canlı İran Bəhreyn və Küveytdəki ABŞ bazalarına PUA hücumları təşkil etdiyini iddia edir

Tramp: "İsrail Qəzzanın tərksilahı ilə bağlı razılaşmanı dəstəkləyir"

ABŞ Prezidenti Donald Tramp bildirib ki, onun yaratdığı “Sülh Şurası” Qəzzada HƏMAS və digər silahlı Fələstin qruplarının tam tərksilah edilməsi ilə bağlı razılığa gəlib. Onun sözlərinə görə İsrail razılaşmadan çox məmnundur.

Tramp razılaşmanı böyük irəliləyiş adlandırıb. O bildirib ki, plan mərhələli şəkildə həyata keçiriləcək. Tərksilah prosesi irəlilədikcə İsrail qüvvələri Qəzzadan çıxacaq, Beynəlxalq Sabitləşdirmə Qüvvələri isə yeni yaradılacaq Fələstin polisi ilə birlikdə bölgənin təhlükəsizliyini təmin edəcək.

Tramp razılaşmanı Qəzzada müharibənin başa çatdırılması istiqamətində mühüm addım adlandırıb. O əlavə edib ki, HƏMAS-ın tərksilah edilə biləcəyinə az adam inanırdı.

ABŞ maliyyə naziri: "İran aktivləri İran xalqına veriləcək"

ABŞ-nin maliyyə naziri Skott Bessent bildirib ki, Vaşinqton dünyanın müxtəlif ölkələrində İrana məxsus aktivləri axtarır.

Onun sözlərinə görə aşkarlanaraq geri qaytarılan bütün vəsaitlər sonda İran xalqına veriləcək.

Tramp: "İranın vəziyyəti çox pisdir"

ABŞ Prezidenti Donald Tramp Merilend ştatındakı Kemp-Deviddə hökumət üzvləri ilə görüşdə İranın vəziyyətinin çox pis olduğunu bildirib.

“Onlarla münasibət qurmaq çox çətindir. Onlar çox qeyri-səmimi və etibarsız davranıblar. Vəziyyətləri isə çox pisdir”, – Tramp əlavə edib.

Tramp Minnesota kiberhücumunun İranla əlaqəsini rədd edib

Donald Tramp ABŞ mediasında Minnesota ştatının su sistemlərini hədəf alan kiberhücumun İranla əlaqəli olduğuna dair yayılan xəbərləri rədd edib.

“Mən İranı deyil, Minnesotanı günahlandırıram, çünki onlar son dərəcə səriştəsizdirlər. İranın Minnesota ilə maraqlanmaqdan daha böyük problemləri var”, – Tramp Merilend ştatındakı Kemp-Deviddə keçirilən hökumət iclasında bildirib.

İranın qumar şəbəkəsi sanksiyalardan yayınmağa kömək edib

Dünyanın ən böyük qanunsuz qumar şəbəkələrindən biri Dubayda yerləşən ofis vasitəsilə milyonlarla dollar dəyərində kriptovalyuta köçürüb. Bu əməliyyatın İranın sanksiyalardan yayınmaq üçün qurduğu 4 milyard dollarlıq sxemin bir hissəsi olduğu bildirilir.

"Reuters"in nəzərdən keçirdiyi məlumatlara görə, lisenziyasız “Shelbit” kriptovalyuta birjasının rəsmi ünvanı Dubayın ucuz otellərindən birinin üst mərtəbəsində yerləşən ofis kimi göstərilib.

Məlumatlar iki kriptovalyuta araşdırma şirkəti və müstəqil analitik tərəfindən təqdim olunub. Birjanın xaricdə yaşayan iranlı tərəfindən idarə edildiyi bildirilir.

Küveyt ordusu hava məkanına daxil olan PUA-ları məhv edib

Küveyt Silahlı Qüvvələri hava məkanına daxil olan PUA-ların məhv edildiyini bildirib.

Ordunun “X” platformasında yaydığı açıqlamaya görə, qalıqların yerə düşməsi nəticəsində maddi ziyan dəyib, lakin xəsarət alan olmayıb.

Açıqlamada “İran təcavüzü” nəticəsində bir sıra mühüm və hərbi obyektlərin hədəfə alındığı bildirilib.

