canlı Hörmüz boğazının yenidən açılması ilə bağlı razılaşma gözlənilir

İran İnqilab Keşikçiləri: Hörmüz boğazının açılması Omanla danışıqlardan asılı deyil

İran İslam İnqilabı Keşikçiləri Korpusu bildirib ki, Hörmüz boğazının yenidən açılması İran və Oman arasında aparılan danışıqlardan asılı deyil. Qurumun sözlərinə görə, boğaz yalnız ABŞ İranın şərtlərini qəbul edərsə açıla bilər.

ABŞ rəsmisi isə İran və Oman arasında danışıqlarda irəliləyiş olduğunu və bunun Hörmüz boğazının tezliklə açılmasına yol aça biləcəyini deyib. Bu addım beş aydır davam edən ABŞ-İran müharibəsi səbəbindən pozulan neft ixracının bərpasına kömək edə bilər.

“Hörmüz boğazının açılması İran İslam Respublikasının müəyyən etdiyi şərtlərdən asılıdır və İranla Oman arasındakı danışıqlarla bağlı deyil”, – Tasnim xəbər agentliyi İnqilab Keşikçiləri Korpusunun sözçüsü Hüseyn Mohebbiyə istinadən bildirib.

İran və Oman Hörmüz boğazı üzrə razılaşmaya yaxındır

İranın Xarici İşlər naziri Abbas Əraqçi bildirib ki, İran və Oman Hörmüz boğazından keçən yeni gəmiçilik marşrutu ilə bağlı razılaşmanın əldə olunmasına çox yaxındır.

Onun sözlərinə görə, razılaşmanın müəyyən şərtləri olacaq. Bunlardan biri Tehranın ABŞ-nin İslamabad anlaşma memorandumunu pozduğunu bildirdiyi hallara görə kompensasiya məsələsidir.

Əraqçi əlavə edib ki, daimi marşrutla bağlı texniki və hüquqi məsələlər həll olunana qədər İran və Oman müvəqqəti gəmiçilik marşrutunun yaradılmasını müzakirə edirlər.

İraq İranla neft ixracı ilə bağlı razılaşmanı müzakirə edir

İraq neft ixracı ilə bağlı İranla danışıqlar aparır. İraqın neft naziri Basim Məhəmməd bildirib ki, bunun üçün nəzərdə tutulan mexanizm hələ işə salınmayıb.

Nazir neftin hansı marşrutla ixrac ediləcəyi, ixrac həcmi və prosesin nə vaxt başlayacağı barədə məlumat verməyib.

Onun sözlərinə görə, İraq hazırda gündə təxminən 2,7 milyon barel neft hasil edir və bunun təxminən yarısını ixrac edir. Bu ay ölkənin gündəlik ixrac imkanları 1,5–1,75 milyon barel təşkil edir.

BƏƏ mediası: Hörmüz boğazında gəmi raketlə hədəfə alınıb 

Əbu-Dabi Milli Neft Şirkəti (ADNOC) bildirib ki, səhər saatlarında şirkətə məxsus gəmilərdən biri Hörmüz boğazından keçərkən raketlə hədəfə alınıb.

BƏƏ-nin dövlət xəbər agentliyi “WAM”ın məlumatına görə, hadisə nəticəsində xəsarət alan olmayıb və vəziyyət nəzarət altına alınıb.

“WAM” gəmi, onun daşıdığı yük, mümkün ziyan və hadisəyə görə kimin məsuliyyət daşıdığı barədə əlavə məlumat verməyib.

SEPAH: ABŞ Hörmüz boğazının açılması üçün İranın şərtlərini qəbul etməlidir 

Hörmüz boğazının yenidən açılması ABŞ-ın İranın şərtlərini tam qəbul etməsindən asılıdır. Bunu İran İslam İnqilabı Keşikçiləri Korpusunun (SEPAH) sözçüsü Hüseyn Mohebbi bildirib.

O deyib ki, boğazın açılması İranın müəyyən etdiyi şərtlər və mexanizmlər əsasında mümkün olacaq. Mohebbi əlavə edib ki, bu məsələ İranla Oman arasında aparılan danışıqlarla bağlı deyil.

Bundan əvvəl ABŞ rəsmisi Tehranla Vaşinqton arasında Hörmüz boğazında kommersiya gəmiçiliyinin bərpası ilə bağlı razılaşmanın tezliklə əldə oluna biləcəyini bildirmişdi.

Hörmüz boğazında gəmi hərəkəti və son vəziyyət

“MarineTraffic”in xəritəsində Hörmüz boğazı ətrafında gəmilərin hərəkəti göstərilir. ABŞ rəsmisinin sözlərinə görə, İran və ABŞ arasında dəniz keçidinin yenidən açılması ilə bağlı razılaşmanın tezliklə əldə olunacağı gözlənilir.

Yəməndə husilərin hücumu nəticəsində iki nəfər ölüb

Yəmənin şimal-mərkəzi hissəsində yerləşən Maribdə husilərin məcburi köçkün düşərgələrinə və yaşayış məhəllələrinə endirdiyi zərbə nəticəsində iki nəfər ölüb. Bu barədə yerli hakimiyyət orqanlarına istinadən Yəmənin dövlət xəbər agentliyi SABA məlumat yayıb.

Yəmən ordusu səhər saatlarında İranın dəstəklədiyi husi qüvvələrinə bir neçə cəbhədə cavab zərbələri endirdiyini bildirib.

Səudiyyə Ərəbistanının yüksəkvəzifəli rəsmisi bildirib ki, Ər-Riyad Yəməndəki husilərin, eləcə də İran İslam İnqilabı Keşikçiləri Korpusunun nəzarəti altında olan İraq silahlı qruplaşmalarının yaxın zamanda koordinasiyalı hücumlar həyata keçirəcəyini gözləyir.

İran və ABŞ arasında Hörmüz boğazı ilə bağlı razılaşma gözlənilir

Tehran və Vaşinqton Hörmüz boğazında kommersiya gəmiçiliyinin bərpası ilə bağlı razılaşmaya yaxındır. Bu barədə ABŞ rəsmisi bildirib. Razılaşma əldə olunarsa, ABŞ-nin İran limanlarına tətbiq etdiyi dəniz blokadası da aradan qaldırılacaq.

“Oman və İran arasında boğazla bağlı irəliləyiş var. Tezliklə razılaşmanın əldə olunacağını gözləyirik”, – ABŞ rəsmisi deyib.

Rəsmi bildirib ki, kommersiya gəmilərinin boğazdan maneəsiz keçidinin bərpasına dair razılaşma elan edildikdən sonra ABŞ İran limanlarına tətbiq etdiyi blokadanı aradan qaldıracaq.

Fevralın 28-də ABŞ-İran münaqişəsi başlamazdan əvvəl dünyada istehlak olunan hər beş barel neftdən təxminən biri Hörmüz boğazından keçirdi.

İran hərbi əməliyyatları əsas gətirərək neft tankerlərindən keçid haqqı almağa başlayıb və icazəsiz şəkildə boğazdan keçməyə çalışan gəmilərə atəş açıb.

Neft daşımalarındakı fasilələr enerji qiymətlərinin kəskin artmasına və inflyasiyanın yüksəlməsinə səbəb olub.