ABŞ İrana qarşı yeni sanksiyalar tətbiq edib

İran ABŞ-yə məxsus pilotsuz sualtı aparatı ələ keçirdiyini bildirib

İran dövlət mediasının məlumatına görə, SEPAH-ın Hərbi Dəniz Qüvvələri Hörmüz boğazının girişində ABŞ-yə məxsus pilotsuz sualtı aparatı ələ keçiriblər.

ABŞ İran aviasiyası ilə əlaqəli 36 qurum və şəxsə qarşı sanksiyalar tətbiq edib

ABŞ Maliyyə Nazirliyi İranın aviasiya sektoruna dəstək verməkdə ittiham olunan 36 hədəfə qarşı sanksiyalar tətbiq edib.

Nazirlik həmçinin bəzi tranzit uçuşlara və xarici aviaşirkətlərin ABŞ istehsalı olan təyyarələrlə İrana uçuşlarına icazə verən üç sənədin qüvvəsini dayandırıb.

Maliyyə qurumlarına İranın aviasiya sektorunu təmin edən satınalma şəbəkələrini müəyyənləşdirmək və bu barədə məlumat vermək çağırışı edilib.

Çin: ABŞ–İran münaqişəsinin yeganə həlli dialoqdur

Çinin xarici işlər naziri Van İ bildirib ki, ABŞ–İran münaqişəsini hərbi təzyiq yolu ilə həll etmək mümkün deyil. Onun sözlərinə görə, yeganə çıxış yolu dialoq və danışıqlardır.

Van İ bu açıqlamanı Pekində Qətərin Baş naziri və xarici işlər naziri Şeyx Məhəmməd bin Əbdürrəhman Al-Tani ilə görüşü zamanı verib. O bildirib ki, münaqişə regionun təhlükəsizliyinə təhdid yaradır, enerji təchizatına, gəmiçiliyə və təchizat zəncirlərinə mənfi təsir göstərir.

Nazir əlavə edib ki, Çin sülh və sabitliyin bərpasına töhfə vermək üçün Qətər və regionun digər ölkələri ilə əməkdaşlığa hazırdır.

ABŞ İrana qarşı yeni sanksiyalar tətbiq edib

ABŞ Maliyyə Nazirliyi İrana qarşı yeni sanksiyalar tətbiq edildiyini açıqlayıb.

Sanksiyaların hansı şəxslərə və ya qurumlara şamil edildiyi barədə hələlik ətraflı məlumat verilməyib.

Bu addım Vaşinqtonun Tehrana qarşı iqtisadi təzyiqi artırdığı bir vaxtda atılıb.

İran: Rusiya ilə iqtisadi əməkdaşlıq sanksiyalara qarşı dayanıqlılığı artıracaq

İranın iqtisadiyyat naziri Seyid Əli Mədənizadə bildirib ki, Tehran və Moskva ticarət əlaqələrinin genişləndirilməsi və İranın sanksiyalara qarşı dayanıqlılığının artırılması məqsədilə bir sıra iqtisadi sazişlər üzərində işi davam etdirirlər.

Nazirin sözlərinə görə, Beynəlxalq Şimal–Cənub Nəqliyyat Dəhlizi ilə bağlı sazişlər İranın ixracı, idxalı və daxili istehsalı üçün yeni imkanlar yarada bilər.

Mədənizadə bu açıqlamanı Moskvaya səfəri zamanı verib. Səfər çərçivəsində İran və Rusiya rəsmiləri maliyyə, pul-kredit və gömrük sahələrində əməkdaşlıq məsələlərini də müzakirə ediblər.

İraq Basra-Baniyas neft kəməri ilə bağlı danışıqlar aparır

İraqın neft naziri bildirib ki, Basra-Baniyas neft kəməri layihəsi ilə bağlı ABŞ və Qətər şirkətləri ilə danışıqlar aparılır.

Qətər husilərin Səudiyyə Ərəbistanına hücumlarını pisləyib

Qətər husilərin Əbha, Xamis Muşait, Cizan və Nəcran şəhərlərində mülki və iqtisadi obyektləri hədəf almasını kəskin şəkildə pisləyib. Bildirilib ki, nəticədə qadın və uşaqlar da daxil olmaqla mülki şəxslər yaralanıb.

Qətərin Xarici İşlər Nazirliyi “X” hesabındakı paylaşımında bu addımları qəbuledilməz təcavüzkar davranış kimi qiymətləndirib.

Nazirlik, həmçinin Qırmızı dənizdə kommersiya gəmilərinin hədəfə alınmasını pisləyib və bu cür hücumların dərhal dayandırılmasına çağırıb. Qətərin Səudiyyə Ərəbistanı ilə tam həmrəyliyini də bir daha təsdiqləyib.

