Tramp İranı yeni zərbələrlə hədələyib, mülki itkilərin sayı artır

ABŞ zərbələri nəticəsində İran Hərbi Dəniz Qüvvələrinin 6 hərbçisi həlak olub

İran mediasının məlumatına görə, ABŞ-nin həyata keçirdiyi yeni zərbələr nəticəsində İran Hərbi Dəniz Qüvvələrinin 6 hərbçisi həlak olub.

İran Səhiyyə Nazirliyi bildirib ki, avqustun 30-dan etibarən ABŞ-nin endirdiyi zərbələr nəticəsində 18 nəfər ölüb, 140-dan çox insan yaralanıb. Məlumata görə, ölən və yaralananların əksəriyyəti qadınlar və uşaqlardır.

Kral III Çarlz Oman Sultanını Vindzor qəsrində qəbul edəcək

Bukingem sarayının məlumatına görə, Kral III Çarlz və kraliça Kamilla oktyabrın 20-dən 22-dək Böyük Britaniyaya dövlət səfəri çərçivəsində Oman Sultanı Heytəm bin Tariqi qəbul edəcəklər.

Səfər Yaxın Şərqdə gərginliyin artdığı və Omanın Hörmüz boğazında ticarət gəmiçiliyinin bərpası istiqamətində səylər göstərdiyi bir vaxta təsadüf edir.

Küveyt İranın hücumlarını suverenliyinə təhdid kimi qiymətləndirib

Küveyt İranın raket və dron hücumlarını pisləyib, bu addımları ölkənin suverenliyinin pozulması, regional təhlükəsizlik və sabitliyə təhdid kimi qiymətləndirib.

Bu barədə Küveyt Xarici İşlər Nazirliyi məlumat yayıb.

Bildirilib ki, hücumlar ölkə ərazisində bir neçə məkanı, o cümlədən yaşayış komplekslərindən birini hədəfə alıb. Nazirlik zərbələrin beynəlxalq hüququ, BMT Nizamnaməsini və BMT Təhlükəsizlik Şurasının müvafiq qətnaməsini pozduğunu qeyd edib.

Küveyt gərginliyin artmasının regionda sülh səylərinə mane ola biləcəyi barədə xəbərdarlıq edib. Bildirilib ki, ölkə ərazisinin, vətəndaşlarının və burada yaşayan şəxslərin təhlükəsizliyinin təmin edilməsi üçün bütün zəruri tədbirlər görüləcək.

Hücumlar ABŞ-nin Larək adasına zərbəsindən sonra İranla ABŞ arasında döyüşlərin yenidən başladığı vaxta təsadüf edib.

Küveyt hakimiyyətinin məlumatına görə, ölkənin hava hücumundan müdafiə sistemləri İranın raket və dron hücumlarına qarşı tədbir görüb. Partlayışların hava hücumundan müdafiə sistemlərinin hədəfləri zərərsizləşdirməsi nəticəsində baş verdiyi bildirilib.

İran isə zərbələrin Küveytə deyil, bu ölkədəki ABŞ hərbi obyektlərinə yönəldiyini açıqlayıb.

İran İslam İnqilabı Keşikçiləri Korpusu (SEPAH) bildirib ki, Küveytdəki Əli Əl-Salim aviabazasında ABŞ-nin hərbi mövqeləri, o cümlədən komandanlıq qərargahı və ABŞ hərbçilərinin yerləşdiyi ərazi hədəfə alınıb.

İran 11 gündə neft satışından 1 milyard dollardan çox gəlir əldə edib

İran sentyabrın 2-də başa çatan 11 gün ərzində neft satışından 1 milyard dollardan çox gəlir əldə edib. Bu barədə “Fars” xəbər agentliyi məlumat yayıb.

