Türkiyə və Suriyanın ticarət hədəfi 10 milyard dollardır

Türkiyə və Suriya Əsəd hakimiyyətindən sonrakı dövrdə iqtisadi əlaqələri gücləndirərək illik ticarət dövriyyəsini 10 milyard dollara çatdırmağı hədəfləyir.

Türkiyənin ticarət naziri Ömər Bolat bu barədə çərşənbə günü Ankarada keçirilən Ticarət və İnvestisiya Forumu çərçivəsində Suriyanın Gömrük və Sərhəd-Keçid Məntəqələri İdarəsinin rəhbəri Quteybə Bədəvi ilə görüşündən sonra bildirib.

Bolatın sözlərinə görə 2025-ci ildə Türkiyə ilə Suriya arasında ticarət dövriyyəsi rekord səviyyəyə – 3,7 milyard dollara yüksəlib. O vurğulayıb ki, Türkiyə Prezidenti Rəcəb Tayyib Ərdoğan və Suriya Prezidenti Əhməd Əl Şaraanın müəyyən etdiyi 10 milyard dollarlıq ticarət hədəfinə nail olmaq üçün hər iki ölkə qətiyyət nümayiş etdirir.

Bolat bildirib ki, görüşdə gömrük rüsumları, Gömrük Komitəsinin fəaliyyəti və sərhəd-keçid məntəqələrində əməkdaşlığın genişləndirilməsi əsas müzakirə mövzuları olub.

Ankara, xüsusilə Türkiyənin Qaziantep şəhəri ilə Suriyanın şimalındakı Hələb arasında sərhədyanı ticarəti və iqtisadi əməkdaşlığı daha da genişləndirməyi qarşısına məqsəd qoyub.

2024-cü ilin sonlarında Suriyada Bəşər Əsəd hakimiyyətinin süqutundan sonra Ankara ilə Dəməşq arasında münasibətlər yeni mərhələyə qədəm qoyub. Bu dəyişiklik iki ölkə arasında iqtisadi əlaqələrin sürətlə genişlənməsinə təkan verib.

Türkiyə Suriyada 13 il davam edən münaqişə boyunca müxalif qüvvələrin əsas dəstəkçilərindən biri olub. Ankara münaqişənin əvvəlində Bəşər Əsəd hökuməti ilə diplomatik münasibətləri kəsmişdi.

Münasibətlərdə yeni dövr

Əsəd hakimiyyətinin süqutundan sonra Ankara Suriyanın yeni rəhbərliyi ilə sıx əməkdaşlıq quraraq Dəməşqdə formalaşan yeni hökumətin əsas siyasi və iqtisadi tərəfdaşlarından birinə çevrilib.

Türkiyə rəsmiləri dəfələrlə Suriyanın ərazi bütövlüyünə və siyasi sabitliyinə dəstəklərini ifadə ediblər. Onlar, eyni zamanda ölkənin yenidən qurulması prosesində Türkiyənin aparıcı rol oynamağa hazır olduğunu vurğulayıblar.

Ankara, həmçinin Suriyaya qarşı tətbiq olunan beynəlxalq sanksiyaların ləğvinə çağıraraq bildirib ki, bu məhdudiyyətlər müharibənin ağır fəsadları ilə üzləşən ölkənin iqtisadi bərpasına mane ola bilər.

Türkiyə şirkətləri Suriyada yenidənqurma layihələrində iştirak etməyə hazırlaşırlar. Xüsusilə infrastruktur, istehsal, nəqliyyat və enerji sahələri əsas əməkdaşlıq istiqamətləri kimi ön plana çıxır. Suriya 10 ildən artıq davam edən münaqişədən sonra ölkəni yenidən qurmağa çalışır.

Türkiyə hələ də milyonlarla suriyalıya ev sahibliyi edir. Bununla belə, Əsəd rejiminin devrilməsindən sonra ötən bir ildən artıq müddətdə yüz minlərlə suriyalı öz evlərinə qayıdıb.

Rəsmi Ankaranın bildirdiyinə görə iqtisadi dirçəliş və təhlükəsizliyin yaxşılaşması daha çox suriyalının könüllü şəkildə vətənə qayıtması üçün zəruri şərait yaradır.

Türkiyə ilə Suriya təhlükəsizlik və enerji sahələrində də əməkdaşlığı genişləndirir. Türkiyə rəsmiləri sərhədyanı ticarətin asanlaşdırılması və nəqliyyat əlaqələrinin bərpasının iki ölkə arasında əməkdaşlığın inkişafı baxımından mühüm əhəmiyyət daşıdığını vurğulayırlar.

Jurnalistlərə açıqlama verən Bolat bildirib ki, Ankara regionun böyük iqtisadi potensialını üzə çıxarmaq məqsədilə ticarətə mane olan mövcud əngəllərin aradan qaldırılması üçün Suriya hakimiyyəti ilə sıx əməkdaşlığı davam etdirəcək.

Ankara hesab edir ki, Suriya ilə iqtisadi inteqrasiyanın dərinləşdirilməsi yalnız yeni biznes və investisiya imkanları yaratmır, həm də sərhədin hər iki tərəfində sabitliyin möhkəmlənməsinə və insanların həyat şəraitinin yaxşılaşmasına mühüm töhfə verir.

Kopyalandı