SEPAH Hörmüz boğazından keçən iki tankeri saxlayıb

İran İslam İnqilabı Keşikçiləri Korpusu (SEPAH) iki tankerin Hörmüz boğazından keçməsinə mane olub, daha dörd gəmini isə istiqamətini dəyişməyə məcbur edib.

Bu barədə SEPAH-a bağlı “Fars” xəbər agentliyi məlumat yayıb.

İraq rəsmisi: "ABŞ-Səudiyyə zərbələri Bağdaddan xəbərsiz həyata keçirilib"

İranın dövlət xəbər agentliyi IRNA-nın məlumatına görə, ABŞ və Səudiyyə Ərəbistanının İraqda İranın dəstəklədiyi şiə silahlı qruplaşmalarına qarşı həyata keçirdiyi hava hücumları barədə Bağdad hökumətinə əvvəlcədən məlumat verilməyib.

İraq hökumətinin sözçüsü Heydər əl-Abudi bildirib ki, hökumət Xalq Səfərbərlik Qüvvələrinin mövqelərinə endirilən zərbələr barədə əvvəlcədən xəbərdar edilməyib.

“Hökumətin İraq ərazisində həyata keçirilən hücumlardan əvvəlcədən xəbəri olmayıb”, – Heydər əl-Abudi cümə axşamı axşam saatlarında İraqın dövlət xəbər agentliyinə bildirib.

Çin XİN Küveytə endirilən zərbə zamanı vətəndaşlarının zərər çəkmədiyini açıqlayıb

Çin Xarici İşlər Nazirliyi İranın Küveytdə Çin şirkətinə məxsus binaya endirdiyi zərbə nəticəsində öz vətəndaşlarının zərər çəkmədiyini bildirib.

Nazirliyin rəsmi sözçüsü Mao Ninq mətbuat brifinqində əlavə edib ki, Pekin Küveyti ölkədəki Çin vətəndaşlarının və qurumlarının təhlükəsizliyini qorumaq üçün effektiv tədbirlər görməyə çağırıb.

Türkiyə Səudiyyə Ərəbistanının rəhbərlik etdiyi dəniz müdafiə koalisiyasına qoşulur

Türkiyənin Qırmızı dəniz, Bab əl-Məndəb boğazı və Ədən körfəzində ticarət gəmiçiliyini və enerji marşrutlarını qorumaq məqsədi daşıyan, Səudiyyə Ərəbistanının rəhbərlik etdiyi çoxmillətli dəniz müdafiə koalisiyasına qoşulacağı gözlənilir.

Bu addım Yəməndəki husilərin gəmilərə hücumları intensivləşdirməsi və Səudiyyə Ərəbistanını dəniz blokadası ilə hədələməsindən sonraya təsadüf edir.

Səudiyyə rəsmiləri Ər-Riyadda keçirilən danışıqlarda 43 ölkə və Avropa İttifaqının nümayəndələrinin iştirak etdiyini, Türkiyə də daxil olmaqla 14 ölkənin bu təşəbbüsə rəsmi dəstəyini ifadə etdiyini bildirib.

Koalisiyanın hücum əməliyyatlarından daha çox, dəniz təhlükəsizliyi, kəşfiyyat məlumatlarının mübadiləsi və mühüm dəniz yollarının mühafizəsinə diqqət yetirəcəyi proqnozlaşdırılır.

Neft bazarında eniş: Qiymətlər yenə də ayı yüksəlişlə bitirir

Əsas dəniz marşrutları ilə daşımaların artması fonunda neft qiymətləri ucuzlaşıb. Buna baxmayaraq, İran-ABŞ danışıqlarında irəliləyiş əldə olunmayıb.

“Brent” markalı neftin fyuçersləri 1,03 dollar və ya 1,2 faiz ucuzlaşaraq bir barel üçün 88 dollara düşüb. ABŞ-ın “West Texas Intermediate” (WTI) neftinin qiyməti isə 1,50 dollar və ya 1,8 faiz azalaraq 82,09 dollar olub.

Gündəlik enişə baxmayaraq, hər iki əsas neft göstəricisinin ay ərzində təxminən 20 faiz bahalaşacağı gözlənilir.

Bəhreyndəki ABŞ aviabazasına PUA hücumu edildiyi bildirilir

İran hərbçiləri əməliyyat zamanı elektrik generatorları, naviqasiya sistemləri və inzibati dəstək binaları da daxil olmaqla bir neçə obyektin vurulduğunu açıqlayıb.

