Tramp İranın "məqbul razılaşma"ya hazır olmadığını deyir

Misir və İran regional gərginliyin azaldılması səylərini müzakirə ediblər

Misir və İranın Xarici İşlər nazirləri regional gərginliyin azaldılması, Tehran və Vaşinqton arasında diplomatik əlaqələrin bərpası və iyun ayında imzalanan anlaşma memorandumunun həyata keçirilməsi istiqamətində səyləri müzakirə ediblər.
Rəsmi Qahirə həmçinin naviqasiya azadlığının və Körfəz regionunun təhlükəsizliyinin vacibliyini vurğulayıb.

Dəməşq İsrailin mülki avtomobili hədəf alan PUA hücumunu kəskin pisləyib

Suriyanın Xarici İşlər Nazirliyi Dəməşqin qərbində mülki avtomobili hədəf alan İsrailə aid pilotsuz uçuş aparatı (PUA) zərbəsini pisləyib və hücum nəticəsində bir neçə mülki şəxsin yaralandığını bildirib.

Nazirlik hücumu Suriyanın suverenliyinin və ərazi bütövlüyünün kobud şəkildə pozulması adlandırıb və təkrarlanan zərbələrin regionu daha da gərginləşdirəcəyi barədə xəbərdarlıq edib.

Yəmən hüquq müdafiəçiləri: “Husilər təxminən 59 min sivili öldürüb və ya yaralayıb”

"Saba" dövlət xəbər agentliyinin məlumatına görə, Yəmənin hüquq müdafiə qrupu 2015-ci ildən bəri husi qüvvələri tərəfindən 59 minə yaxın mülki vətəndaşın öldürüldüyünü və ya yaralandığını bildirib.

Yəmən Hüquq və Azadlıqlar Şəbəkəsi 15478 nəfərin həlak olduğunu və 35654 nəfərin yaralandığını qeyd edib, eyni zamanda mülki ərazilərdə basdırılmış minaların hələ də insan itkilərinə səbəb olduğu və ailələrin öz evlərinə təhlükəsiz şəkildə qayıtmasına mane olduğu barədə xəbərdarlıq edib.

Husilər hesabatla bağlı dərhal şərh verməyiblər.

Hüseyn Taib: "ABŞ artıq qlobal güc mərkəzi deyil"

İranın Bəsic qüvvələrinin rəhbəri Hüseyn Taib qlobal güc balansının dəyişdiyini bildirərək, ABŞ və İsrailin "ən zəif mövqelərindən birində" olduğunu iddia edib.

"Tasnim" agentliyinin məlumatına görə, Taib Vaşinqtonun artıq qlobal güc mərkəzi olmadığını qeyd edib. O,  iranlılara xəbərdarlıq edərək, onları İranın rəqiblərinin zahirən danışıqlara qayıtmasına "aldanmamağa" çağırıb.

İran ABŞ-nin İsrailə görə regional müttəfiqlərini təhlükəyə atdığını bildirib

İran parlamentinin sədri Məhəmməd Baqir Qalibaf bildirib ki, Tehran qonşu ölkələrdən yeni regional təhlükəsizlik tədbirlərinin formalaşdırılması və iqtisadi əməkdaşlığın genişləndirilməsi ilə bağlı "çoxsaylı mesajlar" alıb.

Qalibaf qeyd edib ki, ABŞ İsrailin maraqlarını üstün tutmaqla öz müttəfiqlərini riskə atıb. O əlavə edib: "Sülh və təhlükəsizliyi həqiqətən təmin edəcək şey daxildən gələn müstəqil nizamdır."

İran "Cənubi Pars" qaz emalı zavodunda təmir işlərinin 70 faiz başa çatdığını bildirir

SHANA agentliyinin məlumatına görə, iyun ayında İsrailin hücumu nəticəsində zədələnmiş İranın "Cənubi Pars" qaz emalı zavodunun 14-cü fazasında təmir işləri artıq 70 faiz başa çatıb.

"Pars Oil and Gas Company" şirkətinin baş icraçı direktoru Turac Dehqani bildirib ki, zavodun ilin sonuna qədər tam bərpa olunacağı və zədələnmiş hissənin yenidən istehsalata qaytarılacağı gözlənilir.

İşçilər Fars körfəzinin şimalında yerləşən “Cənubi Pars” qaz yatağının bir hissəsində hərəkət edir. Əsəluyə, İran, 19 noyabr 2015-ci il.

