Əfqanıstan və Özbəkistan arasında 200 milyon dollarlıq ticarət anlaşması

Əfqanıstan və Özbəkistan iqtisadi əməkdaşlığı genişləndirmək, ticarət və investisiyaları artırmaq barədə razılığa gəliblər. Bu məqsədlə iyulun 26-da Kabildə keçirilən biznes forumda iki ölkə arasında ümumi dəyəri 200 milyon dollardan çox olan 22 saziş imzalanıb.

Əfqanıstan Sənaye və Ticarət Nazirliyinin məlumatına görə, sazişlər Əfqanıstan-Özbəkistan Biznes Forumu çərçivəsində iki ölkənin özəl sektor nümayəndələri arasında imzalanıb.

Forumda Əfqanıstanın sənaye və ticarət naziri Nuruddin Əzizi, Özbəkistanın Baş nazir müavini Camşid Xocayev, eləcə də hər iki ölkədən dövlət rəsmiləri və biznes nümayəndələri iştirak ediblər.

Əzizi bildirib ki, Özbəkistan nümayəndə heyətinin səfəri iki ölkə arasında artan əlaqələri göstərir. O qeyd edib ki, təxminən 300 iş adamının iştirakı ilə keçirilən görüşlər iqtisadi əməkdaşlıq üçün yeni imkanlar yaradır.

Nazir iki ölkə arasında ticarət dövriyyəsinin daha güclü əməkdaşlıq nəticəsində 5 milyard dollara çatacağına ümid etdiyini bildirib.

Əzizi, həmçinin şirkətləri Əfqanıstana investisiya yatırmağa çağırıb. O bildirib ki, bu, ölkəyə qayıdan əfqan miqrantlar üçün yeni iş yerlərinin yaradılmasına kömək edə bilər.

Nazirlik qeyd edib ki, sınaq məqsədilə təxminən 10 min ton Əfqanıstan pambığı Özbəkistana ixrac olunub. Özbəkistan isə Əfqanıstandan 100 min ton pambıq idxal etməyə razılıq verib.

Xocayev isə iki ölkə arasında əlaqələrin genişləndirilməsini müsbət qiymətləndirib. O bildirib ki, ticarətin inkişafı üçün yeni nəqliyyat yollarının yaradılması vacibdir. Həmçinin güzəştli tariflərin tətbiqi, yükdaşımanın sürətləndirilməsi və logistika mərkəzlərinin qurulması da mühüm əhəmiyyət daşıyır. 

Kopyalandı