İran: Hörmüzlə bağlı Omanla müzakirələr davam edir, ABŞ ilə danışıqlar aparılmır

İran Xarici İşlər Nazirliyinin sözçüsü İsmayıl Bəqayi avqustun 3-də bildirib ki, rəsmi Tehran Hörmüz boğazının gəmiçilik üçün yenidən açılması ilə bağlı ABŞ ilə danışıqlar aparmır.

Onun sözlərinə görə, Omanla aparılan müzakirələr yalnız boğazdan təhlükəsiz keçidin təmin olunmasına yönəlib.

Bəqayi Hörmüz boğazındakı vəziyyətin İranla Oman arasındakı fikir ayrılığından qaynaqlanmadığını deyib.

“Hörmüz boğazı mart ayından etibarən ABŞ və İsrailin hərbi təcavüzü səbəbindən problemlə üzləşib”, – Bəqayi əlavə edib.

Nazirlik sözçüsü İran-ABŞ münasibətlərinin və rəsmi Vaşinqtonun atəşkəs memorandumundan irəli gələn öhdəliklərinin növbəti mərhələlərdə mövcud şəraitə uyğun olaraq nəzərdən keçiriləcəyini bildirib.

“ABŞ-nin düşmənçilik siyasəti, İrana qarşı dəniz blokadası, eləcə də ölkəmizə və maraqlarımıza qarşı hərbi təcavüzü davam etdiyi müddətdə Hörmüz boğazındakı vəziyyətdə ciddi dəyişiklik olmayacaq”, – Bəqayi vurğulayıb.

O, avqustun 2-də İran ilə Oman arasında yeni gəmiçilik marşrutu ilə bağlı əldə olunan anlaşmanın dəniz nəqliyyatının bərpası üçün zəruri, lakin yetərli olmadığını bildirmişdi.

Pakistan əsas vasitəçi olaraq qalır

Bəqayi bildirib ki, rəsmi Tehran gərginliyin azaldılması istiqamətində Çin də daxil olmaqla, regional və digər ölkələrin səylərini alqışlayır. Bununla belə, Pakistan İranla ABŞ arasında əsas vasitəçi olaraq qalır.

“İranla ABŞ arasında aparılan müzakirələrdə vasitəçi Pakistandır. Zəruri hallarda Qətər də prosesə kömək edir. Çinlə dost münasibətlərimiz mövcuddur və qarşılıqlı maraq doğuran bütün sahələrdə sıx əməkdaşlıq edirik”, – o deyib.

Bəqayinin sözlərinə görə, Çin ABŞ-nin birtərəfli siyasətinin güclənməsindən, regionda münaqişənin genişlənməsindən və təhlükəsizliyin pisləşməsindən narahatdır. Buna görə də rəsmi Pekin vəziyyətin daha da gərginləşməsinin qarşısını almağa çalışır.

İran Ukraynaya qarşı tədbir görəcəyini bildirib

Bəqayi Ukraynanın Xəzər dənizinin Rusiya sularında İranın ticarət gəmisinə endirdiyi və insan ölümünə səbəb olan dron hücumuna dair sualı cavablandırıb. O bildirib ki, Ukrayna rəsmiləri hücumun qəsdən törədilmədiyini iddia edirlər.

Bununla belə, Bəqayinin sözlərinə görə, Ukrayna Prezidenti Volodimir Zelenskinin açıqlamaları da daxil olmaqla, mövcud dəlillər hücumun qəsdən həyata keçirildiyini göstərir.

“Ukrayna rəsmilərinin izahatlarını dinləmişik. İndi onların bu əməlin qəsdən törədilmədiyinə dair iddialarını təsdiqləyən əməli addım atıb-atmayacaqlarını gözləyirik”, – o deyib.

Bəqayi bildirib ki, İran Ukraynanı məsuliyyətə cəlb etmək və belə hadisələrin təkrarlanmasının qarşısını almaq üçün zəruri tədbirlər görəcək. 

Teqlər

İran ABŞ Ukrayna İsmayıl Bəqayi Hörmüz boğazı danışıqlar Oman Yaxın Şərq