canlı Səudiyyə Ərəbistanı İrana bağlı qruplara sərt xəbərdarlıq edib

Kətaib Hizbullah: ABŞ-Səudiyyə Ərəbistanının hücumlarına cavab qaçılmazdır

İrana yaxın İraqdakı “Kətaib Hizbullah” silahlı qruplaşması ABŞ və Səudiyyə Ərəbistanının gecə saatlarında həyata keçirdiyi hücumlara cavabın “qaçılmaz” olduğunu bildirib.

Şiə silahlı qruplaşmasının açıqlamasında deyilir ki, cavab zərbələri Səudiyyə Ərəbistanındakı ABŞ-nin  “alətlərini” hədəf ala bilər. Qruplaşma əlavə edib ki, İraq hökumətinə ölkənin suverenliyini qoruya biləcəyini göstərməsi üçün avqustun 6-dək müddət verib.

ABŞ zərbələrində SEPAH-ın müşavirləri öldürülüb

İran İslam İnqilabı Keşikçiləri Korpusunun (SEPAH) dörd hərbi müşaviri ABŞ və Səudiyyə Ərəbistanının gecə saatlarında İraqa endirdiyi zərbələr nəticəsində öldürülüb.  Bu barədə İranın “Həmşəhri” qəzeti məlumat verib. İran rəsmiləri itkiləri hələ təsdiqləməyib.

İraq Xarici İşlər Nazirliyi ABŞ-Səudiyyə zərbələri ilə bağlı hüquqi addımlar ata bilər

İraqın Baş nazirinin ofisi bildirib ki, İraqın Milli Təhlükəsizlik Şurası ölkənin Xarici İşlər Nazirliyinə ABŞ-Səudiyyə zərbələri ilə bağlı hüquqi addımlar atılması barədə göstəriş verib.

Baş nazirin ofisi qeyd edib ki, öz ərazisindəki hücumlara cavab vermək səlahiyyəti yalnız İraqa məxsusdur və bütün tərəfləri gərginliyi artırmamağa çağırıb.

Donald Tramp İrana qarşı sərt cavab verəcəyini vəd edib

"Fox News" telekanalına verdiyi müsahibədə ABŞ prezidenti Donald Tramp İrana qarşı sərt cavab tədbirləri görəcəyini vəd edib. Bu bəyanat ABŞ ordusunun Tehran tərəfindən Yaxın Şərqdəki Amerika qüvvələrinə doğru atılan çoxsaylı ballistik raketlərin qarşısının alındığını açıqlamasından sonra verilib.

Müsahibə efirə getməsə də, "Fox" kanalının müxbiri Trampın cavabını qısa şəkildə ictimaiyyətə çatdırıb.

Britaniyada İranın sifarişi ilə sui-qəsd planlaşdırdığına görə yeniyetmə məhkum edilib

Norveçli bir yeniyetmə Britaniyada sui-qəsd planlaşdırmaqda təqsirli bilinib. Prokurorluğun məlumatına görə, o, İran hökuməti tərəfindən istifadə olunan İsveç cinayətkar qruplaşması tərəfindən bu işə cəlb edilib.

Hazırda 19 yaşı olan Yohannes Natland ötən ilin mart ayında İngiltərənin şimalındakı Huddersfild şəhərində yerləşən bir otel otağında iki odlu silah və sursatla saxlanılıb.

Prokurorlar bildiriblər ki, Natland Britaniya və ABŞ tərəfindən sanksiyalar tətbiq olunan və İran dövləti ilə əməkdaşlıq edən İsveçin "Foxtrot" cinayətkar şəbəkəsi tərəfindən işə alınıb.

ABŞ hərbçiləri təhlükəsizlik səbəbindən telefonlarını təhvil verə bilərlər

ABŞ ordusu Yaxın Şərqdəki bəzi hərbçilərinin mobil telefonlarının əllərindən alınmasını nəzərdən keçirir. Buna səbəb hərbçilərin internetdə paylaşdığı videoların İranın ABŞ bazalarını müəyyən etməsinə və hədəfə almasına kömək edə biləcəyi ilə bağlı narahatlıqlardır.

