Qəzzada yaşayış binasının uçması nəticəsində azı 12 nəfər ölüb

Qəzza şəhərində müharibə zamanı zədələnmiş yaşayış binasının uçması nəticəsində azı 12 fələstinli həyatını itirib.

Məlumata görə, hadisə gecə saatlarında baş verib. Dağıntılar altında çox sayda insanın qaldığı bildirilir. Xilasetmə qrupları məhdud imkanlarla dağıntılar altında qalan insanları çıxarmağa çalışırlar.

Qəzza şəhərinin Mülki Müdafiə Xidmətinin direktoru Raed əl-Dəhşan bildirib ki, binada azı 10 ailə yaşayırdı və xilasedicilər dağıntılar altından səslər eşidiblər.

BMT-nin İnkişaf Proqramının Qəzza ofisinin rəhbəri Alessandro Mrakic bildirib ki, xilasetmə əməliyyatlarına BMT qrupları ilə yanaşı, Misirin yardım qurumu da qoşulub. Onun sözlərinə görə, ağır texnika çatışmazlığı xilasetmə işlərini ciddi şəkildə çətinləşdirir.

Mrakic Qəzzada təxminən 400 binanın uçmaq təhlükəsi ilə üz-üzə olduğunu bildirib və qarşıdan gələn qışın vəziyyəti daha da ağırlaşdıra biləcəyi barədə xəbərdarlıq edib.

Qəzzanın Mülki Müdafiə Xidmətinin məlumatına görə, təxminən 2 min zədələnmiş binada hələ də ailələr yaşayır. Sığınacaq imkanlarının və yeni çadırların məhdud olması səbəbindən bəzi ailələr qismən zədələnmiş evlərdə qalmağa məcburdur.

Fələstin və BMT rəsmiləri dağıntıların təmizlənməsi və xilasetmə işləri üçün lazım olan ağır texnikanın çatışmazlığını İsrailin Qəzzaya avadanlıq gətirilməsinə tətbiq etdiyi məhdudiyyətlərlə əlaqələndirirlər. İsrail isə bu məhdudiyyətlərin avadanlığın silahlı qrupların əlinə keçməsinin qarşısını almaq məqsədi daşıdığını bildirir.

Teqlər

Qəzza Fələstin Dağıntılar BMT Misir İsrail İsrail-Fələstin münaqişəsi