Braziliyanın sabiq prezidentinin oğlu prezidentlik yarışına başlayıb

Braziliyalı senator Flavio Bolsonaro oktyabrda keçiriləcək prezident seçkiləri üçün seçki kampaniyasına start verib. 

Hazırkı Prezident Luiz İnasio Lula da Silvaya qarşı kampaniya aparan Flavio Bolsonaro vergilərin azaldılacağını, cinayətkarlığa qarşı mübarizənin gücləndiriləcəyini və atasının siyasi xəttini davam etdirəcəyini vəd edib.

Sao Pauloda keçirilən təqdimat mərasimində Argentina Prezidenti Xavyer Miley ona dəstək verib. Tədbir zamanı İsrail Baş naziri Benyamin Netanyahunun video müraciəti də yayımlanıb.

Tərəfdarlarına müraciət edən Flavio Bolsonaro özünü atası Jair Bolsonaronun siyasi varisi kimi təqdim edib.

Miley Lula hökumətini tənqid edib

Argentina Prezidenti Xavyer Miley kampaniyanın təqdimatında iştirak edərək Lula hökumətini tənqid edib.

“Biz sosializmin yalanlarına qarşı mövqeyimizi hər yerdə ifadə etməyə davam edəcəyik”, — deyə Miley bildirib. O, Bolsonaro ailəsinin Braziliyanı sosializmdən “xilas edə biləcəyini” deyib.

Lula administrasiyası isə tədbirlə bağlı açıqlama verməyib.

Sorğulara görə Lula öndədir

Dəstəklərə baxmayaraq, Flavio Bolsonaro seçki yarışına Luladan geridə başlayır. İyulun 24-də açıqlanan sorğulardan birinə görə, seçkilərin ikinci turu keçirilsə, Lula 48 faiz səslə Flavio Bolsonaronu 43 faizlə məğlub edə bilər. Senator sağ-mərkəz partiyalarının dəstəyini qazanmaqda da çətinlik çəkir.

Bir çox partiya onun kampaniyasına qoşulmaq əvəzinə neytral mövqe tutur. Flavio Bolsonaronun Donald Trampla yaxın münasibətləri də diqqət çəkir. Rəsmi Vaşinqtonun Braziliya mallarına tariflər tətbiq etməsindən sonra bu əlaqələr müzakirə mövzusuna çevrilib.

Braziliya ABŞ rəsmilərinin səfərinə etiraz edib

Kampaniyanın başladığı vaxt Braziliya Tramp administrasiyasının iki rəsmisinə viza verməyib. Rəsmilər bildiriblər ki, qərarın səbəbi onların səfərinin ölkənin seçki sisteminə inamı zəiflətmək üçün istifadə oluna biləcəyi ilə bağlı narahatlıqlardır.

Nümayəndə heyətinə ABŞ Dövlət Departamentinin Demokratiya, İnsan Haqları və Əmək Bürosundan Rayli M. Barns və Samuel Samson daxil idi.

ABŞ Dövlət Departamenti isə səfərin planlaşdırıldığı kimi iyulun 27-30-da keçiriləcəyini bildirib. Qurum açıqlayıb ki, rəsmilər hökumət nümayəndələri, dini liderlər və vətəndaş cəmiyyəti ilə seçki şəffaflığı, dini azadlıq və ifadə azadlığını müzakirə edəcək.

Rəsmi Vaşinqton səfərin Braziliya seçkilərinə müdaxilə məqsədi daşıdığı barədə iddiaları “əsassız” adlandırıb.

Seçki sistemi yenidən müzakirə mövzusudur

Braziliyada elektron səsvermə sistemi ilə bağlı mübahisələr yenidən gündəmə gəlib.

2022-ci il seçkilərindən əvvəl Jair Bolsonaro elektron səsvermə maşınlarının etibarlılığını şübhə altına alıb, lakin bununla bağlı sübut təqdim etməyib. Daha sonra Braziliya Seçki Məhkəməsi onun vəzifəsindən sui-istifadə etdiyini müəyyən edib və 2030-cu ilə qədər seçkilərdə iştirakını qadağan edib.

Flavio Bolsonaro isə oktyabr seçkilərini izləmək üçün xarici müşahidəçilərin göndərilməsinə çağırıb.

Teqlər

Flavio Bolsonaro Jair Bolsonaro Luiz Inasio Lula da Silva Braziliya prezident seçkiləri Braziliya siyasəti seçki kampaniyası