıb. Bu narahatlıqlar dünya enerji təchizatı və ticarət marşrutlarında mümkün pozuntularla bağlıdır.

ABŞ maliyyə naziri: Çin İran neftinin alışını kəskin azaldıb

Çin İran neftinin alışını əhəmiyyətli dərəcədə azaldıb. Bu barədə ABŞ maliyyə naziri Skot Bessent bildirib.

O, “Fox Business” telekanalına açıqlamasında ABŞ-ın rəsmi Tehranın enerji ixracına qarşı davam edən təzyiqləri fonunda idxalın əhəmiyyətli dərəcədə azaldığını bildirib.

Fransa Tehrandakı səfirlik əməkdaşlarının sayını azaltmağı nəzərdən keçirir

Fransa Tehrandakı səfirliyində əməkdaşların sayının azaldılması məsələsini nəzərdən keçirir. Bu barədə Londonda yerləşən “Iran International” xəbər saytı məlumat yayıb.

Buna səbəb iki fransalı diplomatın İran təhlükəsizlik qüvvələri tərəfindən saxlanıldığı və sorğu-sual edildiyi barədə iddialardır.

Xəbər saytının mənbələrinə görə, hadisə zamanı diplomatların ən azı biri fiziki zorakılığa məruz qalıb.

Küveyt: İran bir neçə elektrik və su qurğusuna hücum edib

İran iyulun 21-də Küveytin bir neçə elektrik stansiyasına və su təmizləyici qurğusuna zərbələr endirib. Bu barədə Küveytin Elektrik Nazirliyi məlumat yayıb.

Nazirlik bildirib ki, hücumlar nəticəsində yanğınlar baş verib və bərpa işləri davam etdirilir.

İran HDQ komandanı: "Tehran ABŞ və İsrailin “təcavüzünə” qarşı mübarizə aparır"

Rəsmi Tehran ABŞ və İsrailin İran hərbçilərinə qarşı həyata keçirdiyini “təcavüzə” cavab verməyə çalışır. Bunun üçün hüquqi və beynəlxalq mexanizmlərdən istifadə etdiyini bildirib. Bu barədə İran Hərbi Dəniz Qüvvələrinin komandanı, kontr-admiral Şəhram İrani məlumat verib. O, açıqlamanı mərkəzi Qum şəhərində keçirilən mərasim zamanı verib.

Husilər Səudiyyə limanlarına gedən gəmiləri təhdid edib

Yəmənin bir hissəsinə nəzarət edən husi qruplaşması bölgədə fəaliyyət göstərən şirkətlərə yazılı xəbərdarlıq edib. Qruplaşma göndərdiyi elektron məktubda Səudiyyə Ərəbistanının limanlarına gedən və oradan çıxan istənilən gəmiyə hücum edə biləcəyini bildirib.

Mesajda qeyd olunub ki, gəmilər “istənilən yerdə hədəfə alına bilər”.

Qruplaşma həmçinin gəmiçilik şirkətlərinə Səudiyyə limanlarında yük yükləməmək və boşaltmamaq barədə xəbərdarlıq edib.

İranda yaralı etirazçılara tibbi yardım göstərən iki nəfər ölüm cəzasına məhkum edilib

İran məhkəməsi 2026-cı ilin yanvar etirazları zamanı yaralanan şəxslərə tibbi yardım göstərən iki kişini ölüm cəzasına məhkum edib. Bu barədə Norveçdə yerləşən “Iran Human Rights” QHT-si məlumat verib.

23 yaşlı Mojtaba Dehbandi və 27 yaşlı Kianuş Hamzezadə-Kazerouni İranın mərkəzində yerləşən Şiraz şəhərinin sakinləridir. Onlar Şiraz İnqilab Məhkəməsinin qərarı ilə ölüm cəzasına məhkum ediliblər.

“İran İnsan Haqları” təşkilatına məlumat verən mənbə bildirib:

“Mojtaba qardaşı ilə birlikdə pərdə satışı ilə məşğul idi, Kianuş isə ərzaq mağazasında işləyirdi. Onlar yaralanan bir neçə etirazçını tibbi yardım göstərmək üçün mağazaya gətirmişdilər.

Onlar mağazanın daxilindəki müşahidə kameraları vasitəsilə müəyyən ediliblər. Səkkiz gün sonra həmin şəxslər evlərində saxlanılıb. Bu zaman hələ də mağazada olan dörd yaralı etirazçı da həbs edilib”.

QHT əlavə edib ki, 2026-cı ilin yanvar etirazları ilə bağlı martın 19-dan bəri azı 23 nümayişçi edam olunub.