Husilər Səudiyyə Ərəbistanının dərinliklərində genişmiqyaslı hərbi əməliyyat elan edəcək

İranın dəstəklədiyi Yəmən husiləri Səudiyyə Ərəbistanının dərinliklərində genişmiqyaslı hərbi əməliyyatla bağlı yaxın saatlarda açıqlama verəcəklər. Bunu qrupun hərbi sözçüsü Yəhya Səri bildirib.

Misir İranın Hörmüz boğazından keçidi məhdudlaşdırmaq cəhdlərini qəbul etmir

Misirin xarici işlər naziri Bədr Əbdül Ati Qahirədə keçirilən Ərəb Liqası Şurasının 166-cı sessiyasında bildirib ki, ölkəsi Hörmüz boğazında gəmi hərəkətinin məhdudlaşdırılması cəhdlərini qəbul etmir.

“Biz gəmiçilik azadlığının təmin olunmasının vacibliyini vurğulayırıq və dəniz yollarından təzyiqi və gərginliyi artırmaq vasitəsi kimi istifadə edilməsini qəbul etmirik”, – deyə Əbdül Ati bildirib.

İran ABŞ və İsraili müharibəyə görə məsuliyyət daşımağa çağırıb

İranın Cenevrədəki BMT nümayəndəliyi ABŞ və İsraili müharibəyə görə məsuliyyətə cəlb etməyə çağırıb.

Nümayəndəlik bildirib ki, BMT İnsan Hüquqları Şurasının 63-cü sessiyasının açılışı ilə əlaqədar İran ABŞ və İsrailin hücumları nəticəsində zərər çəkənlərin və sağ qalanların səsini daha geniş auditoriyaya çatdırmaq öhdəliyini bir daha təsdiqləyir.

Bildirilib ki, Şura münaqişələr nəticəsində baş verən insan hüquqları və beynəlxalq humanitar hüquq pozuntularını araşdırmaq səlahiyyətinə malikdir. Buraya Tehranın İranda mülki infrastruktura və obyektlərə qarşı qəsdən və fərq qoymadan həyata keçirilmiş hücumlar kimi qiymətləndirdiyi hallar da daxildir.

Husilərin hücumlarından sonra Səudiyyə Ərəbistanının enerji obyektlərində fasilələr yaranıb

Səudiyyə Ərəbistanının Energetika Nazirliyi bildirib ki, ölkənin cənub bölgəsindəki bir sıra enerji obyektləri və infrastrukturu Yəmən husilərinin hücumlarına məruz qalıb. Hücumlar nəticəsində bir neçə obyektdə yanğın baş verib, bəzi əməliyyatlar isə müvəqqəti dayandırılıb.

Husilərin hücumları nəticəsində 73 nəfər yaralanıb

Yəmən husilərinin Səudiyyə Ərəbistanına hücumları nəticəsində qadın və uşaqlar da daxil olmaqla 73 nəfər yaralanıb.

Bu barədə Yəməndə Səudiyyə Ərəbistanının rəhbərlik etdiyi koalisiyanın sözçüsü, general-mayor Türki Əl-Maliki məlumat verib.

Əl-Malikinin sözlərinə görə, husilər Əbha, Xamis Muşait, Cizan və Nəcran şəhərlərini hədəfə alıblar. O, hücumları “təhlükəli eskalasiya” adlandırıb.

Koalisiya mülki və iqtisadi obyektləri hədəf alan hücumlara qətiyyətlə cavab verəcəyini bildirib.

Qətər rəsmisi: “Hörmüz boğazının bağlanması dünya üçün sənaye fəlakətinə səbəb ola bilər”

Qətər Xarici İşlər Nazirliyinin sözçüsü Macid Əl-Ənsari ABŞ-nin CNN telekanalına bildirib ki, Hörmüz boğazının bağlanması dünya üçün sənaye fəlakətinə səbəb ola bilər.

Əl-Ənsarinin sözlərinə görə, su yollarından münaqişələrdə silah kimi istifadə edilməsinin yeni normaya çevrilməsinə imkan vermək olmaz. O əlavə edib ki, belə halların qarşısı ilkin mərhələdə alınmalıdır.

Gəmi izləmə şirkəti “Kpler”in məlumatına görə, sentyabrın 7-də Hörmüz boğazından gəmi keçidi yavaşlayıb. Həmin gün boğazdan cəmi yeddi gəmi keçib. Əvvəlki gün isə bu rəqəm səkkiz olub.

Bu arada İran Ali Milli Təhlükəsizlik Şurasının katibi Möhsün Rzai xəbərdarlıq edib ki, iqtisadi müharibəyə cavab olaraq Fars körfəzində ABŞ-nin dəniz blokadasının sərhədlərinə qədər dəniz təcrid zonası yaradılacaq.