İtaliyada polis mərakeşli iş adamının ölümü ilə bağlı etirazlara müdaxilə edib

İtaliyanın Bolonya şəhərində mərakeşli iş adamının ölümü ilə bağlı keçirilən etiraz aksiyalarında polis nümayişçilərə müdaxilə edib. Asayiş keşikçiləri etirazçıları dağıtmaq üçün bibər qazı və su şırnaqlarından istifadə edib. Hadisələr nəticəsində 11 nümayişçi və polis əməkdaşı xəsarət alıb.

Yerli KİV-in məlumatına görə, aksiyalar zamanı iki avtomobil yandırılıb, küçələrdə velosipedlərdən istifadə olunmaqla barrikadalar qurulub.

Mərakeş əsilli Abderrahim Fakir kiçik yükdaşıma və təmizlik şirkəti idarə edirdi. O, iyulun 19-da polis əməkdaşlarının aqressiv davrandığı bildirilən Fakiri saxlamağa çalışdığı zaman baş verən insidentdə həyatını itirib. Prokurorluq 42 yaşlı şəxsin ölümü ilə bağlı araşdırmaya başlayıb.

Qonşulardan birinin çəkdiyi görüntülərdə Fakirin yerə üzü üstə uzandığı, kömək istədiyi və nəfəs almaqda çətinlik çəkdiyi görünür. Həmin vaxt iki polis əməkdaşı onu nəzarətdə saxlayıb.

Bildirilir ki, polis əvvəlcə Fakiri sakitləşdirməyə çalışıb. Daha sonra o, aqressiv şəkildə davrandığından ona qarşı bibər qazından istifadə edilib. Fakir əlləri qandallanmaq üçün yerə uzadılaraq nəzarətdə saxlanılıb.

İyulun 20-də axşam saatlarında keçirilən etirazlar zamanı nümayişçilərdən biri şəhərdəki polis binasının yaxınlığına fişəng atıb. Digər şəxslər isə əllərində Fakirin fotosunu tutaraq meydanda əyləşiblər.

Fakirin bacısı Xədicə iyulun 19-da keçirilən ilk aksiyalar zamanı jurnalistlərə qardaşı üçün “ədalət” tələb etdiyini bildirib.

“Onlar qardaşımı soyuqqanlı şəkildə öldürdülər”, – deyə o əlavə edib.

İtaliyanın Baş naziri Giorgia Meloni hökumətində Avropa məsələləri naziri Tommaso Foti etirazlar zamanı səsləndirilən “polis qatilləri” şüarlarını “utancverici” adlandırıb.

İtaliyanın daxili işlər naziri Matteo Piantedosi bildirib ki, istintaqın faktları müəyyənləşdirəcəyinə əmindir. O, araşdırmanın hadisənin necə baş verdiyini aydınlaşdıracağına inandığını qeyd edib.

Piantedosi həmçinin Bolonyanın meri Matteo Leporenin hadisə ilə bağlı nümayiş təşkil etmək qərarını tənqid edib.

“Etiraz çağırışı səhv addım idi. Bəzi insanlar fərdi şəxsin ölümündən istifadə etmək fürsətini heç vaxt əldən vermirlər”, – deyə o bildirib.

Lepore isə Bolonyanın “birləşmiş qalacağını” deyib və şəhərin Piazza Nettuno meydanında təşkil olunan toplaşmanı “sakit düşünmək və ictimai iştirak üçün imkan” kimi qiymətləndirib.

Bolonya polisi bildirib ki, hadisəyə müdaxilə edən əməkdaşların bədən kameralarından əldə olunan görüntülər istintaq orqanlarına təqdim ediləcək

Teqlər

İtaliya etirazlar miqrant polis bibər qazı Melloni Bolonya siyasət İtaliya