Rusiyanın Azərbaycandakı səfiri XİN-ə çağırılıb

Azərbaycan Rusiyanın Bakıdakı səfiri Mixail Yevdokimovu Rusiya mediasında və informasiya məkanında səsləndirilən, Bakının təxribat xarakterli, təhqiramiz və təhdidedici kimi qiymətləndirdiyi son bəyanatlarla əlaqədar Xarici İşlər Nazirliyinə çağırıb.

Nazirlik bildirib ki, görüş zamanı, son dövrlərdə Rusiya Federasiyasının media və informasiya məkanında Azərbaycan Respublikası, Azərbaycan xalqı və ölkə rəhbərliyi əleyhinə səsləndirilən təxribat, təhqir və təhdid xarakterli açıqlamalarla bağlı Azərbaycan tərəfinin ciddi narahatlığı və qəti etirazı Rusiya tərəfinin diqqətinə çatdırılıb.

Xüsusilə, 13 avqust 2026-cı il tarixində “Çistota ponimaniya” layihəsi çərçivəsində yayımlanan verilişdə ölkəmizə, xalqımıza və Azərbaycan Respublikasının rəhbərliyinə qarşı səsləndirilən ifadələrə diqqət çəkilib.

Bununla yanaşı, 7 avqust tarixində “Sputnik” radiosunda yayımlanan proqramda Azərbaycan rəhbərliyinin “Rusiyanın terrorçu və ekstremistlər siyahısına” daxil edilməsi ilə bağlı səsləndirilən cəfəngiyyat, 9 avqust tarixində “YouTube” platformasında, 16 avqust tarixində isə “Spas” telekanalında Azərbaycanın rəhbərliyinə qarşı yenidən təhqir məzmunlu materialın yayımlanması və təxribatçı fikirlərin səsləndirilməsi xatırlanıb.

Rəsmi Bakı Azərbaycanın daxili siyasi proseslərinə mümkün müdaxilə ilə bağlı müzakirələrin, eləcə də Azərbaycan xalqına və ölkə rəhbərliyinə qarşı fiziki zorakılıq çağırışlarının qəbuledilməz olduğunu vurğulayıb.

Xarici İşlər Nazirliyi bildirib ki, Azərbaycan oxşar məsələləri daha əvvəl müxtəlif siyasi səviyyələrdə qaldırıb. Buna baxmayaraq, bu cür ritorikanın getdikcə daha sərt formada davam etməsi ciddi narahatlıq doğurur.

Nazirliyin bəyanatında deyilir: "Görüşdə Rusiyanın informasiya və media məkanında Azərbaycan əleyhinə təxribat, təhdid və zorakılıq ritorikasına son qoyulması məqsədilə təxirəsalınmaz və təsirli tədbirlərin görülməsi barədə gözləntimiz bir daha qarşı tərəfin diqqətinə çatdırılıb".

Kopyalandı