Bildirilib ki, neft satışından əldə olunan xarici valyuta İranın valyuta ehtiyatlarına köçürülüb. Bu vəsaitin ölkənin xarici valyutaya tələbatının ödənilməsi üçün Mərkəzi Bankın imkanlarını artıracağı gözlənilir.

“Fars”ın məlumatına görə, İranın cari ilin ilk beş ayında neft satışından əldə etdiyi gəlir 2026–2027-ci il büdcəsində nəzərdə tutulan neft gəlirlərinin 80 faizindən çoxunu təşkil edib.

İranın Neft Nazirliyi bundan əvvəl martın 21-dən iyulun 22-dək neft satışından əldə olunan 7,5 milyard dollar məbləğində xarici valyutanın Mərkəzi Banka köçürüldüyünü açıqlayıb.

Neft gəlirlərinin artması ABŞ-nin Tehrana qarşı iqtisadi təzyiqləri gücləndirdiyi vaxta təsadüf edir. Vaşinqton İranın qlobal maliyyə sisteminə çıxışını məhdudlaşdırmağa və neft ixracından əldə etdiyi gəlirləri azaltmağa çalışır.

ABŞ həmçinin İranla əlaqəli şəxslərə, qurumlara və gəmilərə qarşı yeni sanksiyalar tətbiq edib, Tehranla əməkdaşlığı davam etdirən şirkətlər üçün ikinci dərəcəli sanksiyalara məruz qalma riskini artırıb.

İsrail-Suriya təhlükəsizlik danışıqları nəticəsiz qalıb

İsrail və Suriya arasında təhlükəsizlik sazişinin imzalanması ilə bağlı aparılan danışıqlar bufer zona məsələsində yaranan fikir ayrılığı səbəbindən nəticəsiz qalıb. Bu barədə İsrailin diplomatik nümayəndəsi “The Jerusalem Post”a bildirib.

Diplomatın sözlərinə görə, İsrail bufer zonadan geri çəkilmək niyyətində deyil və həmin ərazini təhlükəsizlik baxımından strateji əhəmiyyətli hesab edir. Bununla belə, tərəflər arasında təmaslar davam edir.

İran İsrailin Livana mümkün hücumu ilə bağlı ABŞ-yə xəbərdarlıq edib

Məsələ barədə məlumatlandırılan üç rəsminin sözlərinə görə, İran ABŞ-yə bildirib ki, İsrailin Livanın cənubundakı Əli əl-Tahir yüksəkliyinə hücumu Tehranın genişmiqyaslı cavabına səbəb ola bilər.

Məlumata görə, Tehran bu xəbərdarlığı ötən ay edib. İran hərbçilərinin həmin ərazidə “Hizbullah” döyüşçüləri ilə birlikdə yerləşdirildiyi bildirilir.

İran: ABŞ-nin son zərbələrində hərbi dəniz qüvvələrinin hərbçisi həlak olub

İran dövlət mediasının məlumatına görə, Hərbi Dəniz Qüvvələrinin hərbçisi Əmirhüseyn Səlimzadə sentyabrın 1-də ABŞ-nin Xuzistan vilayətinə endirdiyi zərbələr nəticəsində həlak olub.

İran Səhiyyə Nazirliyi avqustun 30-dan sentyabrın 2-dək ABŞ-nin hava zərbələri nəticəsində 18 nəfərin öldüyünü, 142 nəfərin yaralandığını bildirib.

ABŞ Hörmüz boğazından 40 neft gəmisinin keçidini müşayiət edib

CNN-nin məlumatına görə, ABŞ ordusu sentyabrın 3-də ümumilikdə 18 milyon barel neft daşıyan 40 kommersiya gəmisinin Hörmüz boğazından keçidini müşayiət edib. Eyni vaxtda ABŞ qüvvələri strateji boğaz ətrafında İrana məxsus 60-a yaxın hərbi hədəfə zərbələr endirib.