Reuters

İran müdafiə təyinatlı silah istehsalının iki dəfə artdığını bildirir

"Tasnim" xəbər agentliyinin məlumatına görə, Müdafiə Nazirliyinin sözçüsü Rza Tələyi-Nik bildirib ki, İranın müdafiə təyinatlı silah istehsalı son bir ildə iki dəfə artıb.

Tələyi-Nik qeyd edib ki, istehsal ötən ilin iyulundan bu ilin iyuluna qədər artıb, eyni zamanda döyüş meydanında istifadə olunan silah və sursatlar sürətlə əvəzlənib, daxildə istehsal olunan avadanlıqlar isə istifadəyə verilməyə davam edib.

O, həmçinin bildirib ki, İran həssaslığı azaltmaq və sürpriz elementini qorumaq məqsədilə hərbi sərgiləri və yeni silah təqdimatlarını məhdudlaşdırıb.

Tələyi-Nik əlavə edib ki, İranın hərbi imkanlarının gücləndirilməsi xarici qüvvələrə müqavimət göstərmək, eləcə də ölkənin müstəqilliyini, mövcudluğunu və kimliyini qorumaq üçün vacibdir.

İran rəsmisi Qətəri həbsdə olan pilotları "quru"dakı xəstəxanaya köçürməyə çağırıb

"Tasnim" xəbər agentliyinin məlumatına görə, İnanın hərbi rəsmisi Qətərə müraciət edərək, həbsdə olan iranlı pilotların su üzərində saxlanıldığını və "fiziki vəziyyətlərinin pis olduğunu" bildirib, onların "quru"dakı xəstəxanaya köçürülmələrini tələb edib.

İran Silahlı Qüvvələrinin Baş Qərargahının İtkin düşmüş şəxslərin axtarışı komitəsinin komandiri Məhəmməd Baqirzadə pilotların saxlanıldığı yerin uyğun olmadığını qeyd edib və Qırmızı Xaç Komitəsindən yaralı və xəstə məhbusların İrana qayıtmasını sürətləndirmək üçün Qətərə təcili tibbi yardım təyyarəsi göndərməsini xahiş edib.

İran İraq neft tankerlərinin Hörmüz boğazından keçməsinə icazə verib

İran dövlət xəbər agentliyi IRNA-nın verdiyi məlumata görə, Tehran Bağdadın müxtəlif kanallar vasitəsilə etdiyi təkrar müraciətlərdən sonra bir sıra İraq neft tankerinin Hörmüz boğazından keçməsinə icazə verib.

IRNA qeyd edib ki, İraq tankerləri üçün xüsusi icazənin alınması İran parlamentinin sədri Məhəmməd Baqir Qalibafın İraqa səfəri zamanı Bağdadın əsas tələblərindən biri olub.

ABŞ İrana qarşı yeni sanksiyalar açıqlayacaq

Vaşinqtonun Tehranı və onun ticarət tərəfdaşlarını hədəf alan yeni iqtisadi sanksiyalar elan edəcəyi ərəfədə ABŞ və İran arasında qarşılıqlı xəbərdarlıqlar səsləndirilib.

"Kpler" analitik şirkətinin məlumatlarına əsasən, sözügedən tədbirlər 2025-ci ildə İrandan dəniz yolu ilə nəql olunan neftin 80 faizindən çoxunu idxal edən Çinə də öz təsirini göstərə bilər.

Tramp İranın razılaşmaya hazır olmadığını deyir

Tramp Vaşinqtonun münaqişə ətrafındakı prosesləri izlədiyini bildirərək əlavə edib ki, Tehran razılaşma istəyir, lakin onun "məqbul razılaşma" adlandırdığı sazişə hazır deyil.

ABŞ-nin maliyyə naziri Skott Bessentin bazar ertəsi keçiriləcək mətbuat konfransında İrana qarşı indiyədək tətbiq edilmiş "ən sərt" sanksiyalar barədə məlumat verəcəyi gözlənilir. Tramp Tehrana "hər hansı bir formada xilas yolu" təqdim edən ölkələri iqtisadi sanksiyalarla hədələyib.

Müharibə enerji axınını ciddi şəkildə pozub. Eyni zamanda, Tehran tankerlərin hərəkətinə mane olmaq üçün kifayət qədər raket və dron potensialını qoruyub saxlayır və icazəsiz gəmilərə zərbə endirməklə hədələyir.

Təxminən altı aydır davam edən münaqişə minlərlə insanın həyatına son qoyub və boğaz vasitəsilə gəmiçiliyə ciddi zərbə vurub.