Livanda yüzlərlə insanın həlak olduğu Beyrut limanı partlayışından 6 il ötür

Livanda yüzlərlə insanın ölümünə səbəb olan Beyrut limanı partlayışının altıncı ildönümünü anılıb.

Həlak olanların yaxınları bir araya gələrək illərdir gecikən araşdırmanın nəhayət başa çatacağına ümid etdiklərini bildiriblər.

2020-ci il avqustun 4-də baş verən partlayış nəticəsində 220-dən çox insan həlak olub, təxminən 7 min nəfər yaralanıb. Paytaxt Beyrutun böyük hissəsinə ciddi ziyan dəyib.

Müstəntiqlər partlayışa limanda illərlə saxlanılan təxminən 2750 ton ammonium nitratın səbəb olduğunu hesab edirlər.

İstintaq yekun mərhələdədir

İstintaq illərlə siyasi və hüquqi maneələrlə üzləşib. Çoxsaylı hüquqi etirazlar araşdırmanın davam etdirilməsinə və rəsmi ittihamların irəli sürülməsinə mane olub.

Prezident Cozef Aun və Baş nazir Nəvvaf Salam bu ilin əvvəlində vəzifəyə gəldikdən sonra vəziyyət dəyişib. Onlar hadisəyə görə məsul şəxslərin cavabdehliyə cəlb olunacağını vəd ediblər.

Hakim Tarek Bitar istintaqı bərpa edərək araşdırmanın nəticələrini baş prokurora təqdim edib. Yüksək vəzifəli məhkəmə rəsmisi “Reuters”ə bildirib ki, hesabatda faciə ilə bağlı əməllərə görə təxminən 70 nəfər ittiham olunur. Hüquqi proses davam etdiyi üçün onların adları açıqlanmayıb.

İnformasiya naziri Pol Morkos ittiham aktının yaxın aylarda təqdim ediləcəyini bildirib.

Həlak olanların onlarla yaxını anım mərasimi və oturaq aksiya keçirmək üçün liman yaxınlığında toplaşıb. Onlar məsul şəxslərin cavabdehliyə cəlb olunmasını tələb ediblər.

Bəzi ailə üzvləri gələn ilin ildönümünə qədər məsul şəxslərin həbs olunacağına ümid etdiklərini bildiriblər. Digərləri isə araşdırmanın nəticə verəcəyinə hələ də inanmırlar.

Ədliyyə naziri Adil Nassar istintaqın tam başa çatdırılmalı olduğunu bildirib. 

Teqlər

Livan Beyrut Beyrut limanı istintaq müstəntinqlər məhkəmə partlayış Yaxın Şərq