BƏƏ Prezidenti və Tramp Yaxın Şərqdəki vəziyyəti müzakirə ediblər

BƏƏ-nin “WAM” dövlət xəbər agentliyinin məlumatına görə, Prezident Şeyx Məhəmməd bin Zayed Al Nəhyan və ABŞ Prezidenti Donald Tramp telefon danışığı zamanı Yaxın Şərqdəki son vəziyyəti və ikitərəfli əməkdaşlığı müzakirə ediblər.

Hörmüz boğazında gəmi hərəkəti kəskin azalıb

Sentyabrın 3-də Hörmüz boğazından gəmi keçidlərinin sayı daha da azalıb. Boğazdan cəmi altı kommersiya gəmisi keçib. Müqayisə üçün, sentyabrın 2-də bu rəqəm 11, son 10 günün orta göstəricisi isə təxminən 13 olub.

Xəritədə qırmızı oxlarla tankerlər, yaşıl oxlarla yük gəmiləri göstərilib. Məlumatlar ilkin xarakter daşıyır, çünki bəzi gəmilər dənizdə olarkən izləmə siqnallarını söndürə bilər.

Hörmüz boğazında gəmi hərəkətinin görüntüsü. 3 sentyabr 2026-cı il.

Yəmən: Husilər 14 ballistik raket atıb

Yəmən hökuməti bildirib ki, husilər Taiz və Hudeydada əhalinin yaşadığı ərazilərə 14 ballistik raket və dronlarla hücum edib.

Məlumata görə, hava hücumundan müdafiə sistemləri bir neçə dronu zərərsizləşdirib. Hərbi mənbə raket hücumlarının döyüş əməliyyatlarının gedişinə təsir göstərmədiyini açıqlayıb.

Avstraliya Hörmüz boğazının yenidən açılmasına çağırıb

Avstraliyanın Baş nazirinin müavini və müdafiə naziri Richard Marles İranı Hörmüz boğazında gəmiçiliyi məhdudlaşdırmaqda ittiham edib və boğazın yenidən açılmasına çağırıb.

Marles mövcud məhdudiyyətləri “qəbuledilməz” adlandıraraq gərginliyin azaldılmasının və qlobal yanacaq təchizatı zəncirlərinin bərpasının vacibliyini vurğulayıb.

Avstraliyanın Baş nazirinin müavini Richard Marles ALP-nin Milli Konfransında, 23 iyul 2026-cı il.

İran: ABŞ-nin son zərbələri nəticəsində 142 nəfər yaralanıb

İran Səhiyyə Nazirliyinin məlumatına görə, ABŞ-nin son zərbələri nəticəsində 142 nəfər yaralanıb. Yaralananlar arasında 61 qadın və 18 yaşadək 44 nəfər var.

Nazirlik zərbələr nəticəsində 18 nəfərin, o cümlədən iki qadın və bir uşağın öldüyünü bildirib.

Küveyt İranın raket və dron hücumlarının qarşısını aldığını bildirib

Küveyt ordusu ölkənin hava hücumundan müdafiə sistemlərinin İranın raket və dron hücumlarının qarşısını aldığını bildirib. Ölkədə eşidilən partlayış səslərinin raket və dronların havada zərərsizləşdirilməsi nəticəsində yarandığı açıqlanıb.

Küveyt ordusunun “X” platformasında yaydığı açıqlamada əhaliyə hakimiyyət orqanlarının təhlükəsizlik təlimatlarına əməl etmək tövsiyə olunub.

Tramp: “İranla döyüşlər uzun sürməyəcək”

ABŞ Prezidenti Donald Tramp Ağ Evdə jurnalistlərə açıqlamasında İranla yenidən başlayan döyüşlərin uzun çəkməyəcəyini bildirib. O, ABŞ-nin İrana istənilən vaxt zərbə endirməyə hazır olduğu barədə xəbərdarlıq edib.

ABŞ Prezidenti Donald Tramp Ağ Evdə görüş zamanı. 2 sentyabr 2026-cı il.