İraq milisi ABŞ və Səudiyyə Ərəbistanını təhdid edib

İraqda İrandan dəstək alan "Hərəkat Hizbullah ən-Nücəba" milisi ABŞ və Səudiyyə Ərəbistanına qarşı təhdid dolu bəyanat yayıb. Buna səbəb iki ölkənin gecə saatlarında İraqdakı silahlı qruplaşmalara qarşı birgə aviazərbələr endirməsidir. Qruplaşma hücumlara görə tərəfləri cavab tədbirləri ilə hədələyib.

İraqın Baş naziri Səudiyyə Ərəbistanına səfərini ləğv edib

İraqın Baş naziri Əli əz-Zeydi Səudiyyə Ərəbistanına planlaşdırılan səfərini təxirə salıb. Buna səbəb İrandan dəstək alan iraqlı milislərin Səudiyyə Ərəbistanına hücum etməsi və buna cavab olaraq ABŞ və Səudiyyə qüvvələrinin İraqdakı həmin qruplaşmalara gecə saatlarında endirdiyi cavab zərbələri olub.

Ali al-Zaidi participates in a bilateral meeting with U.S. President Donald Trump (not pictured) in the Oval Office at the White House in Washington, D.C., U.S., 14 July 2026.

Reuters

İsrail "Hizbullah"ı atəşkəsi PUA-larla pozmaqda ittiham edib

İsrail ordusu bildirib ki, "Hizbullah" qruplaşması Livanın cənubundakı Əli ət-Tahir silsiləsi ərazisində İsrailin mühəndis texnikasına qarşı partlayıcı yüklü pilotsuz uçuş aparatı (PUA) ilə hücum həyata keçirib.

İsrail tərəfi bu hadisəni atəşkəs razılaşmasının kobud şəkildə pozulması kimi qiymətləndirib. Ordunun məlumatına görə, hücum nəticəsində İsrail əsgərləri arasında xəsarət alan olmayıb.

Hücumun baş verdiyi Əli ət-Tahir silsiləsi bölgəsində İsrail qüvvələrinin əməliyyatları davam edir. İsrail rəsmiləri bildirib ki, Hizbullahın bu ərazidə mövqelərini gücləndirməsinə və ya İsrail ordusuna qarşı hər hansı bir hücum həyata keçirməsinə icazə verilməyəcək.

Husilər Qırmızı dənizdən keçid rüsumu tətbiq etməyi nəzərdən keçirirlər

Yəmənin bir hissəsinə nəzarət edən husilər Bab əl-Məndəb boğazından keçən kommersiya gəmilərindən rüsum almağı nəzərdən keçirir. Bu barədə hərəkatın regiondakı mənbələri məlumat verir. Belə bir addım qlobal dəniz nəqliyyatında fasilələr yarada və ABŞ və onun  müttəfiqlərinə təzyiqi artıra bilər.

Çinin bayrağı altında üzən “Cosnew Lake” adlı böyük neft tankeri göstərilir. Bu tanker 2026-cı il iyulun 23-də Bab əl-Məndəb boğazından keçərək Qırmızı dənizi tərk edib.

Reuters

Hizbullahın imtinası İsrail-Livan planının icrasını ləngidir

İsrail qüvvələrinin Livanın cənubundan çıxarılmasını nəzərdə tutan plan yubanır. ABŞ-nin dəstəklədiyi bu plan Hizbullahın silahsızlaşdırılmasını da əhatə edir. Rəsmilər bildiriblər ki, danışıqlar çətin davam edir. Onlar Hizbullahın tərki-silah olmaqdan imtina etdiyini qeyd ediblər. Həmçinin prosesin tamamlanmasının bir ildən çox çəkə biləcəyi barədə xəbərdarlıq edilib.

Çin Qırmızı dənizdə gərginliyin azaldılmasına çağırıb

Çin Qırmızı dənizdə tərəfləri fikir ayrılıqlarını dialoq və məsləhətləşmələr yolu ilə həll etməyə çağırıb.