Livan ordusu İsrail qüvvələrinin geri çəkildiyi qəsəbədə patrul xidmətinə başlayıb

İsrail qüvvələrinin Livanda nəzarət etdiyi ərazilərdən geri çəkilməsindən sonra Livan ordusu həmin bölgələrdə patrul xidmətinə başlayıb. Ölkənin yüksək rütbəli təhlükəsizlik rəsmisinin məlumatına görə, livanlı hərbçilər ölkənin cənubundakı Zəvtər əl-Qərbiyyə qəsəbəsində təhlükəsizliyi təmin etmək üçün fəaliyyət göstərir.

Livanlıların bölgəyə yerləşdirilməsi ABŞ-ın vasitəçiliyi ilə hazırlanan plana uyğun həyata keçirilir. Plana əsasən, İsrail qüvvələri mərhələli şəkildə ərazidən çıxarılacaq və onların yerini Livan ordusu tutacaq.

Daha sonra Livan hərbçiləri “Hizbullah” üzvlərinin silahlarını müsadirə edəcək.

Livan Prezidenti Cozef Aun iyulun 21-də Vaşinqtonda ABŞ Prezidenti Donald Trampla görüşəcək.

İran zərbəsi nəticəsində İordaniyada ABŞ hərbçilərinin öldüyü bildirilir

İordaniyada ABŞ hərbçilərinin yerləşdiyi obyektə endirilən zərbə nəticəsində bir neçə ABŞ hərbçisi həyatını itirib. Bu barədə "Fars" xəbər agentliyi SEPAH-a istinadən məlumat yayıb.

Əlavə təfərrüatlar açıqlanmayıb. ABŞ tərəfi isə hələlik məsələ ilə bağlı açıqlama verməyib.

Daha əvvəl SEPAH İordaniyada yerləşən ABŞ hərbi obyektinə hücum həyata keçirdiyini bildirib.

İordaniya beş İran dronunu zərərsizləşdirib

İordaniya silahlı qüvvələri beş İran dronunu zərərsizləşdirib. Bu barədə ölkənin dövlət xəbər agentliyi məlumat verib. Hadisə Yaxın Şərqdə artan gərginlik və hərbi fəallığın artdığı bir vaxtda baş verib.

İran: Bəhreyndə ABŞ hərbçilərinin istifadə etdiyi obyektlərə zərbələr endirilib

İran ordusu Bəhreyndəki Şeyx İsa aviabazasında ABŞ hərbçilərinin istifadə etdiyi yaşayış obyektlərinə hücum həyata keçirdiyini bildirib. Bu barədə ölkənin dövlət mediası xəbər verib.

Vasitəçilərin atəşkəs təklifi fonunda neft qiymətləri ucuzlaşıb

Çərşənbə axşamı bazarların ABŞ və İran arasında olası atəşkəs danışıqları barədə məlumatlarla bərpa olunan hücumlar və artan regional gərginliyi tərəziyə qoyması nəticəsində neft qiymətləri enib. "Brent" markalı neft 1,1% ucuzlaşaraq bareli 88,26 dollara, ABŞ-nin WTI xam nefti isə 0,9% enərək 82,50 dollara düşüb.

İranın yüksəkrütbəli rəsmisi Tehranın münaqişəyə son qoyacaq razılaşmanı bərpa etmək məqsədilə vasitəçilərdən 10 günlük atəşkəs təklifi aldığını bildirib. Lakin ABŞ-nin İrana yeni zərbələri, İran qüvvələrinin regiondakı ABŞ obyektlərinə hücumları və Hörmüz boğazında bir tankerlə bağlı yaşanan insident enerji təchizatına dair narahatlıqları artırmaqda davam edir.

Bazarlar, həmçinin Yəmən husilərinin Səudiyyə Ərəbistanına dəniz blokadası tətbiq etmək təhdidlərini də diqqətlə izləyir. Bu addım qlobal neft ticarətini daha da kəskin şəkildə axsatmaq riski daşıyır.

İran Hörmüz boğazının yenidən açılmasının təhlükəsizlik şəraitindən asılı olduğunu bildirib

İranın "Fars" xəbər agentliyi hərbi mənbəyə istinadən xəbər verir ki, Hörmüz boğazının gəmilərin gediş-gəlişi üçün yenidən açılması ilə bağlı istənilən qərar təhlükəsizlik mülahizələri nəzərə alınmaqla veriləcək.

İran BMT Baş katibini ABŞ-nin atom elektrik stansiyasına zərbəsini pisləməyə çağırıb

İran Birləşmiş Millətlər Təşkilatının (BMT) Baş katibini ölkənin cənub-qərbindəki Xuzistan əyalətində tikilməkdə olan atom elektrik stansiyasına ABŞ tərəfindən endirilən zərbəni pisləməyə çağırıb.

