SEPAH ABŞ gəmiləri və neft tankerlərinə hücum edib

ABŞ-İran gərginliyi fonunda neft 3,5 faiz bahalaşıb

Neft qiymətləri  3,5 faiz artıb. ABŞ ilə İran arasında gərginliyin qlobal neft tədarükündə fasilələr yarada biləcəyi ilə bağlı narahatlıqlar fonunda “Brent” markalı neftin bir barelinin qiyməti 101 dolları ötüb. Bakı vaxtı ilə saat 19:30-da “Brent” 101,20 dollara satılıb.

Bazarların diqqəti xüsusilə Hörmüz boğazındakı vəziyyətə yönəlib. Tankerlərin hərəkətində uzunmüddətli fasilələr qlobal neft tədarükünü daha da azalda bilər. Çində tələbatın artması və Körfəzdə tədarüklə bağlı narahatlıqlar da neft qiymətlərinin yüksəlməsinə təsir göstərir.

İranın Cask limanı yaxınlığında dənizdən partlayış səsi eşidilib

İranın “Fars” xəbər agentliyi bildirib ki, ölkənin cənubundakı Cask limanı yaxınlığında dəniz istiqamətindən gələn partlayış səsi eşidilib.

Agentlik partlayışın mənbəyi və səbəbi ilə bağlı hələlik heç bir məlumatın olmadığını qeyd edib.

BAEA İranın nüvə öhdəliklərini pozduğunu bildirib

BMT-nin nüvə nəzarəti üzrə qurumu olan Beynəlxalq Atom Enerjisi Agentliyinin (BAEA) 35 ölkədən ibarət Rəhbərlər Şurası İranın nüvə silahlarının yayılmamasına dair öhdəliklərini pozması ilə bağlı məsələni BMT Təhlükəsizlik Şurasına göndərən qətnamə qəbul edib. Diplomatların sözlərinə görə, bu, son 20 ildə ilk belə addımdır.

Qətnamə ötən il iyunun 12-də qəbul edilmiş əvvəlki sənədin davamıdır. Həmin sənəddə İranın nüvə silahlarının yayılmamasına dair öhdəliklərinə əməl etmədiyi qeyd olunurdu. Qətnamə İsrailin İranın nüvə obyektlərinə zərbələr endirməyə başlamasından bir gün əvvəl qəbul edilmişdi. Daha sonra ABŞ da bu hücumlara qoşulmuşdu.

Diplomatların bildirdiyinə görə, İranın öhdəliklərini pozması ilə bağlı məsələni BMT Təhlükəsizlik Şurasına çıxarmaq üçün ayrıca yeni qətnamənin qəbul edilməsi tələb olunurdu.

İran dəniz zonasına daxil olan gəmiləri sanksiyalarla hədələyib

İran bildirib ki, Tehranın icazəsi olmadan yeni müəyyən edilmiş dəniz zonasına daxil olan gəmilərə sanksiyalar tətbiq ediləcək.

SEPAH-ın sözçüsü Hossein Mohibi bildirib ki, qara siyahıya salınan gəmilər Hörmüz boğazından keçdikdən sonra belə dəniz, sığorta və dəstək xidmətlərindən məhrum ediləcək.

Açıqlama İranın Ərəb körfəzinin bəzi hissələrini əhatə edən məhdudlaşdırılmış zona yaratmaq qərarından sonra verilib. Bu addım ABŞ ilə İran arasında gərginliyin artdığı və Hörmüz boğazı ətrafında dəniz nəqliyyatı üçün risklərin çoxaldığı dövrə təsadüf edir.

İraq sularında neft tankeri vurulub, gəmilər ABŞ-İran qarşıdurmasının hədəfinə çevrilib

İraq yanacağı daşıyan neft tankeri İraqın ərazi sularında dronla vurulub. Zərbə nəticəsində Panama bayrağı altında üzən “New Andros” tankerində yanğın başlayıb. Gəminin 22 nəfərlik heyətindən xəsarət alan olmayıb.

Böyük Britaniyanın Dəniz Ticarət Əməliyyatları İdarəsi (UKMTO) bildirib ki, gecə saatlarında Körfəz və Oman körfəzində bir neçə ticarət gəmisi hücuma məruz qalıb. Onlardan biri Birləşmiş Ərəb Əmirlikləri yaxınlığında zərbə nəticəsində yan əyilmiş vəziyyətdə müşahidə edilib.

