İsrailin Qəzza blokadası xəstəxanalarda yanacaq çatışmazlığını ağırlaşdırıb

İsrailin Qəzza blokadası xəstəxanalarda yanacaq çatışmazlığını ağırlaşdırıb
Nasser xəstəxanasının ərazisində zədələnmiş təcili yardım maşınları və digər avtomobillər. Xan-Yunis, Qəzza, 3 sentyabr 2026-cı il.
Reuters
EN

Müəllif

Naoual Sahel, Anadolu

AZ

Azərbaycan dili

Məleykə Abbasova

Qəzza Səhiyyə Nazirliyinin məlumatına görə, sentyabrın 19-dan etibarən bölgədəki 20-dən çox xəstəxana və səhiyyə mərkəzinə dizel yanacağının çatdırılması dayandırıla bilər.

Nazirliyin baş direktoru Munir əl-Burş bildirib ki, Ümumdünya Səhiyyə Təşkilatı (ÜST) maliyyə çatışmazlığı səbəbindən dizel tədarükünü dayandırmaq qərarına gəlib.

ÜST bu iddiaya hələlik münasibət bildirməyib. Təşkilat daha əvvəl maliyyə çatışmazlığının humanitar fəaliyyətinə mənfi təsir göstərdiyi barədə xəbərdarlıq edib.

Əl-Burşun sözlərinə görə, Qəzzaya daxil olan yanacaq tibb müəssisələrinin fəaliyyətini davam etdirməsi üçün ancaq kifayət edir.

O xəbərdarlıq edib ki, yanacaq tədarükünün daha da azalması əməliyyat otaqlarının və reanimasiya şöbələrinin fəaliyyətini dayandıra bilər. Bu, süni tənəffüs aparatları və oksigen sistemlərinin işinə də təsir göstərə bilər.

Dializ alan və xroniki xəstəlikləri olan pasiyentlər də təhlükə ilə üzləşə bilərlər. Əl-Burş yaralıların və inkubatorlara ehtiyacı olan uşaqların vəziyyətinə xüsusi diqqət çəkib.

Fələstinli pasiyent elektrik kəsintisi zamanı boşqabla özünü yelləyir. Nasser xəstəxanası, Xan-Yunis, Qəzza, 3 sentyabr 2026-cı il.
Reuters

Qəzza Səhiyyə Nazirliyi bildirib ki, yanacaq, sürtkü yağı və ehtiyat hissələrinin çatışmazlığı səbəbindən son günlər xəstəxanalardakı bir neçə generator fəaliyyətini dayandırıb.

Yanacaq böhranı təcili tibbi yardım xidmətlərinə, eləcə də dərman və vaksinlərin saxlanılması üçün istifadə olunan soyuducu sistemlərə də təsir göstərə bilər.

“Yanacaq böhranı xəstəxanaları fəaliyyətini tam dayandırmaq həddinə çatdırır, pasiyentləri isə qarşısı alına biləcək ölüm təhlükəsi ilə üz-üzə qoyur”, – Əl-Burş deyib.

Qəzza Səhiyyə Nazirliyi böhranı bölgəyə yanacaq və humanitar yardımın gətirilməsinə qoyulan məhdudiyyətlərlə əlaqələndirib.

ABŞ hərbi texnikası Kerem Şalom bölgəsindəki logistika mərkəzində. İsrail, 10 avqust 2026-cı il.
Reuters

Nazirliyin məlumatına görə, Qəzza ilə İsrail arasındakı Kerem Şalom sərhəd-keçid məntəqəsindəki məhdudiyyətlər və Misirlə sərhəddə yerləşən Rəfah keçid məntəqəsinin məhdud fəaliyyəti yanacaq çatışmazlığını daha da ağırlaşdırıb.

İsrail humanitar yardımın Qəzzaya girişini qəsdən məhdudlaşdırdığına dair ittihamları rədd edib və bölgədəki humanitar vəziyyətə görə HƏMAS-ı günahlandırıb.

Teqlər

Qəzza İsrail Fələstin səhiyyə böhranı Humanitar böhran Ümumdünya Səhiyyə Təşkilatı Munir əl-Burş Kerem Şalom HƏMAS
comments
share