Anakliya limanında tikinti sürətlənir: İkinci dibdərinləşdirmə gəmisi işə başlayıb

Anakliya Dərin Dəniz Limanında tikinti işləri sürətlənib. “Al-Idrisi” adlı ikinci dibdərinləşdirmə gəmisi liman ərazisinə çataraq tikinti işlərinə cəlb olunan “Tristao Da Cunha” gəmisinə qoşulub.

Hər iki gəmi Belçikanın “Jan De Nul Group” şirkətinə məxsusdur. Gəmilərin eyni vaxtda işləməsi tikinti işlərini sürətləndirib. Rəsmilər layihənin müəyyən olunmuş qrafik üzrə davam etdiyini bildirirlər.

Tikinti işləri hansı mərhələdədir?

Dalğaqıranın tikiləcəyi ərazidə dəniz dibinin təxminən bir kilometrlik hissəsində dərinləşdirmə işləri tamamlanıb. Hazırda gəmilərin limana təhlükəsiz daxil olması üçün giriş və manevr kanalının hazırlanması davam edir.

Quruda isə dalğaqıranın əsasını təşkil edəcək daş və çınqıl qatının döşənməsinə başlanılıb. Bu mərhələ tamamlandıqdan sonra tikinti işləri dənizə doğru davam etdiriləcək.

Dərinləşdirmə işləri başa çatdıqdan sonra Anakliya limanında suyun dərinliyi təxminən 17,5 metrə çatacaq. Bu, Qara dənizdə üzən ən iri gəmilərin limana daxil olmasına imkan verəcək.

Dalğaqıranın uzunluğu 1 376 metr olacaq. Liman ərazisində konteyner, quru və toplu yüklərin daşınması üçün terminalların yaradılması nəzərdə tutulur.

Layihə “landlord” modeli əsasında həyata keçirilir. Bu modelə görə, əsas infrastrukturu dövlət qurur və idarə edir, terminalların inkişafı isə özəl şirkətlərə həvalə olunur.

Məqsəd beynəlxalq investorları cəlb etmək, rəqabət mühiti yaratmaq və limanın səmərəli fəaliyyətini təmin etməkdir.

Bundan əlavə, Anakliya limanının ölkənin nəqliyyat şəbəkəsinə inteqrasiyası üçün yeni avtomobil və dəmir yolu xətlərinin çəkilməsi planlaşdırılır.

Anakliya limanının strateji əhəmiyyəti

Qara dənizdə üzən ən iri gəmiləri qəbul edə biləcək Anakliya dərin dəniz limanı Gürcüstan üçün mühüm strateji layihə hesab olunur.

Limanın istifadəyə verilməsi yükdaşımaların həcmini artırmaqla yanaşı, Gürcüstanın regional ticarət və tranzit mərkəzi kimi mövqeyini də gücləndirə bilər.

Gürcüstanın iqtisadiyyat və davamlı inkişaf nazirinin müavini Tamar İoseliani ikinci gəminin gəlişini layihənin aktiv mərhələyə keçməsinin göstəricisi kimi qiymətləndirib.

“Anakliya dərin dəniz limanının tikintisi aktiv mərhələyə daxil olub”, – o bildirib.

İoselianinin sözlərinə görə, layihə plana uyğun davam edir. Limanın fəaliyyətə başlaması Gürcüstana daha iri gəmiləri qəbul etməyə, yükdaşımaların həcmini artırmağa və regionda rəqabət qabiliyyətini gücləndirməyə imkan verəcək.

“Jan De Nul” şirkətinin layihə direktoru Erik Beyts isə bildirib ki, liman Gürcüstan iqtisadiyyatının inkişafına töhfə verəcək, yeni iş yerlərinin yaradılmasına və regionda iqtisadi artıma təkan verəcək.

Qarşıdakı mərhələ

Dəniz dibinin dərinləşdirilməsi və dalğaqıranın tikintisi davam edir. Qarşıdakı aylarda tikinti işlərinin əsas hissəsinin dənizə doğru genişləndirilməsi nəzərdə tutulur.

Hazırkı iş tempi qorunarsa, Anakliya limanının regionun ən iri gəmilərini qəbul edə biləcək tam fəaliyyət göstərən dərin dəniz limanına çevrilməsi planlaşdırıldığı kimi davam edəcək.

• Gürcüstanda Anaklia Dərin Dəniz Limanında dibdərinləşdirmə işlərinə başlanılıb

• Gürcüstan Avropa ilə birbaşa enerji bağlantısı qurmağı planlaşdırır

Teqlər

Anakliya Dərin Dəniz Limanı Al-Idrisi gəmi Tristao Da Cunha Belçika Dalğaqıran Qara dəniz Gürcüstan