İran isə ABŞ-nin İrana məxsus beş neft tankerini batırmasından sonra Hörmüz boğazı yaxınlığında 10 gəmiyə zərbə endirdiyini bildirib.

SEPAH-dan yeni qərar: Hörmüz boğazından kənarda dəniz zonası məhdudlaşdırılır

İran İslam İnqilabı Keşikçiləri Korpusu bildirib ki, dənizdə məhdud zona İranın Çabahar şəhərindən başlayaraq Oman körfəzi və Ərəbistan dənizinin bəzi hissələrini əhatə edəcək. Ərazinin dəqiq koordinatları daha sonra açıqlanacaq.

Açıqlama İranın Ali Milli Təhlükəsizlik Şurasının katibi Möhsün Rzayinin sentyabrın 7-də səsləndirdiyi fikirlərdən sonra verilib. Dövlət mediasının məlumatına görə, Rzayi İranın yaxın günlərdə Hörmüz boğazından kənarda məhdud zona yaradacağını bildirib.

İran ABŞ-nin neft tankerlərinə hücumlarını pisləyib

İran Xarici İşlər Nazirliyi ABŞ-nin İran neft tankerlərinə hücumlarını pisləyib və bu addımların gərginliyin daha da artmasına səbəb ola biləcəyi barədə xəbərdarlıq edib.

Nazirliyin bəyanatında bildirilib ki, ABŞ-nin İran neft tankerlərinə hücumlarına cavab olaraq, İran silahlı qüvvələri özünümüdafiə hüququ çərçivəsində İordaniyada yerləşən ABŞ hərbi bazaları və obyektlərinə, eləcə də bir neçə ABŞ gəmisinə zərbələr endirib.

Bəyanatda İordaniyanın ABŞ-nin İrana qarşı hərbi əməliyyatlarına dəstək verməyə davam etdiyi iddia olunub.

ABŞ ordusu İranın hərbi gəmilərinə zərbə endirməsi barədə məlumatları təkzib edib

ABŞ Mərkəzi Komandanlığı (CENTCOM) İran qüvvələrinin Yaxın Şərqdə fəaliyyət göstərən ABŞ hərbi gəmilərini vurması barədə məlumatları təkzib edib. Komandanlıq bütün hücum cəhdlərinin uğursuz olduğunu bildirib.

CENTCOM sentyabrın 9-da “X” platformasında yaydığı açıqlamada bildirib:

“İran İslam İnqilabı Keşikçiləri Korpusunun (SEPAH) qüvvələri Yaxın Şərqdə fəaliyyət göstərən ABŞ Hərbi Dəniz Qüvvələrinin iki esminesini vurduqlarını iddia ediblər. Bu, tamamilə yalandır”.

Neftin qiyməti ABŞ–İran gərginliyi fonunda 100 dolları ötüb

ABŞ ilə İran arasında davam edən gərginliyin enerji bazarlarında narahatlıq yaratması fonunda çərşənbə günü neftin qiyməti yüksəlib.

“Brent” markalı neftin qiyməti 2,2 faiz artaraq bir barel üçün 100 dolları ötüb, WTI markalı neft isə 1,5 faiz bahalaşaraq 94,50 dollara çatıb.

Qiymət artımı İran İslam İnqilabı Keşikçiləri Korpusunun (SEPAH) ABŞ-nin beş İran tankerinə hücumlarına cavab olaraq Fars körfəzində ABŞ-yə məxsus iki gəmi və səkkiz neft tankerini hədəfə aldığını bildirməsindən sonra qeydə alınıb.

Yəməndə döyüşlər şiddətlənib

Yəmən hökumət qüvvələri ilə husilər arasında döyüşlər dörd vilayətdə şiddətlənib. Məlumata görə, qarşıdurmalarda mülki şəxslər də daxil olmaqla bir neçə nəfər həlak olub.

Taiz, Əl-Beyda, Əl-Dali və Əl-Hudeyda vilayətlərində toqquşmalar və hücumlar qeydə alınıb. Hökumət qüvvələri isə Bab əl-Məndəb boğazı yaxınlığındakı strateji sahil şəhəri Moxaya əlavə qüvvələr göndərib.

Hökumətyönlü qüvvələr husilərin mövqelərinə zərbələr endirdiklərini və onlara məxsus dronu vurduqlarını bildiriblər.

Əl-Hudeydada husilərin minaatan atəşi nəticəsində iki mülki şəxsin öldüyü bildirilir.

