Münaqişələr qlobal dizel tədarükünü çətinləşdirir, Türkiyə yeni mənbələr axtarır

EN

Müəllif

Adam Morrow

AZ

Azərbaycan dili

Məleykə Abbasova

Rusiyadan dizel tədarükü azalıb, Yaxın Şərqdə enerji axınları pozulub. Buna görə də Türkiyə bu ay ABŞ və Hindistandan dizel idxalını xeyli artırıb.

“Kpler” şirkətinin məlumatına görə, Türkiyə bu ay Hindistandan gündəlik 120 min bareldən çox dizel alıb. ABŞ-dən tədarük isə gündəlik təxminən 90 min barel olub.

Bu, “Kpler” şirkətinin 2017-ci ildən məlumat toplamağa başlamasından bəri Hindistan və ABŞ-dən Türkiyəyə həyata keçirilən ən yüksək aylıq dizel tədarüküdür.

Yanacaq idxalındakı artım Türkiyənin tədarük mənbələrində dəyişiklik etdiyini göstərir. Şirkətlər uzun müddət əsas mənbə olan Rusiyaya alternativlər axtarırlar.

Enerji məlumatları təqdim edən “Energy Aspects” şirkəti isə avqustda daha aşağı rəqəmlər açıqlayıb. Şirkətin hesablamasına görə, Hindistandan gündəlik 74 min, ABŞ-dən isə 70 min barel dizel gətirilib.

Rəqəmlər fərqli olsa da, hər iki ölkədən tədarük son illərin ən yüksək səviyyəsindədir.

Rusiyanın ixrac qadağası

Türkiyə yanacaq aldığı ölkələri dəyişir. Buna Rusiyanın dizel ixracını məhdudlaşdırması səbəb olub. Ukraynanın hücumları Rusiyadakı neft emalı zavodlarının işinə mane olub və ölkədə yanacaq ehtiyatlarını azaldıb.

Rusiya ixrac qadağasını iyulda tətbiq edib. Daha sonra qadağanı avqustun sonunadək uzadıb.

Sənaye mənbələri bildirir ki, Moskva qadağanı sentyabrda da qüvvədə saxlaya bilər. Bəzi zavodlar hələ işləmir. Qadağanın ilin sonunadək uzadılması da müzakirə olunur.

Yaxın Şərq münaqişəsi yanacaq tədarükünə təsir edir

ABŞ və İran arasındakı münaqişə Yaxın Şərqdən enerji tədarükünü çətinləşdirib. Bu, Türkiyəyə də təsir edir.

Regiondakı neft emalı zavodlarının zərər görməsi və Hörmüz boğazında gəmi hərəkətinin azalması dizel tədarükünü azaldıb.

Buna görə Türkiyə Rusiyadan aldığı dizelin həcmini azaldır.

“Kpler”in məlumatına görə, avqustda Rusiyadan Türkiyəyə gündəlik təxminən 80 min barel dizel göndərilib. İlin ilk aylarında bu göstərici 200 min bareldən çox olub.

Nəticədə Rusiyanın Türkiyənin dizel idxalındakı payı təxminən 20 faizə düşüb.

2025-ci ildə isə Türkiyənin dizel idxalının 85 faizi Rusiyanın payına düşürdü. Həmin vaxt Rusiyadan Türkiyəyə gündəlik orta hesabla 281 min barel dizel göndərilib.

Ukrayna və Yaxın Şərqdəki münaqişələr ölkələri yeni yanacaq mənbələri axtarmağa məcbur edir.
 

Daha ətraflı:

Teqlər

Türkiyə dizel dizel idxalı yanacaq ABŞ Hindistan Rusiya Yaxın Şərq enerji bazarı Hörmüz boğazı
comments
share