"AnewZ" səhər xülasəsi – 4 avqust 2026

Günə “AnewZ”un səhər xülasəsi ilə məlumatlı başlayın. Avqustun 4-ü üçün hazırladığımız xülasədə gündəmin əsas xəbərləri və diqqətçəkən son hadisələr yer alır.

Vaşinqton ştatındakı meşə yanğınları 64 minədək insanı evindən didərgin salıb

ABŞ-nin Vaşinqton ştatının Spokan şəhərində baş verən meşə yanğınları azı 700 tikilini məhv edib. Rəsmilərin məlumatına görə, təxminən 64 min nəfər təxliyə olunub.

Üç yanğın 3200 hektardan çox ərazini əhatə edir. Bu hazırda ABŞ-də söndürülməsinə ən çox diqqət ayrılan meşə yanğınları sırasındadır. Bəzi insanların itkin düşdüyü bildirilir.

Sakit okeanın şimal-qərb bölgəsi son illərin ən ağır yanğın mövsümlərindən birini yaşayır, təxminən 1100 yanğınsöndürən alovla mübarizə aparır.

ABŞ-nin 25 ştatı yeni tariflərə görə Tramp administrasiyasını məhkəməyə verib

ABŞ-nin 25 ştatından ibarət koalisiya idxal mallarına yeni tariflərin tətbiqi ilə bağlı Tramp administrasiyasına qarşı məhkəmə iddiası qaldırıb. Ştatlar bu addımın prezidentin səlahiyyət həddini aşdığını bəyan ediblər.

İddia ərizəsində 10–12,5 faizlik tariflərin ləğvi tələb olunur. Həmçinin vurğulanır ki, bu tədbirlər amerikalı istehlakçıların xərclərini kəskin artıra bilər.

Koalisiya administrasiyanın tarifləri əsaslandırmaq üçün Ticarət Aktının 301-ci maddəsi çərçivəsində məcburi əməklə bağlı sürətləndirilmiş araşdırmadan istifadə etməsinə də etirazını bildirib.

ABŞ–İran danışıqları qeyri-müəyyən qalır, körfəzdə gəmi hərəkəti zəifləyir

ABŞ və İran beş aydır davam edən müharibəyə son qoymaq məqsədi daşıyan danışıqlarla bağlı ziddiyyətli açıqlamalar veriblər. Bu isə mümkün razılaşmaya dair qeyri-müəyyənliyi artırıb.

ABŞ Prezidenti Donald Tramp danışıqların davam etdiyini bildirib. Rəsmi Tehran isə hər hansı müzakirənin aparıldığını təkzib edib.

Hörmüz boğazı yaxınlığında baş verən gəmiçilik hadisəsi qlobal enerji marşrutlarının təhlükəsizliyi ilə bağlı narahatlığı artırıb. Strateji su yolunda hərəkət məhdud olaraq qalıb. Avqustun 3-də boğazdan yalnız altı gəmi keçib.

Cənubi Koreya istilərlə mübarizəni gücləndirir, ölənlərin sayı 16-ya çatıb

Cənubi Koreya Prezidenti Li Çje Mön rekord istilər nəticəsində ölənlərin sayının 16-ya çatmasından sonra aidiyyəti qurumları əhaliyə dəstəyi artırmağa çağırıb.

Li ekstremal hava hadisələrinin daha tez-tez baş verdiyini bildirib və böhranlara qarşı tədbirlərin gücləndirilməsini istəyib.

Ölkədə 122 illik müşahidələr dövrünün ən yüksək temperaturu qeydə alınıb. Yansan şəhərində havanın temperaturu 42,5 dərəcəyə çatıb.

Rusiyanın Leninqrad vilayətində dron hücumu anbara zərər vurub

Rusiyanın Sankt-Peterburq şəhəri yaxınlığındakı anbar kompleksinə dronla zərbə endirilib. Bu barədə Leninqrad vilayətinin qubernatoru Aleksandr Drozdenko məlumat verib.

Qubernator obyektin adını açıqlamayıb və hücumla bağlı əlavə məlumat verməyib.

Hadisədən sonra qonşu Finlandiya ölkənin şərqində, Finlandiya körfəzi üzərində müvəqqəti uçuş məhdudiyyəti tətbiq edib.

Teqlər

ABŞ koalisiya İran Donald Tramp İsrail Fələstin Hörmüz boğazı Vaşinqton meşə yanğınları