Bu, BMT-nin vasitəçiliyi ilə əldə olunan atəşkəsin 2022-ci ildə genişmiqyaslı döyüşləri əsasən dayandırmasından sonra tərəflər arasında ən genişmiqyaslı qarşıdurmadır.

Fars və Oman körfəzlərində bir neçə ticarət gəmisi sıradan çıxarılıb

Birləşmiş Krallığın Dəniz Ticarəti Əməliyyatları Mərkəzi (UKMTO) bildirib ki, regionda davam edən hərbi əməliyyatlar zamanı Fars körfəzinin şimalında və Oman körfəzində bir neçə ticarət gəmisi atəşə məruz qalaraq sıradan çıxıb.

İnsan tələfatı və ətraf mühitə təsirlə bağlı məlumat hələlik təsdiqlənməyib.

“Lufthansa” oktyabrın sonundan Dubaya uçuşları bərpa edəcək

Almaniyanın “Lufthansa Group” aviaşirkətlər qrupu 2026-cı il oktyabrın sonundan Dubaya uçuşları mərhələli şəkildə bərpa edəcək.

Şirkətin açıqlamasına görə, uçuşların tam intensivliyə çatdığı dövrdə qrupa daxil olan aviaşirkətlər Dubaya və əks istiqamətdə həftədə 36-dək reys həyata keçirəcək.

“Lufthansa” bildirib ki, uçuşların mərhələli bərpası şirkətin Yaxın Şərqdəki mövqeyini gücləndirəcək, həm işgüzar səfər edənlər, həm də turistlər üçün səyahət imkanlarını genişləndirəcək.

Xamis Müşaitdə təhlükənin aradan qalxdığı bildirilib

Səudiyyə Ərəbistanının Mülki Müdafiə Xidmətinin məlumatına görə, Xamis Müşait şəhərində daha əvvəl elan edilən təhlükə aradan qalxıb.

Yəməndəki husilər isə Səudiyyə Ərəbistanının cənubundakı aviabazaya hücum etdiklərini iddia edirlər.

 İraq OPEC+ üzrə neft hasilatı kvotasının artırılmasını istəyir

Bloomberg News”un məlumatına görə, İraq OPEC+ çərçivəsində neft hasilatı kvotasının əhəmiyyətli dərəcədə artırılmasını istəyir.

İraq 2027-ci il üçün yeni hasilat səviyyələri ilə bağlı danışıqlar ərəfəsində kvotanın ölkənin mövcud hasilat imkanlarına uyğun müəyyənləşdirilməsinə çalışır.

 İranın xarici işlər naziri ABŞ-nin yeni sanksiyalarını tənqid edib

İranın xarici işlər naziri Abbas Əraqçi ABŞ-nin Tehrana qarşı yeni sanksiyalarını tənqid edib. O, Vaşinqtonu nəticə verməyən siyasəti təkrarlamaqda ittiham edib.

Əraqçi “X” hesabında bildirib ki, ABŞ 47 il ərzində İrana qarşı sanksiyalar tətbiq edib, daha sonra isə “İsrailin adından” müharibəyə başlayıb. Onun sözlərinə görə, baş verənlər ABŞ-nin dünyadakı nüfuzuna zərbə vurub.

“Sanksiyalar və müharibə yolu ilə məqsədlərinə çata bilməyən Vaşinqtonun ‘yeni’ həlli... daha çox sanksiyadır. Doğrudanmı?” – Əraqçi yazıb.

Açıqlama ABŞ-nin Tehrana iqtisadi təzyiqi artırmaq məqsədilə İranın aviasiya sektoruna qarşı yeni sanksiyalar elan etməsindən sonra verilib.

Qətər limanında hərbi gəmidə yanğın söndürülüb

Qətərin Daxili İşlər Nazirliyi Əl-Vakra limanında hərbi gəmidə baş verən yanğının Mülki Müdafiə qüvvələri tərəfindən söndürüldüyünü bildirib. Hadisə zamanı xəsarət alan olmayıb.

Nazirliyin “X” hesabında yaydığı məlumata görə, fövqəladə hallar xidmətləri hadisə yerinə cəlb olunub.

 ABŞ İranın daha 27 aviaşirkətinə sanksiya tətbiq edib

ABŞ Maliyyə Nazirliyi İranın qalan aviaşirkətlərinə, həmçinin “Mahan Air”ə dəstək verməkdə ittiham olunan şirkətlərə sanksiya tətbiq edib. Vaşinqton bu addımı Tehrana iqtisadi təzyiqi artırmaq siyasəti çərçivəsində atıb.