Çin Xarici İşlər Nazirliyinin sözçüsü Mao Nin Pekində keçirilən brifinqdə bildirib ki, Pekin Qırmızı dənizdəki vəziyyəti yaxından izləyir.

O qeyd edib ki, bölgə ölkələrinin suverenliyinə və təhlükəsizliyinə hörmət edilməli, beynəlxalq su yollarında təhlükəsiz və maneəsiz keçid təmin olunmalıdır.

ABŞ və Səudiyyə Ərəbistanının hava zərbələri nəticəsində 20 iraqlı döyüşçü həlak olub

İraqın "Həşdi-Şabi" (Xalq Səfərbərlik Qüvvələri) təşkilatı bəyan edib ki, gecə saatlarında ABŞ və Səudiyyə Ərəbistanının ölkənin bir neçə vilayətindəki qərargahlarına endirdiyi aviazərbələr nəticəsində azı 20 üzvü həlak olub, 32 nəfər isə yaralanıb.

İraq Xəbər Agentliyinin (INA) yaydığı bəyanata görə, hücumlar Bağdad, Vasit, Nineva, Bəsrə, Kərkük, Kərbəla və Diyala vilayətlərindəki obyektlərə zərər vurub. Zərbələr qruplaşmanın qərargahlarına, hərbi texnikasına və avadanlıqlarına ciddi ziyan yetirib.

Xalq Səfərbərlik Qüvvələrindən verilən məlumata görə, dəymiş ziyanın tam miqyasını müəyyən etmək üçün xüsusi komitələr ərazidə qiymətləndirmə işlərini davam etdirir.

İraqın Baş naziri təhlükəsizlik müşavirəsi çağırıb

İraqın Təhlükəsizlik Media Hücrəsinin məlumatına görə, ölkənin Baş naziri Əli əz-Zeydi Səudiyyə Ərəbistanı və ABŞ-nin gecə saatlarında ölkəyə endirdiyi hava zərbələrindən sonra Milli Təhlükəsizlik üzrə Nazirlər Şurasının təcili iclasının çağırılması barədə göstəriş verib.

Silahlı Qüvvələrin Ali Baş Komandanı funksiyasını da yerinə yetirən Əli əz-Zeydi bəyanatında bildirib ki, şuranın təcili toplanması "cərəyan edən təhlükəsizlik hadisələri və bu gün sübh çağı ölkənin məruz qaldığı hava bombardmanı" ilə bağlıdır.

Avropa İttifaqı İranı diplomatiyaya sadiq qalmağa çağırıb

Avropa İttifaqının (Aİ) xarici siyasət üzrə rəhbəri Kaya Kallas İranın xarici işlər naziri Abbas Əraqçi ilə telefon danışığı zamanı Körfəzdəki vəziyyəti və Tehranın Rusiyaya hərbi dəstəyini müzakirə etdiyini bildirib.

K.Kallas qeyd edib ki, Körfəzdə hərbi əməliyyatlara ara verilməsi vasitəçilərə diplomatik həll yolu tapmaq və daha genişmiqyaslı münaqişəyə qayıtmağın qarşısını almaq üçün vaxt qazandıra bilər.

İordaniya hava məkanında İrana məxsus 5 raket vurulub

İordaniya Silahlı Qüvvələri hava hücumundan müdafiə sistemlərinin İrandan atılan və krallığa doğru irəliləyən beş raketi havada vurduğunu açıqlayıb.

Ölkənin rəsmi "Petra" xəbər agentliyinin məlumatına görə, raketlər ordunun müşahidə və monitorinq sistemləri tərəfindən aşkarlanıb. Daha sonra hədəflər Silahlı Qüvvələrin təsdiq edilmiş döyüş qaydalarına uyğun olaraq müdaxilə edilərək məhv edilib.

İran Omanın Hörmüz boğazının birgə idarə olunması təklifini rədd edib

İranın yüksəkrütbəli rəsmisi çərşənbə günü "Reuters" agentliyinə bildirib ki, Tehran Omanın Hörmüz boğazının regional səviyyədə birgə idarə olunması ilə bağlı təklifini rədd edərək, bu təşəbbüsün uğur qazanmaq şansının olmadığını vurğulayıb.