ABŞ İrana qarşı həyata keçirdiyi son zərbələr dalğasının ardıcıl səkkizinci gecəsində tikintisi qismən tamamlanmış "Darxovin" Atom Elektrik Stansiyasını vurub.

İranın BMT-dəki daimi nümayəndəsi Əmir Səid İrəvani BMT Baş katibinin "Amerika Birləşmiş Ştatlarının beynəlxalq zəmanət (təhlükəsizlik) altında olan Darxovin Atom Elektrik Stansiyasına silahlı hücumunu birmənalı şəkildə pisləməli olduğunu" bəyan edib.

Diplomatik sülh cəhdlərinin bərpası fonunda neft qiymətləri ucuzlaşır

Vasitəçilərin Tehran və Vaşinqton arasında 10 günlük atəşkəs təklif etməsi barədə xəbərlər fonunda neft qiymətləri enib. Bu təklif iki ölkə arasında sülhü təmin etmək məqsədilə iyun ayında imzalanmış Anlaşma Memorandumunu yenidən canlandırmaq üçün həyata keçirilən geniş diplomatik təşəbbüsün bir hissəsidir.

Bab əl-Məndəb boğazında gəmi hərəkəti davam edir

Qırmızı dənizin cənub girişində yerləşən Bab əl-Məndəb boğazında iyulun 21-də səhər saatlarında gəmi hərəkəti davam edib. Görüntülər su marşrutunda hərəkətin normal qaydada davam etdiyini göstərir.

Bu qərar Səudiyyə gəmilərinin həmin dəniz dəhlizindən keçməsinə mane olmağı nəzərdə tutur. 

İranın dəstəklədiyi husilərin sözçüsü bildirib ki, bu addım Səudiyyə Ərəbistanının husilərin nəzarətində olan Yəmənin şimal-qərbindəki liman və hava limanlarına tətbiq etdiyi blokadaya cavab olaraq atılıb.

Bab əl-Məndəb boğazı və Ədən körfəzi ətrafında gəmi hərəkətini göstərən izləmə görüntüləri. 21 iyul 2026

Reuters

SEPAH: Bəhreyndə Amazon-a aid infrastruktura zərbə endirilib

İran İslam İnqilabı Keşikçiləri Korpusu (SEPAH) ABŞ şirkəti “Amazon”a məxsus infrastrukturu hədəf aldığını bildirib.

“Tasnim” xəbər agentliyi  SEPAH-a istinadən yaydığı məlumata görə, qurum Bəhreyndə yerləşən ABŞ şirkətinə məxsus obyektlərə zərbə endirib.

SEPAH həmçinin İordaniyada yerləşən ABŞ hərbi obyektinə hücum həyata keçirdiyini açıqlayıb.

İran mediasının məlumatı: ABŞ mərmiləri İranın cənub-qərbindəki obyektə düşüb

İranın dövlət xəbər agentliyi olan İRNA şəhər qubernatoruna istinadən xəbər verir ki, ABŞ mərmiləri ölkənin cənub-qərbindəki Abdanan şəhərinin kənarında yerləşən mülki obyektə düşüb. Tələfat barədə məlumat verilməyib.

ABŞ İrana ardıcıl 10-cu gecə zərbələr endirib, İran Bəhreyn və Küveytə hücum edib

İranın İslam İnqilabı Keşikçiləri Korpusu (SEPAH) Küveytdəki hərbi bazalara zərbələr endirərək, "Əs-Salim" aviabazasında yanacaq çənlərini və hava hücumundan müdafiə sistemlərini, həmçinin "Əhməd əl-Cabir" aviabazasındakı radar sistemini məhv etdiyini bildirib.

SEPAH Bəhreynin ikinci ən böyük şəhəri olan Məhərrəqdəki radar və hava hücumundan müdafiə sistemi də daxil olmaqla ABŞ hərbi texnikasının, eləcə də Bəhreynin Riffa şəhərindəki hava hücumundan müdafiə sistemlərinin də hədəf alındığını qeyd edib.

Bu arada ABŞ Mərkəzi Komandanlığı İrana qarşı ardıcıl 10-cu gecə zərbələrini yekunlaşdırdığını, İranın hərbi komandanlıq mərkəzlərini, dəniz imkanlarını, raket və PUA buraxılış məntəqələrini, o cümlədən hava hücumundan müdafiə sistemlərini vurduğunu açıqlayıb.

Digər tərəfdən, SEPAH Hörmüz boğazını keçməyə cəhd edən iki neft tankerinin partlayışlardan sonra alovlandığını bildirib.