İran Xəzər dənizindəki gəmi hücumuna görə Ukraynanı cavab tədbirləri ilə hədələyib

İranın Xarici İşlər naziri Abbas Əraqçi şənbə günü Xəzər dənizində İranın ticarət gəmisinə Ukrayna tərəfindən edilən və bir dənizçinin ölümü ilə nəticələnən hücumdan sonra cavab tədbirləri görüləcəyi barədə xəbərdarlıq edib.

Əraqçi Avropa İttifaqının diplomatik xidmətinin rəhbəri Kaya Kallas və Rusiyanın Xarici İşlər naziri Sergey Lavrovla telefon danışıqlarında bu insidentin cavabsız qalmayacağını vurğulayıb:

"Aİ-nin ali nümayəndəsi Kallas və XİN naziri Lavrovla danışıqlarda Kiyevin bu addımının cavabsız qala bilməyəcəyini aydın şəkildə bildirdim".

 

İranlı nazir hücumun Avropanı ABŞ-İsrail və İran münaqişəsinə cəlb etmək məqsədilə "İsrailin tapşırığı ilə" həyata keçirildiyini iddia edib və bunun Birləşmiş Millətlər Təşkilatının prinsiplərinin açıq-aşkar pozulması olduğunu əlavə edib.

İsrail bu ittihamlara birbaşa cavab verməsə də, ölkənin "Channel 12" telekanalı Ukraynanın İsraildəki səfirinə istinadən gəmilərin Rusiyaya İran silahları daşıdığını bildirib. İran XİN-in məlumatına görə, şənbə günü sübh saatlarında gəmiyə edilən hücum partlayışa səbəb olub, nəticədə bir dənizçi həlak olub, digərləri isə xəsarət alıb.

Ukraynanın cavabı

Ukrayna Prezidenti Volodimir Zelenski isə Kiyev qüvvələrinin Xəzər dənizində Rusiya hərbi gəmisinə və İranla bağlı hərbi yüklərin daşınmasında istifadə olunan gəmilərə zərbə endirildiyini bəyan edib. Zelenski "X" hesabında "Xəzər dənizində uzaqmənzilli zərbələrlə çox güclü nəticələr əldə etdik" deyə qeyd edib.

 

İranın rəsmi İRNA agentliyinin məlumatına görə, ölkənin Xarici İşlər Nazirliyi hadisəni düşmənçilik və cinayət adlandıraraq etiraz bildirmək üçün Ukraynanın Tehrandakı müvəqqəti işlər vəkilini nazirliyə çağırıb. İranın bu bəyanatı Zelenskinin Rusiyanın Yaxın Şərqdəki zərbələri istiqamətləndirmək üçün İrana peyk müşahidə məlumatlarını ötürdüyünü bildirməsi ilə eyni vaxta təsadüf edib.

Teqlər

Ukrayna İran Xəzər dənizi gəmi zərbə PUA ölüm