Azərbaycan Dövlət Neft Fondu Perunun enerji sektoruna böyük investisiya yatırıb

Azərbaycan Respublikası Dövlət Neft Fondu qlobal investisiya portfelini şaxələndirərək Latın Amerikasında yeni layihə həyata keçirib. Fond "I Squared Capital" ilə tərəfdaşlıq çərçivəsində Perunun ən böyük müstəqil elektrik istehsalçısı "Inkia Energy"nin payçısı olub.

Sövdələşməyə əsasən, Kanadanın "Canada Pension Plan Investment Board" pensiya fondu "Inkia Energy" şirkətinin 50 faizlik hissəsini satın alıb.

Qalan 50 faizlik pay isə Dövlət Neft Fondunun da iştirak etdiyi və "I Squared" tərəfindən idarə olunan investisiya strukturu vasitəsilə əldə edilib.

Hidroelektrik, təbii qaz, günəş və külək enerjisi aktivlərindən ibarət zəngin portfelə malik olan "Inkia Energy" 2,6 giqavatlıq istehsal gücü ilə Perunun elektrik enerjisi tələbatının təxminən 22 faizini təmin edir.

Bununla yanaşı, bərpa olunan enerji sahəsində 4 giqavatdan çox yeni layihə portfelinə sahib olan şirkət uzunmüddətli perspektivdə yaşıl enerji fəaliyyətini genişləndirməyi əsas prioritet kimi müəyyənləşdirib.

Bu investisiya Dövlət Neft Fondunun uzunmüddətli strategiyasına tam uyğundur. Belə ki, bu addım Fondun coğrafi diversifikasiyasını Latın Amerikası istiqamətində genişləndirməklə yanaşı, yüksək gəlirliliyə və aşağı risk göstəricilərinə malik dayanıqlı enerji aktivləri hesabına portfelini daha da möhkəmləndirir.

Qeyd edək ki, 1999-cu ildə təsis edilən və hazırda məcmu aktivlərinin həcmi 70 milyard dolları ötən Neft Fondu ölkənin resurs gəlirlərini gələcək nəsillər üçün qoruyub artırmaq məqsədilə qlobal miqyasda geniş diversifikasiya olunmuş investisiya siyasəti həyata keçirir.

Layihənin əsas tərəfdaşı olan "I Squared Capital" isə idarəetməsindəki 60 milyard dollardan çox aktivlə 70-dən artıq ölkədə fəaliyyət göstərən aparıcı infrastruktur fondudur.

Kopyalandı