Rəsmi əlavə edib ki, ABŞ və Səudiyyə Ərəbistanı strateji boğazla bağlı "qeyri-real planlarını" irəli sürmək üçün Omana təzyiq göstərməyə çalışırlar.

İran ABŞ-ni regional təhlükəsizliyi təhdid etməkdə ittiham edib

İranın BMT-dəki səfiri və daimi nümayəndəsinin müavini Qulamhüseyn Dərzi ABŞ-ni təcavüzkar adlandıraraq bildirib ki, Birləşmiş Ştatlar və İsrailin davam edən qanunsuz hərəkətləri regional və beynəlxalq sülh, sabitlik və təhlükəsizliyə ciddi təhlükə yaradır.

BMT Təhlükəsizlik Şurasının Yaxın Şərqdəki vəziyyətlə bağlı keçirilən iclasında çıxış edən diplomat deyib:

“Amerika Birləşmiş Ştatları təcavüzkardır. ABŞ İrana qarşı təcavüzkar hərəkətləri ilə BMT Nizamnaməsini və beynəlxalq hüququn fundamental prinsiplərini, o cümlədən güc tətbiqinin və təcavüzün mütləq qadağan olunması müddəasını pozub”.

Səudiyyə Ərəbistanı İraqdakı İranyönümlü qruplaşmalara cavab zərbələri endirib

Səudiyyə Ərəbistanının Müdafiə Nazirliyi ölkə ərazisini hədəf alan dron hücumlarına cavab olaraq ABŞ Mərkəzi Komandanlığı (CENTCOM) ilə koordinasiyalı şəkildə İraqda İranın dəstəklədiyi qruplaşmalara qarşı cavab zərbələri endirdiyini təsdiqləyib.

Səudiyyə Ərəbistanının Xarici İşlər Nazirliyi, Körfəz Əməkdaşlıq Şurası ölkələrinin və İordaniyanın hərbi əməliyyatlara verilən 5 günlük fasilə zamanı gərginliyi azaltmağa çalışdığı bir vaxtda bu hücumların baş verməsini təəssüf doğuran hal kimi qiymətləndirib.

XİN İrana bağlı "terrorçu qruplaşmaları" məsuliyyətsiz şəkildə gərginliyi artırmaqda ittiham edərək bildirib ki, Ər-Riyad özünü müdafiə etmək və uyğun bildiyi vaxtda müvafiq cavab vermək hüququnu özündə saxlayır.

SEPAH Hörmüzdə üç neft tankerini hədəf aldığını bildirib

SEPAH bildirib ki, gəmilər bir neçə saat əvvəl saxlanılıb. Lakin tankerlərin kimə məxsus olduğu, harada saxlanıldığı və səbəb barədə məlumat verilməyib.

SEPAH Hərbi Dəniz Qüvvələri ABŞ-nin bölgədəki hərəkətlərinin cavabsız qalmayacağı barədə xəbərdarlıq edib.

İran raketlərinin İordaniyadakı ABŞ bazalarını hədəf aldığı bildirilir

Yerli və İran mediasının məlumatına görə, İran iyulun 29-u səhər İordaniyada yerləşən ABŞ hərbi bazalarına doğru raketlər atıb.

Məlumatda bildirilir ki, raketlər ölkədəki ABŞ obyektlərini hədəf alıb və hava hücumundan müdafiə sistemləri onları zərərsizləşdirməyə çalışıb.

ABŞ və Səudiyyə İraqda İran tərəfdarlarını hədəf alıb

ABŞ ordusu bildirib ki, Səudiyyə Ərəbistanı ilə birlikdə İraqda İranın dəstəklədiyi silahlı qruplara qarşı əməliyyat keçirib.

ABŞ Mərkəzi Komandanlığı (CENTCOM) bildirib ki, iyulun 28-də həyata keçirilən zərbələr ABŞ qüvvələrinə və Səudiyyə Ərəbistanının enerji obyektlərinə hücum etməkdə ittiham olunan qruplara qarşı yönəlib.