ABŞ maliyyə naziri Skott Bessent “X” hesabında bildirib ki, Vaşinqton İran hakimiyyətinə maliyyə dəstəyi göstərənlərin “ciddi nəticələrlə” üzləşəcəyi barədə xəbərdarlıq edib.

“Bu gün sanksiya tətbiq etdiyimiz İran aviaşirkətləri ilə əməkdaşlıq edən hər kəsə xəbərdarlıq edirik: qlobal maliyyə sistemindən kənarlaşdırıla bilərsiniz”, – Bessent bildirib.

Sanksiyalar İranın 27 aviaşirkətini, eləcə də “Mahan Air”ə təyyarə alışı və beynəlxalq fəaliyyətini davam etdirməkdə kömək göstərdiyi iddia olunan xarici şirkətləri əhatə edir.

CENTCOM ABŞ zərbəsindən sonra İran gəmisinin batdığı görüntüləri yayıb  

ABŞ Mərkəzi Komandanlığı (CENTCOM) ABŞ qüvvələrinin zərbəsindən sonra İran gəmisinin Oman körfəzində batmasını əks etdirdiyi bildirilən görüntüləri yayıb.

CENTCOM “X” hesabında bildirib ki, zərbə İran İslam İnqilabı Keşikçiləri Korpusunun (SEPAH) ABŞ Hərbi Dəniz Qüvvələrinə məxsus döyüş gəmisinə hücum cəhdinə cavab olaraq endirilib.

İran İordaniyadakı ABŞ hərbi bazasına raket zərbələri endirib

İran İslam İnqilabı Keşikçiləri Korpusu (SEPAH) İordaniyadakı ABŞ hərbi bazasına ballistik raketlər atdığını, Hörmüz boğazında isə 10 gəmiyə hücum etdiyini bildirib.

Hücumlar ABŞ-nin beş İran neft tankerini məhv etdiyini açıqlamasından sonra baş verib. Vaşinqton bu zərbələrin İranın ABŞ hərbi gəmisinə raket hücumuna cavab olduğunu bildirib.

İordaniya raketlərin əksəriyyətinin ölkənin hava hücumundan müdafiə sistemləri tərəfindən zərərsizləşdirildiyini bildirib. Hücumlarda ölən və yaralanan olmayıb.

Son hadisələr fonunda altı aydır davam edən münaqişədə gərginlik daha da artıb. Hərbi əməliyyatlar artıq regiondakı gəmiçilik və enerji marşrutlarına da təsir göstərir.

“Brent” neftinin qiyməti 100 dollara yaxınlaşıb

Yaxın Şərqdə gərginliyin artması fonunda sentyabrın 9-da dünya bazarında neft bahalaşıb.

“Brent” markalı neftin fyuçersləri 1,57 dollar bahalaşaraq bir barel üçün 99,49 dollara çatıb.

ABŞ-nin WTI markalı neftinin qiyməti isə 1,60 dollar artaraq bir barel üçün 94,63 dollara çatıb.

Hörmüz boğazından keçən gəmilərin sayı azalıb

Sentyabrın 8-də Hörmüz boğazından altı yük gəmisi keçib. Bu, son 10 gün üzrə gündəlik orta göstəricinin yarısıdır.

“Kpler”in məlumatına görə, həmin dövrdə boğazdan gündə orta hesabla 12 gəmi keçib.

Gəmilərdən beşi boğaza daxil olub, biri isə ərazini tərk edib. Onların arasında “Panamax” tipli bir gəmi və orta ölçülü bir tanker də olub.

Bəzi gəmilər hərəkət zamanı avtomatik identifikasiya sistemlərini (AIS) söndürdüyündən məlumatlar sonradan dəqiqləşdirilə bilər.

İran ABŞ gəmilərinə və neft tankerlərinə zərbə endirdiyini iddia edir

İran dövlət mediasının məlumatına görə, İran İslam İnqilabı Keşikçiləri Korpusu (SEPAH) Fars körfəzində ABŞ-yə məxsus iki gəmiyə və səkkiz neft tankerinə zərbə endirdiyini bildirib. Qurum hücumun ABŞ-nin İranın beş tankerinə hücumuna cavab olduğunu açıqlayıb.

SEPAH iddia edib ki, həmin 10 gəmi Hörmüz boğazında qadağan olunmuş və təhlükəli elan etdiyi ərazidən keçməyə çalışıb.