canlı Tramp İranla danışıqların bazar ertəsi başlayacağını bəyan edib

SEPAH Hörmüz boğazı üzərində dronu zərərsizləşdirib 

İran İslam İnqilabı Keşikçiləri Korpusu (SEPAH) yeni hava hücumundan müdafiə sistemindən istifadə edərək Hörmüz boğazı üzərində dronu zərərsizləşdirib. Bu barədə “Tasnim” xəbər agentliyi məlumat yayıb.

İran və Oman Hörmüz boğazında yeni marşrut yaradır

Tehran Hörmüz boğazında yeni marşrutun açılması ilə bağlı Omanla danışıqlar aparır. Bu barədə İran Xarici İşlər Nazirliyinin sözçüsü İsmayıl Bəqayi mətbuat konfransında məlumat verib. O bildirib ki, tərəflər boğazdan keçən və həm giriş, həm də çıxış zolaqlarına malik vahid bir dəhlizin yaradılmasını müzakirə edirlər.

İran XİN: "Hörmüz boğazının açılması ilə bağlı ABŞ ilə birbaşa danışıqlar aparılmır"

"AnewZ"un xüsusi müxbiri Touraj Shiralilou-nun iştirak etdiyi brifinqdə İran Xarici İşlər Nazirliyinin rəsmi sözçüsü bildirib ki, Tehran Hörmüz boğazından gəmilərin keçidinin idarə olunması ilə bağlı ABŞ ilə deyil, Omanla danışıqlar aparır.

İran XİN-in sözçüsü İsmayıl Bəqai vurğulayıb ki, Vaşinqton İranın cənub limanlarının dəniz blokadasını davam etdirdiyi müddətdə su yolunun yenidən açılması ilə bağlı yaranmış dalanda hər hansı dəyişiklik olmayacaq.

Bəqai Çinin vasitəçilik səylərini məmnunluqla qarşıladıqlarını əlavə edib, lakin Tehran və Vaşinqton arasında danışıqlar üçün əsas kanalın Pakistan olaraq qaldığını bildirib.

ABŞ ordusu İrana təzyiq üçün "yaradıcı və qeyri-ənənəvi" yollar axtarır

"CNN"in məlumatına görə, ABŞ ordusunun Yaxın Şərqdəki əməliyyatlarına cavabdeh olan Mərkəzi Komandanlığı (CENTCOM) hərbi analitiklərə ünvanladığı e-poçtda İranla mübarizə üçün yeni ideyalar istəyib.

İddialara görə, ABŞ ordusunun yüksəkrütbəli zabiti tərəfindən göndərilən müraciətdə İrana təzyiq göstərmək və Tehranı cəzalandırmaq üçün "yeni, yaradıcı və qeyri-ənənəvi" yolların tapılması xahiş olunub.

İranla danışıqlar ərəfəsində neft ucuzlaşıb, bazarlarda fərqli dinamika müşahidə olunub

Donald Tramp İranla danışıqların avqustun 3-də başlayacağını bildirdikdən sonra neftin qiyməti ucuzlaşıb. Həmçinin dünya bazarlarında qarışıq dinamika müşahidə olunub. Bu açıqlama Yaxın Şərqdə gərginliyin azalacağına dair ümidləri artırıb.

Husilərin təhdidlərinə baxmayaraq, Səudiyyə tankerləri Qırmızı dənizdən keçib

Yəmənin bir hissəsinə nəzarət edən husilərin Səudiyyə Ərəbistanına qarşı dəniz blokadası elan etməsinə baxmayaraq, həftəsonu Səudiyyəyə məxsus iki neft tankeri Bab əl-Məndəb boğazından keçib.

Gəmiçilik məlumatlarına görə, gəmilərə hücum xəbərlərindən sonra Hörmüz boğazında hərəkət azalıb. Bu, qlobal enerji daşımalarının əsas marşrutlarında fasilələrin davam etdiyini göstərir.