Ordunun bəyanatına görə, zərbə Su-24 pilotu, iranlı briqada generalı Məcid Kazıminin öldürülməsinə qisas olaraq həyata keçirilib.

İran Şeyx İsa aviabazasını körfəzdə kəşfiyyat təyyarələri və logistika əməliyyatları üçün mərkəz rolunu oynayan, strateji baxımdan mühüm ABŞ hərbi obyekti kimi xarakterizə edib.

İran Küveytdəki ABŞ aviabazasına PUA hücumu təşkil etdiyini iddia edir

İran ordusu Küveytdəki Əhməd əl-Cabir aviabazasında yerləşən ABŞ-ın strateji hərbi obyektlərini PUA-larla hədəf aldığını və bu əməliyyatın ABŞ-ın son zərbələrinə cavab olduğunu bildirib.

"Tasnim" xəbər agentliyinin yaydığı bəyanata əsasən, ordu hücum nəticəsində bazadakı anqarların, peyk rabitə sistemlərinin və avadanlıq anbarlarının vurulduğunu qeyd edib.

Bəyanatda həmçinin vurğulanıb ki, bu zərbələr ABŞ-ın Qəşm adasındakı yaşayış massivinə etdiyi hücuma cavab olaraq endirilib.

İranı əsas ərazisindən Klarens boğazı vasitəsilə ayrılan Qəşm adasının havadan çəkilmiş görüntüsü, 10 dekabr 2023-cü il.

Reuters

Suriya və Səudiyyə Ərəbistanı liderləri regional gərginliyi müzakirə ediblər

Suriya Prezidenti Əhməd Əl Şaraa və Səudiyyə Ərəbistanının vəliəhd şahzadəsi Məhəmməd bin Salman arasında telefon danışığı olub. Liderlər ikitərəfli əlaqələri və regionda gərginliyin azaldılması istiqamətindəki səyləri müzakirə ediblər.

Söhbət zamanı Suriya Prezidenti İraqdakı İranın dəstəklədiyi silahlı qruplaşmalar tərəfindən Səudiyyə Ərəbistanının neft obyektlərinə edilən hücum cəhdini qınayıb. O, krallığın təhlükəsizliyi və suverenliyinə Suriyanın sarsılmaz dəstəyini bir daha bəyan edib.

Şimali İraqı yanacaq böhranı bürüyüb

Yerli medianın məlumatına görə, cümə günü səhər erkən saatlarda İraqın şimalındakı Ərbil və Süleymaniyyə şəhərlərində müxtəlif obyektlərə PUA hücumları olub və nəticədə yeni partlayışlar baş verib.

Son hücumlar Şimali İraqın dərinləşən yanacaq böhranı ilə üz-üzə qaldığı bir vaxta təsadüf edir. Bu böhrana səbəb enerji istehsalını pozan, elektrik enerjisinin verilməsini kəskin azaldan və sürücüləri yanacaqdoldurma məntəqələrində saatlarla növbə gözləməyə məcbur edən əvvəlki zərbələr olub.

Regionda yanacaq qıtlığının fəsadları davam etdiyi üçün Ərbil, Süleymaniyyə və Duhokda sürücülər yanacaqdoldurma məntəqələrinin qarşısında saatlarla vaxt keçirir, bəziləri isə hətta bütün gecəni növbə gözləyirlər.

Misir Prezidenti gərginliyi azaltmağa çağırıb, qaz gəmisinə hücum araşdırılır

Misir Prezidenti Əbdülfəttah əs-Sisi bildirib ki, Damietta limanında iki qaz gəmisinə edilən PUA hücumunun istintaqı davam etdirilir.

Prezident ofisinin yaydığı bəyanata əsasən, Sisi bu fikirləri İspaniyanın Baş naziri Pedro Sançeslə telefon danışığı zamanı səsləndirib. Qeyd edək ki, bu, indiyədək heç kimin məsuliyyəti üzərinə götürmədiyi çərşənbə günkü hücumdan sonra Misir liderinin insidentlə bağlı ilk açıqlamasıdır.

Misirin Damietta limanından görünüş, 28 iyul 2026-cı il.

Reuters