Nyu-York məktəblərində süni intellektdən istifadəyə məhdudiyyət qoyulub

Nyu-York meri Zohran Məmdani dövlət məktəblərində süni intellekt alətlərindən istifadəyə bir il müddətinə qadağa qoyub. Qadağa ibtidai və orta məktəb şagirdlərinin əksəriyyətini əhatə edir. Məqsəd süni intellektin tədris prosesinə və şagirdlər arasında ünsiyyətə mənfi təsirini azaltmaqdır.

Sentyabrın 2-də açıqlanan qərara əsasən, Nyu-York məktəblərində istifadə olunan süni intellekt əsaslı 40-a yaxın təhsil alətindən istifadə dayandırılacaq.

Qərar səkkizinci sinif də daxil olmaqla təxminən 600 min şagirdi əhatə edəcək. Yuxarı sinif şagirdləri isə bəzi hallarda süni intellektdən istifadə edə biləcəklər. Müəllimlərə bu texnologiyadan dərslərin planlaşdırılması və cədvəllərin hazırlanması üçün istifadə etməyə icazə veriləcək.

Zohran Mamdani bildirib ki, şagirdlər əsas bacarıqlarını inkişaf etdirmək üçün müəllimləri və sinif yoldaşları ilə birbaşa ünsiyyət qurmalıdırlar.

“Uşaqların öyrənməsi və inkişafı üçün müəllimlərə və canlı ünsiyyətə ehtiyacı var”, – deyə Məmdani jurnalistlərə bildirib.

O qeyd edib ki, şagirdlər həmyaşıdları ilə birlikdə işləməli, müəllimlərlə ünsiyyət qurmalı və süni intellektə arxalanmadan mürəkkəb məsələləri həll etməyi öyrənməlidirlər.

Qərar ABŞ-də yerli təhsil qurumlarının məktəblərdə süni intellektdən istifadə ilə bağlı qaydalar hazırladığı bir vaxtda qəbul edilib.

Nyu-York süni intellektlə bağlı siyasətini dəyişir

Nyu-York 2022-ci ildə istifadəyə verilən “ChatGPT”yə qısa müddət sonra dövlət məktəblərində məhdudiyyət qoymuşdu. Daha sonra süni intellektdən nəzarət altında istifadə imkanlarının araşdırılması məqsədilə bu məhdudiyyət aradan qaldırılmışdı.

Yeni qərar şəhər rəhbərliyinin süni intellektdən istifadəyə daha ehtiyatlı yanaşdığını göstərir. Rəsmilər bu texnologiyanın şagirdlərin tənqidi düşünmə və problem həll etmə bacarıqlarına mənfi təsir göstərə biləcəyindən narahatdırlar.

Los-Anceles də daxil olmaqla, ABŞ-nin digər böyük təhsil qurumları da məktəblərdə süni intellektdən istifadə qaydalarını nəzərdən keçirirlər.

“Google”, “Anthropic” və “Microsoft” şərh sorğusuna dərhal cavab verməyib.

“OpenAI”yə sərmayə yatıran “Microsoft”un məlumatına görə, əvvəlki məhdudiyyət aradan qaldırıldıqdan sonra Nyu-York məktəblərində süni intellekt əsaslı xüsusi müəllim köməkçisi istifadəyə verilib.

• Süni intellektin bölünməsi: Diplomatik təzyiq texnologiyanı düşərgələrə ayıra bilərmi?

Teqlər

Nyu-York Zohran Mamdani süni intellekt ChatGPT OpenAI Google ABŞ