Səudiyyə Ərəbistanından xaricə səfərlər bazarı 60 milyard dolları ötə bilər

Səudiyyə Ərəbistanından xaricə səfərlər bazarının hazırkı həcmi təxminən 35 milyard dollardır və 2030–2034-cü illərdə 60 milyard dolları ötə bilər. Artıma əsasən səyahətə daha çox pul xərcləyən gənclər və beynəlxalq turizm istiqamətləri arasında güclənən rəqabət təkan verir.

Səudiyyə Ərəbistanından xaricə səfər edən turistlərin cəlb edilməsi və bu sahədəki çətinliklər “WTM Spotlight Riyadh” tədbirinin ikinci gününün əsas mövzularından biri olub. Turizm sektoru nümayəndələri səyahətçilərin dəyişən seçimlərini, ailəvi səyahət üçün nəzərdə tutulan təklifləri və səudiyyəli turistlərin marağının artdığı istiqamətləri müzakirə ediblər.

Səudiyyə Ərəbistanından xaricə səfərlər bazarında artım gözlənilir

“35 milyard dollarlıq imkan – xarici səfərlərə tələbatdan necə və harada yararlanmalı” adlı paneldə “Perfetti Hospitality”nin baş direktoru Turab Səlim və “almatar”ın həmtəsisçisi və baş direktoru Feysəl əl-Racihi səudiyyəli turistlərin seçimlərinə təsir edən amillərdən danışıblar.

Paneldə açıqlanan rəqəmlərə görə, Səudiyyə Ərəbistanından xaricə səfərlər bazarının hazırkı həcmi təxminən 35 milyard dollardır. 2030–2034-cü illərdə bu rəqəmin 60 milyard dolları ötəcəyi gözlənilir.

Bazarın böyüməsinə ölkə əhalisinin gənc olması da təsir edir. Səudiyyə Ərəbistanı əhalisinin təxminən 70 faizi 35 yaşadək insanlardan ibarətdir. Səudiyyəli turistlərin adambaşına xərclərinin dünya üzrə orta göstəricidən təxminən 11 dəfə yüksək olduğu bildirilir.

Əl-Racihi bildirib ki, şəxsi tövsiyələr səyahətlə bağlı qərarların verilməsində mühüm rol oynamaqda davam edir. Bununla belə, marağın səyahət bronuna çevrilməsi üçün bir neçə amilin üst-üstə düşməsi lazımdır.

Ailələr ayrı-ayrı otaqlar bron etmək əvəzinə, rahat yerləşə biləcəkləri daha geniş məkanlara üstünlük verirlər.

Müzakirədə vurğulanıb ki, Səudiyyə Ərəbistanı bazarı üçün təkliflər hazırlayan otellər və digər turizm şirkətləri bu ehtiyacları nəzərə almalıdır.

Çin yeni turizm istiqaməti kimi diqqət çəkir

Səudiyyəli turistlərin seçimləri dəyişdikcə Çin də marağın artdığı istiqamətlərdən biri kimi önə çıxır.

Turab Səlim iki ölkə arasında təhsil və biznes əlaqələrinin genişləndiyini qeyd edib, sağlamlıq və istirahət turizmi sahələrində də yeni imkanların yarandığını bildirib.

Səudiyyə Ərəbistanının inkişaf edən turizm istiqamətləri

Konfrans proqramı ilə yanaşı, “WTM Spotlight Riyadh” tədbiri çərçivəsində Səudiyyə Ərəbistanının inkişaf edən turizm istiqamətləri də təqdim olunub.

“Soudah Mountain” stendində dağ mənzərələri, təbiəti və lüks turizm imkanları ilə seçilən Asir bölgəsinin turizm potensialı nümayiş etdirilib.

“Soudah Peaks” Səudiyyə Ərəbistanında dəniz səviyyəsindən 3 015 metr yüksəklikdə salınan lüks dağ turizmi kompleksidir. Soudah və Rijal Almaa ərazilərini əhatə edən layihə lüks yerləşmə, ticarət, macəra turizmi, sağlamlıq və istirahət imkanlarını bir araya gətirəcək.

“Qiddiya City” stendində isə ölkənin turizm sektorunda həyata keçirdiyi digər iri layihə təqdim olunub. Sahəsi 360 kvadratkilometrdən çox olan şəhərdə əyləncə, idman və istirahət məkanları yaradılacaq.

Bu layihələr Səudiyyə Ərəbistanının dağ və təbiət turizmindən lüks istirahət, əyləncə və idmanadək geniş turizm potensialını nümayiş etdirir.

Səudiyyəli turistlər daha çox hara səyahət edirlər?

Tədbirin ikinci günündə səudiyyəli turistlərin getdikcə daha çox maraq göstərdiyi ölkə və şəhərlər də müzakirə olunub.

“Which Destinations Are Winning?” adlı sessiyada “Almosafer Travel & Tourism Co.” şirkətinin direktoru Rob Arrow Səudiyyə Ərəbistanından xaricə səfər edən turistlərin dəyişən seçimlərindən danışıb.

İsveçrə, Türkiyə, Malayziya, Sinqapur və İndoneziya səudiyyəli turistlərin getdikcə daha çox maraq göstərdiyi ölkələr sırasında yer alıb. Viza prosedurlarının sadəliyi, birbaşa aviareyslərin mövcudluğu, mədəni yaxınlıq və fərqli səyahət təcrübələri seçimə təsir edən əsas amillər kimi göstərilib.

Səudiyyə Ərəbistanı turizm sektoru üçün kadr hazırlığını gücləndirir

Digər sessiyalardan biri 2030-cu ildən sonrakı dövrdə Səudiyyə Ərəbistanının turizm hədəflərinə çatması üçün tələb olunan işçi qüvvəsinə həsr olunub.

Çıxışçılar təhsil, karyera inkişafı, ixtisaslaşmış bacarıqlar və liderlik məsələlərini nəzərdən keçiriblər.

“WTM Spotlight Riyadh” sentyabrın 10-da başa çatıb. WTM-nin rəsmi məlumatına görə, sentyabrın 8-dən 10-dək keçirilən tədbir Səudiyyə Ərəbistanı və beynəlxalq turizm sektoru nümayəndələrinə yeni tərəfdaşlıqlar qurmaq, ölkənin “Vision 2030” hədəfləri ilə bağlı imkanları dəyərləndirmək imkanı verib.

 

Teqlər

Səudiyyə Ərəbistanı xaricə səfərlər bazarı turizm bazarı WTM Spotlight Riyadh turizm sektoru Perfetti Hospitality Turab Saleem